Kur kanë mbetur dhe 6 ditë nga dita e zgjedhjeve, Partia Demokratike ka përmbyllur mbrëmjen e sotme fushatën elektorale në qarkun Fierit. Kryeministri Berisha në fjalën e tij është treguar konciz në shpalosjen e platformës së partisë dhe koalicionit që drejton, duke e vënë theksin kryesisht tek punësimi dhe rritja e pagave dhe pensioneve.

“Le të ecim përpara për një mandat të tretë me të cilin synojmë rritjen e mirëqënies. Jam këtu për tu zotuar se gjatë mandatit të ardhshëm në Shqipëri rroga minimale do rritet në 350 dollarë. Rroga e mësuesit dhe rroga mesatare do arrijë në 700 dollarë. Jam sot për të garantuar cdo të ri fierak dhe cdo të ri të Shqipërisë se dyert e universiteteve do vazhdojnë të jenë të hapura për të bërë realitet ëndrrën universitare, pranë cdo shkolle të mesme do hapen degë profesionale sikundër do hapen shkolla profesionale në mbarë vendin. Katër vitet që vinë cdo njeri prej jush që do punësohet, qeveria do paguajë cdo lloj detyrimi fiskal për ju tre vjet, do mundësojë kualifikimin tuaj falas në cdo sipërmarrje. Për të gjithë të rinjtë me profesion do garancojë mikrokredi të buta për tu vetëpunësuar. Katër vitet që vinë me dyfishimin e turizmit, uljen e taksave, projektet e mëdha, mbështetjen e fermave dhe teknologjisë së informacionit në Shqipëri do krijohen 250 000 vende pune. Ftoj pensionistët e Fierit të bashkohen me ne, pasi i garantoj se katër vitet që vinë nuk do ketë pension nën 150 dollarë. Qeveria do marrë përsipër 100% të gjitha shërbimet shëndetësore dhe ilacet e pensionistëve, do subvencionojë transportin urban dhe interurban, do përballoj me buxhetin e saj 90% të shpenzimeve në shtëpinë e kujdesit të të moshuarve” deklaroi Berisha.

Ambasadori i SHBA-së në Tiranë është shprehur sot se pritet që zgjedhjet dhe rezultatet  e dala prej tyre të përmbushin standartet e një vendi aspirant të bëhet anëtar i BE-së siç është Shqipëria.

Duke iu përgjigjur pyetjes në Facebook nëse do të ndodhë rrotacioni, ambasadori Arvizu është shprehut se për këtë do të vendosin shqiptarët.

“Presim që procesi zgjedhor, vetë votimi, nxjerrja e rezultateve të jetë konseguent me standardet e një vendi anëtar të NATO-s, gjithashtu të një vendi që aspiron të bëhet vend anëtar i BE-së. Nëse vota është e lirë dhe e drejtë, siç duhet të jetë, atëherë votuesit do të jenë ata që do të vendosin nëse dhe kur duhet të ndodhë rotacioni” është shprehur Arvizu.

I pyetur se cili do të jetë reagimi i SHBA-së nëse zgjedhjet paraqiten me probleme, ambasadori Arvizu kërkoi ngapalët të respektojnë rregullat e lojës

“Ne do të konsultohemi ngushtësisht me ODIHR-in dhe të tjerë mbi procesin zgjedhor, ndërsa ky zhvillohet. U përket të gjithë lojtarëve politikë të respektojnë rregullat e lojës. Përsa i takon marrëdhënieve mes Sh.B.A.-se dhe Shqipërisë, pres që ato të vazhdojnë të jenë të afërta dhe miqësore, sikurse kanë qenë gjatë 22 viteve të fundit” u shpreh Arvizu.

I pyetur se a duhet të harxhohet kohë për të votuar, ambasadori Arvizu është përgjigjur se: “Absolutisht po. Disa njerëz kanë sugjeruar se të gjithë politikanët janë njësoj, pse duhet të zgjedh unë njërin apo tjetrin? Në një demokraci, është detyrimi i qytetarëve të shprehin preferencat e tyre. Kjo është e vetmja mënyrë për të insistuar për llogaridhënie nga udhëheqësit tuaj të zgjedhur”.

I pyetur nëse mund të përsëritet sërish i njëjti skenar që ndodhi në Tiranë në zgjedhjet vendore të 2011-ës, ambasadori është përgjigjur: Është viti 2013. Shqiptarët sot meritojnë të kenë zgjedhje të cilat përputhen me standartet ndërkombëtare. Sa më shumë këto zgjedhje të arrijnë këto standarte, aq më pak shanse ka që rezultatet do të jenë të diskutueshme. Unë mendoj se njerëzit do ta dinë ashtu siç do ta dijë edhe komuniteti ndërkombëtar”.

Ambasadori është pyetur edhe në lidhje me përdorimin e administratës për fushata elektorale si dhe shqetësimin e një studenti se po u kërkohet të plotësojnë një formular ku deklarojnë se do të votojnë PD-në për të cilat ka theksuar:

“Një nga sfidat e shumta me të cilat përballet Shqipëria është mungesa e një administrate civile efikase.  Qeveria, qoftë lokale apo qëndrore, nuk duhet të jetë një agjensi punësimi. Fatkeqësisht, në Shqipëri, kjo ndodh shpesh. Ndërsa përsa i përket votës suaj: ju duhet të votoni ndërgjegjen tuaj dhe po kështu duhet të bëjnë dhe familjarët tuaj”.

Një Projekt i quajtur Za’Lart, po mbledh denoncimet e qytetarëve, ndaj shkeljeve zgjedhore. Nga materialet e grumbulluara deri më tani janë konstatuar shkelje me administratën publike, manipulime për blerjen e votës, cenimin e fshehtësisë së saj, përfshirja e fëmijeve në tubime, etj.

Projekti Za’Lart është një projekt i shoqërise civile ku u mundësohet qytetarëve të raportojnë zgjedhjet. Projekti është realizuar me kontribut të Qytetarëve, nën moderimin e Institutit Shqiptar të Shkencave AIS, dhe me mbështetje financiare të Fondacionit Shoqëria e Hapur për Shqipërinë OSFA. Qëllimi i këtij Projekti është krijimi i një hapësire demokratike ku qytetari është aktiv nëpërmjet raportimeve të perceptimeve të tyre.

Platforma funksionon si web e njëkohësisht si aplikacion mobile. Këtu qytetari ka mundësi të raportojë në pak sekonda me fjalë dhe pamje atë çka ndodh në fushatë apo gjatë votimit. Qytetari shqiptar në vitet e fundit gjithnjë e më pak ndjehet aktor dhe pjesëmarrës në proces. Përdorimi i teknologjisë në monitorim qytetar të zgjedhjeve, është një gjetje aktuale, shumë e spikatur në disa procese zgjedhore në vende me demokraci apo pluralizëm të vonuar.

ZA’LART synon ti kthejë qytetarit shqiptar një mandat për t´u dëgjuar e për të kontribuar për një proces sa më të rregullt dhe transparent. Ky projekt realizohet me kontribut të Qytetarëve, nën moderimin e Institutit Shqiptar të Shkencave AIS, dhe me mbështetje financiare të Fondacionit Shoqëria e Hapur për Shqipërinë OSFA.

.