Parlamenti shqiptar, ka votuar sot  paketën e ligjeve të shumëpërfolur, me 107 vota pro, asnjë kundër dhe 2 abstenime. Pas votimit të tre ligjeve në parlamentin shqiptar, ambasada amerikane ka deklaruar: “Ambasada mirëpret miratimin konsensual nga parlamenti të legjislacionit të rekomanduar nga Bashkimi Europian. Nxisim parlamentin dhe qeverinë e ardhshme t’i përkushtohen përmbushjes së përparësive të mbetura dhe reformave të tjera të nevojshme nëpërmjet konsensusit dhe bashkëpunimit me qëllim që të fitojnë një opinion pozitiv nga Bashkimi Europian”.

Lideri opozitar Edi Rama gjatë takimit elektoral në Bushat të Shkodrës, kërkoi t’i jepte një mesazh shumë të qartë Kryeministrit Berisha dhe Kryetares së Parlamentit Topalli. Rama ka deklaruar se hegjemonia  e territoreve, që kanë mbështetur besnikërisht PD-në, ka marrë fund.

« Në këto territore që deri dje kanë qenë besnikërisht me PD, hegjemonia e tyre ka marrë fund dhe pushteti i tyre do të marrë votën e ndëshkimit për një rrënim të vazhdueshëm, që nuk mund të vazhdojë më. Sepse shqiptarët nuk mundet më të mbajnë në kurriz një pushtet i cili flet gjithë ditën për ta dhe punon gjithë ditën për vete. Një pushtet i cili premton dhe gënjen, premton dhe zhgënjen, premton dhe harron »,-ka deklaruar Rama.

Rama deklaroi nga Bushati se PS ka një program për t’i dhënë mundësi çdokujt që jeton me tokën, që të marrë certifikatën e tokës, që ka 20 vjet që ua mohon Saliu dhe partia e tij familjare. Për të marrë certifikatën e tokës për të qenë zotë në tokën e tyre dhe për të marrë atë mbështetje që iu duhet që kostoja e prodhimi të ulet dhe që puna me tokën të sjellë para dhe mirëqenie.

Lideri socialist ka premtuar nga Bushati se do të hiqet akciza e naftës, taksa e qarkullimit të naftës, do të investohen 160 milionë dollarë për ujin në parcelë.

‘’Do të çojmë ujin në çdo parcelë dhe njëkohësisht do të rindërtojmë sistemin e kullimit që toka të mos përmbytet më. Ruana Zot, u bë 20 vjet që ne jetojmë në vendin e dytë më të pasur të Europës për ujë, pas Norvegjisë, që nuk kemi ujë për të pirë, nuk kemi ujë për të ujitur tokën dhe përmbytemi nga uji sa herë bie një shi i madh. E, kjo miqtë e mi ka vetëm një arsye. Ne nuk kemi shtet ‘’, tha Rama.

Rama nuk ngurroi të sulmojë edhe Kryeministrin Berisha, duke e konsideruar një gjysh të veshur me antiplumb dhe që tregon përralla.

‘’Ne sot nuk jemi këtu për t’ju treguar përralla. Përralla tregon gjithë ditën gjyshi me antiplumb. Ne jemi këtu për t’ju thënë disa të vërteta të thjeshta; Shqipëria mund të bëhet ashtu siç e ëndërruan rilindësit tanë; Shqipëria mund të bëhet ashtu siç e ëndërruan ata që ndërtuan shtetin shqiptar; Shqipëria mund të bëhet ashtu siç e ëndërruan ata që dhanë jetën për lirinë e këtij vendi; Shqipëria mund të bëhet ashtu siç e ëndërruan edhe ata që u përndoqën, u burgosën, u pushkatuan për votën e  lirë, për fjalën e lirë, për sipërmarrjen e lirë, për një atdhe të lirë; Shqipëria mund të bëhet. Ne do ta bëjmë Shqipërinë ‘’, – tha Rama nga Bushati./al.bl/

Pas një seance të tensionuar ku dominuan akuzat dhe kundërakuzat mes deputetëve të PS-së dhe kryeministrit Berisha, Kuvendi arriti të miratojë paketën e integrimit.

Mazhoranca dhe opozita bashkuan sot votat dhe miratuan pro ligjit të Gjykatës së Lartë, ligjit për nëpunësin civil, si edhe për reformën parlamentare.

Deputetët e mazhorancës dhe të opozitës votuan me 108 vota pro dhe 1 abstenim për Gjykatën e Lartë, me 107 vota pro për ligjin e nënpunësit civil dhe me 108 vota pro dhe 1 abstenim reformën parlamentare.

Gjithashtu Kuvendi miratoi me 67 vota pro shtyrjes së amnistisë deri në dhjetor të vitit 2013.

Seanca e jashtëzakonshme e Parlamentit është ndjekur nga afër edhe nga ambasadori i BE-së në Tiranë Ettore Sequi dhe kreu i prezencës së OSBE-së në Tiranë Eugen Wollfarth.

Menjëherë pas miratimit të ligjeve, dy ambasadorët, ai i BE-së Ettore Sequi dhe ambasadori i OSBE-së Eugen Wollfarth theksuan se sot është një ditë e rëndësishme për Shqipërinë pasi i hapet rruga reformave.

“Unë mendoj se të gjithë shqiptarët kanë të drejtën të jenë të lumtuar sot pasi ishte një hap konstruktiv që çon drejt një të ardhme më të mirë.  Ky ishte një hap konstuktiv pasi hap rrugën drejt reformave në këtë vit shumë të rëndësishëm, në këtë vit vendimtar për Shqipërinë.  Unë do të doja të përgëzoja ata që kanë hartuar këto ligje si dhe ata që i miratuan ato.  Integrimi do të thotë më shumë paqe më shumë prosperitet.  Unë besoj që ishte një ditë lehtësuese për të gjithë shqiptarët dhe shpresoj të jetë një hapje të një të ardhme për Shqipërinë” tha  ambasadori Wollfarth.

“Sapo po flisja me Brukselin  për miratimin e ligjeve. Ne mirëpresim miratimin e kësaj pakete dhe kjo është prova që vërteton atë që kam thënë gjatë inagurimit të një projekti.  Unë kam thënë që shqiptarët i kanë të gjitha mundësitë dhe vullnetin e mirë për të punuar në të mirë të vendit. Që do të thotë që miratimi i këtyre ligjeve është i rëndësishëm por është edhe prova që vërteton se palët mund të bashkëpunojnë me njërit tjetrin kur kjo është në të mirë të vendit. Unë mendoj që është një ditë e rëndësishme pasi është miratuar kjo paketë” theksoi ambasadori Sequi.

I pyetur se çfarë mendimi ka që tre ligjet do të hyjnë në fuqi në vjeshtë, ambasadori Sequi theksoi se “unë mendoj se parlamenti është sovran dhe sot u duk që të gjithë ishin dakort me atë që u miratua”.

I pyetur nëse duhet të përfshihej në seancën e sotme plenare edhe votimi i vendeve vakante në KQZ, ambasadori Sequi u shpreh se: “Unë mendoj se Shqipëria i ka të gjithë mundësitë dhe kapacitet që të punojë për të arritur rezultate dhe miratimi i këtyre ligjeve e vërteton këtë gjë. Por dëshiroj të përsëris një gjë që është shumë e rëndësishme.  Zgjedhjet e mira janë një test për fuksioninim e institucioneve demokratike”.

Në takimin e tij elektoral me banorët e Kavajës, lideri socialist Rama premtoi, se ndryshimi që do shoqërojë fitoren, do të jetë i shumëfishtë, në të gjitha planet dhe për të gjithë kavajasit. Rama sulmoi dhe kryeministrin Berisha për hipokrizinë e takimeve të tij dhe skenave të inskenuara me gjasme peshkatarë, që e pyesin nëse do kapin peshk apo nuk do kapin.

“Unë jam i bindur që me fitoren e 23 qershorit dhe me mbështetjen që do të marrë qyteti i Kavajës nga qeveria në Tiranë, ky transformim do të jetë i shumëfishtë në të gjitha planet dhe për të gjithë kavajasit. Ju i keni parë besoj këto kënde fjale që ne organizojmë. Nuk janë si ato të Saliut, i cili merr nga ata nëpunësit që bëjnë sikur janë peshkatarë dhe e pyesin a do kapim peshk a s’do kapim peshk. Qëllimi ynë është të bashkëbisedojmë”,- deklaroi Rama.

Ai iu përgjigj në vazhdim dhe shumë pyetjeve që preknin aktualitetin ekonomik dhe politik. Në lidhje me punësimin e të rinjve Rama deklaroi se do të ketë një fokusim në specializim profesional, sepse tregu nuk ka nevojë vetëm për juristë, por ka nevojë për të gjithë profesionet.

“T’i japim mundësi të gjithë të rinjve që e meritojnë dhe dëshirojnë të vazhdojnë universitetin që të shkojnë në universitet nga ana tjetër t’u japim mundësi të tjerëve që të fitojnë një zanat me shkollën profesionale. Me atë zanat të mund të hapin një biznes të vogël, të futen në një kompani, të ndërtojnë jetën e tyre me punë të ndershme dhe të fitojnë lekë me atë punë. Ndërkohë atyre të rinjve që sot e kanë mbaruar shkollën e mesme dhe janë pa punë ne do t’u ofrojmë kushte të trajnimit profesional në mënyrë që të aftësohen në një zanat të caktuar. Sepse sot në Shqipëri kemi numrin më të madh të juristëve për kilometër katror në botë. Edhe këtu kushedi sa juristë kemi tani prezent. Po nuk kemi hidraulikë, nuk kemi elektricistë, nuk kemi teknikë ndërtimi, nuk kemi teknikë bujqësie, nuk kemi teknikë peshkimi, zanatçinj”, -tha Rama

I pyetur në lidhje me politikat e arsimit Rama nënvizoi se PS, ka një program të veçantë për të ndërtuar korpusin e të rinjve, të rinjtë që duan të kontribuojnë në jetën e vendit, në jetën sociale, në jetën komunitare, që duan të përfshihen në shërbime sociale dhe në shërbime komunitare. Rama tha se Kryetari i Bashkisë së Kavajës në bashkëpunim me deputetin përkatës, do bëjnë gjithçka për t’i pasuruar jetën rinisë së Kavajës.

Në lidhje me politikat e punësimit të gruas Rama u shpreh, duke e venë theksin tek ruajtja e barazisë gjinore në punësim dhe dhënies përparësi të saj. Ai ritheksoi premtimin për hapjen e 300 mijë vendeve të punës.

I pyetur për çështjet e shëndetësisë, lideri opozitar u përgjigj duke premtuar, se do hiqet taksa e ilaçeve do të bëhet zero me synimin që të ulet çmimi dhe  nuk do të lejojë asnjë ilaç në Shqipëri, që të shitet më shtrenjtë se, sa atje ku blihet. Rama ritheksoi edhe njëherë përpara qytetarëve të Kavajës, se shërbimi shëndetësor do të jetë falas.

Për sa u përket projekteve konkrete, që prekin qytetin e Kavajës, Rama dekalroi se është një projekt i ri për sheshin e Kavajës, si edhe projekti për xhaminë e qytetit. Në lidhje me politikat mbi invaliditetin socialisti Rama tha se do të bëhet një regjistrim shumë i saktë dhe do të fillohet të ndërtohet një mbështetje për personat me aftësi të kufizuar duke u munduar po ashtu, që të përfshihen edhe në administratë me vend pune të veçanta për to.

Lideri Rama deklaroi gjithashtu nga Kavaja në lidhje me legalizimet, se do ta drejtojë personalisht këtë proces, që të mos mbetet më një çështje elektorale por të zgjidhet përfundimisht.

Një pyetje tjetër që prekte sistemin hekurudhor, Rama iu përgjigj se PS ka një ide tjetër që është pjesë e programit për bashkëpunim rajonal :

“Hekurudha mund të rindërtohet vetëm mbi bazën e një plani të gjithë rajonit, që të bashkohen bashkë Kosova, Mali i zi, Kroacia, Shqipëria, Bosnja dhe të paraqesin një plan dhe një projekt në BE dhe kjo të financohet edhe nga BE. Ne kemi besim se me një plan të mirë zhvillimi rajonal kjo mund të fillojë të financohet”,- deklaroi Rama.

Kryeministri Berisha përshëndeti sot punimet e Konferencës rajonale me temë “Sfidat e Sigurisë Detare në Adriatik dhe Jon”, e cila po zhvillohet në Tiranë, organizuar nga Qendra Kombëtare e Sigurisë dheMbrojtjes (QKSM) në bashkëpunim me ambasadën e Shteteve të Bashkuara të Amerikës në Tiranë.

Kryeministri Berisha përshëndeti organizatorët për zhvillimin e kësaj konference për një çështje shumë të rëndësishme, si dhe u shpreh se Shqipëria përpiqet në mënyrën më serioze për një luftë me tolerancë zero ndaj dhunimit të ligjit në ujërat e saj territoriale. “Ky rajon, – tha Kryeministri, – ka potenciale të jashtëzakonshme, por në qoftë se e vështron, ky është rajoni ku mungojnë më shumë se në çdo rajon tjetër projektet e mëdha evropiane. Konsolidimi i konceptit do të bindë vendimmarrësit se zhvillimi i këtij rajoni është interesi jetik më i mirë i të gjitha rajoneve të tjera të Evropës, pasi këtu potencialet janë ndoshta më të mëdha se kudo, por këto janë për t’u shfrytëzuar dhe për t’u zhvilluar”.

Në këtë konferencë merrnin pjesë dhe përshëndetën ambasadori i SHBA-ve në Tiranë, z. Aleksandër Arvizu, Presidenti i Fondacionit “Alcide De Gasperi” dhe President i Shoqërisë Italiane për Organizatat Ndërkombëtare z. Franko Frattini, ministri i Mbrojtjes së Maqedonisë, i Kosovës, përfaqësues të lartë të Ministrisë së Mbrojtjes së Greqisë, Bosnje-Hercegovinës, Malit të Zi, Kroacisë, si dhe të ftuar të tjerë.