Kryeministri zgjodhi sot të ndalej në një biznes të vogël artizanal, të drejtuar nga një grua, në qytetin e Korçës, për të inkurajuar dhe përgëzuar guximin e grave shqiptare sipërmarrëse, drejtuese e menaxhere, të cilat me shumë kurajë e vendosmëri ia kanë dalë të jenë të suksesshme në sipërmarrjet  e tyre.

 “Unë shpreh respektin më të madh për punën e shkëlqyer që bëni. Ju meritoni me të vërtetë  të konsideroheni duararta sepse ju shkrini me talentin tuaj një gjeni krijuese shekullore të shqiptarëve.”  iu drejtua kryeministri grave dhe vajzave të punësuara aty, teksa pa nga afër punimet artistike të bëra me dorë nga këto punonjëse. Në këtë biznes janë të punësuara 70 gra dhe vajza, shumica prej të cilave punojnë nga shtëpitë  e tyre.

Kryeministri dëgjoi me interesim kërkesën për zgjerimin e tregut të shitjes së këtyre prodhimeve edhe në kryeqytet dhe premtoi se në bashkëpunim  me kryetarin e bashkisë së Tiranës do të gjenden format më të përshtatshme të investimit për tregje artizanale apo lokale të ndryshme.

Kryeministri tha se turizmi  e zhdërvjelltëson tregun artizanal, duke e shumëfishuar atë dhe duke i dhënë një dimension të ri. Në këtë kontekst, kryeministri propozoi që në qytetet me frekuentimin më të lartë turistik, të ofrohen lokale gjatë sezonit turistik, në mënyrë që punimet të kenë përparësi në shitje.

Duke i falënderuar gratë dhe vajzat për mikëpritjen, si dhe për talentin e treguar në punimet e tyre artistike, kryeministri u shpreh:

“Unë shpreh respektin më të madh për punën e shkëlqyer që bëni. Ju meritoni me të vërtetë  të konsideroheni duararta sepse ju shkrini me talentin tuaj një gjeni krijuese shekullore të shqiptarëve. Puna artizanale që bëni ka gjithnjë vlerën e jashtëzakonshme të punës artistike dhe unë dua tu rrëfej një moment këtu. Unë kam kaluar kohëra në vende shumë të zhvilluara, si psh. kam kaluar kohë në Francë dhe në vende të tjera, por dua tu garantoj se punë të tilla kudo kanë vlerësimin më të madh, kudo tregohen me krenari të veçantë, kudo preferohen si një gjë e veçantë dhe shumë e bukur. Në asgjë më bukur, një komb dhe një popull, sesa në punën e dorës, sesa në artizanat , nuk shpreh trashëgiminë e tij gjeniale, kulturore, artistike. Në çdo motiv të qëndismave tuaja, të qilimave, të sixhadeve shprehet ajo trashëgimi artistike që është përcjellë breza pas brezi dhe që pasurohet edhe më shumë.

Unë jam dakord me ju kur thatë se ky është një biznes i vogël, por me rëndësi të madhe. Unë jam kryeministër dhe jam këtu së bashku me ministrin e financave. Ne na intereson shumë ta nxisim dhe ta inkurajojmë këtë sektor. Ne duam të dimë se çfarë duhet të bëjmë më shumë për ju, në mënyrë të zhvillojmë këtë sektor, në mënyrë që të punësojmë më shumë, të krijojmë më shumë të ardhura. Qeveria është shumë e vendosur të përparësojë artizanatin në të gjitha degët e tij, ndaj dhe unë do të doja të dija nga ju se çfarë duhet të bëjmë ne më shumë që ky sektor i rëndësishëm me potencial të madh punësimi, por njëkohësisht një sektor që shpalos gjeninë krijuese të kombit ka gjithnjë rendësi shumë të madhe’’,- thuhet në njoftimin për shtyp të selisë kryeministrore.

Kryetari i Grupit të Punës për Punësimin, në Partinë Socialiste, Arbi Mazniku, në një Deklaratë për mediat, me rastin e 1 majit, theksoi problematikat e punësimit dhe kushtet e rënda të punëtorëve, papunësinë e lartë dhe dështimet qeveritare në këto fusha.

‘’Kjo qeverisje i ka braktisur shqiptarët e thjeshtë që duan të punojnë. 1 maji nuk mund të jetë ditë feste, aty ku nuk ka punësim, aty ku nuk ka punë me dinjitet, aty ku të drejtat e punëtorëve nuk respektohen dhe ku shteti është indiferent ndaj shfrytëzimit të tyre. Sot është 1 maji, dita e të minatorëve të shfrytëzuar barbarisht në Bulqizë, ku 65 minatorë kanë gjetur vdekjen; 1 maji i rinisë të papunë, por me tituj e diploma që nuk u hyjnë në xhep; 1 maji i rinisë të pashkolluar e që endet rrugëve e pashpresë; 1 maji i rrënimit të arsimit e që nuk prodhon punësim, por rini të zhgënjyer dhe analfabetë.’’

‘’Sali Berisha dështoi me punësimin dhe sot numërohen 1 milionë shqiptarë të papunë. Premtoi që do të krijonte 160 mijë vende të reja pune dhe ndërkohë nga vetë shifrat e INSTAT-i i tij provojnë se nga 2008, 51 mijë shqiptarë kanë humbur vendin e punës. Sot në 1 Majin e ditës së punës, Sali Berisha i ka shqiptarëve 211mijë vende pune borxh. E nuk mund të ndodhte ndryshe, nën një qeveri qe tjetër flet e tjetër bën. Çdo vit që nga viti 2009, buxheti i ministrisë së punës, për programin e nxitjes së punësimit, ka ardhur ne ulje. Në vitin 2009 nga çdo 100 lek që kishte në buxhet Ministria e Punës shpenzonte për tregun e punës 4.7 lekë. Ndërkohë që sot shpenzon 2.6 lekë, ose plot 55% më pak.’’ 

‘’Të drejtat e punëtorëve shkelen e nëpërkëmben ditën për diell dhe punë nuk do të thotë më dinjitet. Punëtorët shqiptarë punojnë në kushte të vështira, shëndeti dhe jeta e tyre është në çdo çast e rrezikuar. Minatorët dhe punëtorët e ndërtimit humbasin jetën për bukën e gojës dhe qeveria vetëm ngushëllon e bën sehir. Në Shqipërinë e Saliut, në Bulqizën e pasur me minerale, minatorët jetojnë e punojnë si në mesjetë, humbin jetën sepse punojnë në kushte çnjerëzore dhe shfrytëzohen egërsisht të braktisur siç janë nga shteti i tyre. Në Shqipërinë e Sali Berishës krahu i punës, puna e shqiptarëve është e keqpaguar dhe marrëdhënia e punës është e zhdrejtë në favor vetëm të punëdhënësit. Gruaja shqiptare paguhet më pak, është më pak e punësuar dhe më pak e përfaqësuar’’, – ka theksuar Mazniku, në Deklaratën për shtyp.

AFP ka bërë publik një raport amerikan ku theksohet se Europa Perëndimore dhe kryesisht Franca dhe Belgjika shfaqin një agresivitet laik të fortë. Raporti citon shtrëngimet në rritje, të votuara këto vitet e fundit në Europë, për sa i përket shenjave fetare, ritualin e therjes së kafshëve, etj.

Një Komision qeveritar amerikan ka kritikuar të mërkurën, shumë vende në Europën Perëndimore, për një ‘laicitet shumë agresiv’. Në këtë raport, theksohet ndalimi i Burkës në hapësirat publike belge dhe franceze.

Për herë të parë, Komisioni amerikan mbi liritë fetare ndërkombëtare, anëtarët e të cilit janë të emëruar nga presidenti amerikan dhe Kongresi, i kanë kushtuar një kapitull të konsiderueshëm këtij fenomeni, në raportin vjetor, të publikuar të mërkurën, për Europën Perëndimore.

Raporti citon shtrëngesat në rritje, të votuara këto vitet e fundit në Europë, për sa i përket shenjave fetare, ritualin e therjeve të kafshëve, bërjen synet në Gjermani dhe ndërtimin e xhamive në Zvicër.

Shtrëngesat ‘krijojnë një atmosferë shqetësimi kundër disa formave të aktivitetit fetar në Europë, Perëndimore’ shpjegojnë autorët. « Këto shtrëngesa kufizojnë gjithashtu integrimin social dhe mundësitë, për sa i përket edukimit dhe punësimit për individët e prekur ».

Komisioni përmend konkretisht ndalimin e Burkës, që mbulon gjithçka tek femra, të votuar në Belgjikë dhe në Francë. « Kjo ngre shqetësime në terma diskriminues’ – thotë raporti. «  Duke u përpjekur t’i përgjigjemi shqetësimeve mbi dhunën, një ligj i tillë i aplikuar gjerësisht ngre çështje të të drejtave prindërore dhe lirinë e zgjedhjes. »

Raporti shënjestron presidentin francez François Hollande dhe ministrat e tjerë, që kanë thirrur për votë një ligj mbi shenjat fetare në disa vende private, kryesisht strukturat e fëmijërisë së hershme.

« Këto kufizime, limitojnë mundësitë për punë dhe mundësitë ekonomike, veçanërisht për femrat muslumane që mbajnë perçe » përfundon Komisioni. »

Këto janë përfundimet e Komisionit amerikan, por nëse i hedhim një këndvështrim analitik situatës, vërehen përplasje të dukshme të këndvështrimeve kulturore dhe politike midis Amerikës dhe Europës Perëndimore. Vendet e Europës Perëndimore, kryesisht Franca dhe Belgjika, të cilat regjistrojnë në gjirin e tyre një komunitet të konsiderueshëm të emigrantëve të vendeve muslimane, janë të gjendura përballë problematikave si në aspektin e të drejtave të njeriut, në këndvështrimin e ruajtjes së të drejtave të fëmijëve për mos seksualizëm të hershëm të tyre, si po ashtu edhe në lidhje me çështjet e sigurisë publike.

Belgjika ka ndaluar së fundmi, veshjen e Burkës (një çarçaf i zi që mbulon gjithçka nga koka te këmbët, si edhe sytë) në ambientet publike duke ngritur dy pika të rëndësishme, e para për arsye të sigurisë publike dhe identifikim të personave dhe arsyeja e dytë, ka lidhje me respektimin dhe të drejtat e njeriut kundrejt barazisë gjinore, në këtë rast dhunim të të drejtave të grave. Për këndvështrimin kulturor belg, kjo gjë është e papranueshme dhe cenon rëndë lirinë dhe të drejtat bazike të femrave. Në  një vend ku femra trajtohet njësoj me të drejta si edhe meshkujt, ky fenomen, shkel parimet bazë demokratike duke i dhunuar tërësisht ato.

Një tjetër problematikë e cila është trajtuar dhe nga analistë të ndryshëm,  ka të bëjë me faktin se fëmijëve të vegjël të gjinisë femërore (5-6 vjeç u vihet perçja duke i seksualizuar para kohe ato dhe duke dhunuar rëndë të drejtat e tyre).

Këto komunitete shpeshherë janë mbrojtur dhe kanë protestuar në këto vende të Europës Perëndimore, për respektim të të drejtave njerëzore dhe fetare, duke përdorur si logjikë, kushtetutën e këtyre vendeve, por ato nuk kanë marrë në konsideratë për analizë faktin, se kushtetuta e këtyre vendeve, krahas lirive fetare, mbron pikërisht barazinë gjinore, pra liritë e femrës.

Nga ana tjetër, nëse një femër europiane shkon në këto vende muslumane ku femrat nuk kanë të drejtë të shfaqin fytyrën e tyre në asnjë ambient publik, ajo përfundon duke veshur çarçafët për të shpëtuar si nga ndjekja ligjore, po ashtu dhe përndjekja sociale. Analistët e Francës dhe Belgjikës kanë trajtuar publikisht idenë se, nuk mund të përdoret kushtetuta e tyre demokratike dhe emancipuese, për ti hapur hapësirën abuzimeve mbi të drejtat e njeriut dhe kryesisht abuzimeve, përballë gjinisë femërore.

Për demokracinë e këtyre vendeve kjo është e patolerueshme, sepse këtu nuk kemi të bëjmë thjesht me një liri private fetare, por kemi të bëjmë me një dhunim të të drejtave njerëzore pasi këto gra në vendin e tyre nuk kanë asnjë të drejtë baze, për sa i përket këndvështrimit legjislativ dhe Burkat e tyre janë simbol i diskriminimit dhe shtypjes së lirive femërore./en.ko/

Sot Fryma e Re Demokratike zhvilloi punimet e Kuvendit të saj të parë Kombëtar në Pallatin e Kongreseve në Tiranë. Në ndryshim nga Kuvendet e partive të tjera FRD zgjodhi një formë organizimi bashkëkohore, duke ndërthurur pjesën politike me panelin programor të përfaqësuar nga grupe të ndryshme interesi, mbështetës të FRD-së. FRD bëhet gjithashtu partia e parë politike që prezanton publikisht dhe broshurë programin e plotë elektoral për zgjedhjet parlamentare të 23 qershori.

Fjalimi kryesor në Kuvend u mbajt nga kryetari i FRD-së Prof.Dr.Bamir Topi, përmes të cilit u paraqit program politik i FRD, ecuria një vjeçare, raportet e saj me forcat e tjera politike, u bë analiza e zhvillimeve politike parazgjedhore në vend dhe sfidat e kësaj partie për të ardhmen. Z.Topi tha se FRD rezultoi një nismë e suksesshme politike, një projekt afatgjatë politike dhe pas zgjedhjeve do të jetë parti përcaktuese në të gjitha nivelet e vendimmarrjes politike .

Në pjesën e panelit politik foli edhe Sekretari i Përgjithshëm z.Gazmend Oketa, i cili evidentoi ecurinë organizative të FRD gjatë vitit të parë të aktivitetit, diferencën e saj me forcat e tjera politike si dhe theksoi rëndësinë e pjesëmarrjes në votime dhe të shprehjes së votës qytetare me 23 qershor.

Më tej nën moderimin e znj.Edlira Gjoni, sekretare për marrëdhëniet me publikun në FRD, e morën fjalën dhe përshëndetën figura të njohura të jetës publike, përfaqësuesit më të njohur të grupeve sociale mbështetëse të FRD-së, të cilët së bashku plotësuan të gjithë mozaikun e problematikave sociale që mishëron programi politik i FRD.

Më tej Kuvendi vijoi punimet me diskutimin dhe miratimin e akteve zyrtare të FRD, ndryshimet në statut,miratimin e programit politik elektoral si dhe mandatimin e strukturave qendrore e lokale për fushatën elektorale të 23 qershorit vendime të cilat u bënë publike nga sekretari për çështjet zgjedhore Ervin Karamuça. Pjesë e risisë së Kuvendit ishte edhe shpallja si lajtmotiv elektoral i fushatës zgjedhore të FRD-së kënga e njohur “Rrjedh në këngë e ligjërime” realizuar nga tenori i talentuar Klodian Kacani.

Në Kuvend morën pjesë për të shprehur vlerësimin dhe mbështetjen për FRD edhe personalitete të shumta vendore dhe të huaja. Prania e politikanit të njohur Besnik Mustafaj, emrit të njohur të skenës Robert Ndrenika, etj, si dhe e ambasadorëve të vendeve kryesore perëndimore të pranishëm në Tiranë, përfshirë ambasadorin e SHBA, z.Aleksandër Arvizu ishin pjesë me rëndësi në pjesëmarrjen aktive të Kuvendit,- thuhet në njoftimin për shtyp të FRD-së.