Ndërsa ka zhvilluar “Këndin e fjalës” në Tale të Lezhës, kryesocialisti Rama theksoi se sot vija bregdetare në Shqipëri është shumë e dëmtuar për shkak të ndërhyrjeve brutale dhe abuzimeve.

“Është e vërtetë, këtu nuk sheh asgjë mbi det ndërkohë që të kalosh kufirin sheh sesi deti shfrytëzohet maksimalisht.  Në Shqipëri, vija bregdetare është dëmtuar, coptim që u bë me pronat. Ne kemi në program ngritjen e një agjencie që do quhet Agjencia Bregdetare e Detit, e cila do ketë të gjithë fuqinë institucionale për të trajtuar gjithë vijën bregdetare që nga planifikimi deri tek mbrojtja e zhvillimi i kësaj vije bregdetare. Jam i bindur se me ngritjen e Agjencisë Bregdetare të Detit do zbardhim jo vetëm procesin e kthimit dhe të kompensimit, por dhe të vërtetën e arkivave origjinale ku është bërë një batërdi” tha Rama.

Rama ka akuzuar sërish kryeministrin Berisha për mashtrim të shqiptarëve pasi sipas tij të gjitha premtimet që ka bërë  janë vetëm propagandë dhe asgjë konkrete për vendin.

Kryesocialisti Rama ka qenë në Labinot në takimin elektoral të radhës. Nga Labinoti, një tjetër denoncim ka ardhur nëpërmjet kamerave, nga një qytetare e re në moshë, e cila ka denoncuar faktin, se të punësohesh duhet të paguash 5 mijë euro dhe të gjesh 100 vota për zgjedhje. Denoncuesja ka treguar gjithashtu, se ka mbaruar mësuesi dhe kur kishte kërkuar punë, i kishin thënë, se duhet të kryejë edhe një Master. Pasi kishte mbaruar Masterin i kishin komunikuar, se duhej të kryente edhe një vit stazh. Dhe mbasi kishte mbaruar stazhin i kishin kërkuar 5 mijë euro dhe 100 vota për zgjedhje. Ajo tha gjithashtu se, po nuk pagove dhe nuk je, krah i Saliut nuk gjen punë.  

Përveç këtij fenomeni, kanë spikatur edhe dy problematika të tjera për zonën që janë të karakterik jetik: çështja e ujit dhe çështja e shëndetësisë.

Në lidhje me çështjen e ujit Rama u shpreh: ”Ne këtë e dëgjojmë kudo që; nuk ka ujë, nuk ka ujë, nuk ka ujë. E, pastaj reagon si fyer, madje, Saliu edhe thotë ç’është kjo mesjetë, kujt i thonë këta mesjetë, ne jemi në NATO. Në fakt e vërteta është që të jetuarit në mesjetë nga qytetërimin modern e ndan, ndër të tjera besoj unë, edhe uji, uji i pijshëm, uji i rrjedhshëm për t’u larë, uji për të vaditur tokën dhe njëkohësisht mbrojtja nga uji për të mos u përmbytur. Nëse raporti nuk është ky, por është siç është sot që s’ka ujë për t’u larë, s’ka ujë për të pirë, s’ka ujë për të vaditur dhe kur be shi përmbytesh atëherë, sigurish, që këtu jemi në një gjendje mesjetare. Jemi si në ato librat që i lexonim kur ishim të vegjël e na dukeshin si përralla, si legjenda. Por, ja sot unë erdha nga Korça. Ajo këneta që na dukej si përrallë ka dalë prapë, është aty. Është shfaqur prapë. Në Vlorë më tregonin që është rishfaqur zona malarike. Po shtohet mushkonja me shpejtësi të madhe. Është bërë mushkonja atje për ta marrë Saliu në koalicion. Po normal se kur mori Kastriotin në koalicion mund marrë dhe mushkonjat”.

Në lidhje me politikat mbi cështjet e shëndetësisë, Kryesocialisti Rama tha:

“Saliu thotë kjo nuk ka mundësi, kjo është komunizëm. Ai në fakt ka qenë nja 25 vjet komunist dhe jo vetëm kaq se s’është ky problemi se ka shumë njerëz që kanë qenë komunist edhe kanë qenë dhe mbeten njerëz të ndershëm. Por ai ka qenë lloji më i poshtër siç thotë Vasllav Haveli jo unë. Thotë: ‘Lloji më i poshtër i komunistit është komunisti antikomunist’. Që nuk merret vesh më se çfarë është. Është vetëm etja për pushtetin e vet.

Ne themi jo, meqë kushton shumë do ta paguajë shteti shqiptar. Ne do të ndërtojmë një institucion që quhet Shërbimi Kombëtar Shëndetësor dhe atë që sot e bën individi që shkon paguan dhe merr librezën, ky shërbim do ta bëj për të gjithë. Do ta blej shteti këtë shërbim për çdo njeri. E, kur dikush sëmuret librezën e ka atje, do shkoj do ta marrë dhe do vazhdojë procesin e kurimit. Këtë nuk e kemi mësuar nga komunistët, këtë e kemi parë dhe mësuar nga Barack Obama, e kemi mësuar nga Britani e Madhe që ka vite që e ka këtë sistem dhe nga të tjera vende që po e fusin këtë sistem në Europë dhe sidomos në vendet jo shumë të zhvilluara ku shëndetësia është e mbytur nga korrupsioni”.

Gjatë një mitingu elektoral në Cërrik, ku dhe prezantoi kandidatët socialistë për deputetë, Rama tha se zgjedhja në 23 qershor është e qartë, mes një pushteti në qafë dhe një qeverie socialiste që do të jetë në krah të qytetarëve.

“A ka shqiptarë t’ia besojë me xhepin e vet Saliut, dhe kësaj qeverie që ka 8 vjet që gërryen dhe shpon xhepat e shqiptarëve? Kanë zbrazur po ashtu edhe arkën e shtetit, për të përfituar në arkën e tyre! A ka shqiptarë që mund të besojë se me PD të katandisur në një parti familjare mund të ketë të ardhme për ekonominë, biznesin e vogël? A ka shqiptarë sot që të besojë se me këta mund të ketë shans të përmirësohet përkujdesi shëndetësor, apo arsimi?”- theksoi Rama.

Duke analizuar qeverisjen 8-vjeçare të kundërshtarit të tij politik, Rama nënëvizoi se Kryeminsitri e ktheu qeverinë e Shqipërisë në një kompani fitimprurëse biznesi ku të gjithë janë bërë të gjithë me toka, ndërkohë që shqiptarët akoma nuk kanë certifikatën e tokës së tyre.

“Sot më thanë që Saliu premtonte certifikata toke brenda fundit të këtij viti, kush është ai shqiptar që e ha këtë gënjeshtër, kur ky kishte 8 vjet kohë të jepte certifikatat e tokës. Në këto 8 vjet qeveria u kthyer në kompani biznesi, janë bërë të gjithë me toka, ndërkohë që qytetarët e ndershëm rropaten dhe tokën se kanë ende të tyren. Gjyshi me jelekun antiplumb thotë se do ju japë para në dorë për naftën fidanët, plehun kimik, për TVSH, por a ka shqiptar që mund t’ja besojë më xhepin e tij Saliut që ka 8 vjet që i gërryen dhe shpon xhepat e shqiptarëve? A ka shqiptarë sot më që mund të besojë se me Partinë Demokratike të katandisur në parti familjare mund të ketë të ardhme për biznesin e vogël, i premtuan se do ja përgjysmonin taksat në 2005, ia kanë trefishuar barrën e taksave”, tha kryesocialisti ndërsa premtoi se çdo familje nën qeverisjen e PS-së do të përfitojë certifikatën e tokës, nga sistemi i ri i taksimit dhe nga programi i PS-së për Bujqësinë.
Duke iu referuar kandidatit për deputet Musa Ulqini, Rama e cilësoi si një vlerë të shtuar dhe arsye më tepër që Cërriku të votojë numrin 29, Partinë Socialiste.

Pas Cërrikut, Rama sëbashku me skuadrën e tij të kandidatëve për deputetë e ka përmbyllur fushatën elektorale të së mërkurës në Gramsh. Duke iu referuar mitingut që pritet të ketë nesër në këtë qytet kryeministri Berisha, Rama nënvizoi faktin e përdorimit të administratës nga qeveria për të mbushur sheshet nën kërcënimin e vendit të punës apo të notës.

“Ja pse nesër shkollat e Gramshit do mbyllen, sepse nesër të gjithë mësues e nxënës, do përgjigjen, do vijnë nesër për ta mbushur këtë shesh me fëmijë të kapur rob, mësues e infermierë të kapur rob nga një pushtet që i kërcënon me bukën e gojës pasi ju merr paratë për t’i dhënë një vend pune, i merr zvarrë për të mbushur sheshet. Unë ju premtoj që kurrë më këto sheshe nuk do mbushen nga frika e pushtetit, nuk do ketë mësues, e mësuese, infermierë që do detyrohen në lënë karrigen dhe të shkojnë të brohorasin për qeverinë në mitingje dhe koncerte. Populli më 23 qershor do vendosë fundin e pushtetit të frikës, rrënimit dhe dëshpërimit”, tha ai.

Rama ka shkuar më tej në akuza në drejtim të Kryeministrit, ku deklaroi se qeveria që ai drejton po organizon fluturime falas me qëllim që studentët në Itali të vijnë këtu e të japin vota të diktuara.

“Ne nuk kemi asnjë dyshim se kë kemi përballë, por ne e dimë dhe duam ta dinë të gjithë shqiptarët se zgjedhjet e 23 qershorit nuk janë një luftë gjelash ku njerëzit vënë baste, as zgjedhje ku njeri humbe tjetri fiton, por janë zgjedhje për të vendosur se në çfarë Shqipërie do jetojmë. Për të vendosur nëse e duan pushtetin në qafë, apo një qeveri në krahun e tyre. Nëse populli do vazhdojë të rropatet për të mbajtur në kurriz një grup njerëzish që u bënë miliarderë duke grabitur paratë e popullit, apo një qeveri që garanton se hallet tuaja do jenë hallet tona, për të dalë nga varfëria, për të mundur krimin, për t’i dhënë çdo shqiptari mundësinë për të jetuar me punën e tij të ndershme”, theksoi ai.

Në një takim me banorë të Labinot Fushë, kreu socialist u shpreh se kryeministri Sali Berisha mashtron njerëzit duke i bërë premtime të rreme për dëmshpërblime si për të përmbyturit ashtu edhe për uljen e kostos së prodhimit në fshat.

“Qeveria për 8 vjet e ka rrënuar dhe e ka braktisur fshatin. Ne premtojmë që do të heqim TVSH-në për ushqimet bazë dhe do të përmirësojmë jetën e banorëve të fshatit”, tha Rama.
Më herët, Rama ishte në një takim me banorë të Labinot Mal. Ne nje njoftim ne profilin e tij ne Tëitter, lideri i socialisteve, Edi Rama shkroi se ne kete zone tokat thahen per uje, nderkohe qe rezervuari qe u ishte premtuar banoreve eshte bere koncension per nje HEC. “Ne Labinot Mal ku tokat thahen per uje e rezervuari i premtuar u be koncesion per nje HEC qe kercenon te ardhmen e jetes se tokes bujqesore”, tha Rama