Të arratisurit e burgut të Trikalas vrasin policin

59

trikalaNjë punonjës policie është vrarë në Greqi, dhe dyshohet se autorë janë shqiptarët e arratisur nga burgu i Trikalas. Ngjarja e rëndë ka ndodhur pas mesnate rreth orës 2:30 minuta, kur 5 persona të armatosur iu përgjigjën me zjarr Kallashnikovi kërkesës së policëve për kontroll në vendin e quajtur Distomo. Policia për shkak të vjedhjeve të disa makinave dhe disa incidenteve në zonë, kishte ngritur postblloqe për kapjen e te arratisurve nga burgu i Trikalas.

Nga plumbat u plagos në këmbë një polic 37 vjec, babai i dy fëmijëve, i cili humbi jetën në spital nga humbja e gjakut, sepse plumbi kishte goditur arterien. Pas kësaj 5 të armatosurit iu morrën mjetet dhe armët policëve dhe u larguan me makinën e tyre. Policia vazhdon një operacion të gjerë për kapjen e grupit të të arratisurve.
Disa operacione policore janë zhvilluar muajt e fundit për kapjen e të arratisurve nga burgu i Trikalas, të cilët shfaqen herë pas here në zona të ndryshme të Greqisë, teksa vjedhin ndonjë makinë apo grabisin ndonjë supermarket. Polici 37 vjecar i vrarë natën e kaluar, është viktima e dytë pas 25 vjecares Katerina Zogali, për vrasjen e së cilës akuzohet shqiptari Marian Kola. E reja humbi jetën nga plumbat më 30 mars, gjatë shkëmbimit të zjarrit të Kolës me policinë, në ndjekje e sipër.
8 shqiptarët u arratisën nga burgu duke u gdhirë 23 marsi. Ishin 11 shqiptarë që arritën të dalin nga ambientet e burgut pasi plagosen 2 roje, por 3 prej tyre u kapën menjëherë. 3 të tjerë u kapën më vonë gjatë arratisë në zona të ndryshme të Greqisë, ndërsa 5 mbeten ende të lirë. Marian Kola është një nga të arratisurit që nuk është kapur ende.