Qarku i Kukësit po vihet në vëmendjen e mediave, pas denoncimit të LSI-së, në lidhje me një serë aktesh dhune dhe terrori elektoral.

Forcat policore kanë bastisur shtëpinë e Kreut të LSI-së në Fshatin Crnalevë – Komuna Shishtavec, z. Eshref Islami, pa pasur një mandat dhe duke e shoqëruar për në Komisariat, ku është mbajtur i izoluar për 4 orë.

Po në të njëjtën mënyre, ndërsa Ministri i Brendshëm, dhe kandidat për deputet i PD-së, Flamur Noka vijonte takimet e tij elektorale, është telefonuar Kryetari i LSI dhe Këshilltar në Komunën Topojan z. Rrustem Ahmeti dhe i është kërkuar të paraqitet në Drejtorinë e Policisë, pa asnjë lloj arsyeje.

E njëjta metodë terrori, është aplikuar dhe ndaj Kandidatin për Deputet të LSI në Has, z. Pëllumb Bardhoshi dhe të afërmeve të tij, ku forca speciale dhe efektivë të policisë së shtetit, kanë zbarkuar në mënyrë të dhunshme në Lagjen Bardhosh të Fshatit Qarr në Rrethin e Krumës duke hyrë në shtëpitë e anëtarëve dhe mbështetësve të LSI, të të afërmve të kandidatit, duke bërë bastisje dhe kontroll pa mandat përkatës.

Në të njëjtën mënyrë është ndaluar dhe shoferi i z. Bardhosh në Komisariatin e Hasit pas ndërhyrjes së rreth 30 efektivëve të policisë dhe të forcave speciale. Përgjigja e autoriteteve ndaj pyetjes, se përse është ndaluar, ka qenë se është dhënë urdhër nga lart.

LSI deklaroi publikisht, se personat përgjegjës do të vihen përpara ligjit, duke paralajmëruar direkt për këto ngjarje Ministrin e Brendshëm të Partisë Demokratike, Flamur Nokën.

« Keta lloj terrorucësh nuk trembin dot as pulat jo me hasianët, kuksianët dhe tropojanët, të cilët nuk kanë pyetur ndonjëherë për dhunën e Sali Berishës », tha LSI gjatë Deklaratës për shtyp.

LSI ka kontaktuar me zyrën e OSBE-ODIHR, Prezencën e BE në Tiranë, Ambasadën Amerikane dhe do të ndërmarrë të gjithë hapat e nevojshëm për ndalimin e kësaj dhune shqetësuese elektorale.

“Shteti i pas datës 23, do t’i qepet këmba këmbës të gjithë këtyre policëve, shiksave, forcave speciale që janë vënë në shërbim të kësaj dhune zgjedhore të Partisë Demokratike, deri sa të vendoset drejtësia dhe të japin llogari para ligjit për çdo akt terrori që po kryejnë. E themi këtë jo për hakmarrje politike, por si qëndrim politik për drejtësi”,- ka deklaruar LSI.

PS ka bërë publike 40 emrat e Drejtuesve të Lartë të Policisë së Shtetit, të cilët do të përballen me drejtësinë pas 23 qershorit.

“40 emrat e parë të drejtuesve dhe efektivave të Policise së Shtetit, që sipas informacioneve tona janë përfshirë në makinerinë e manipulimit të votës dhe fushatës së partisë në pushtet, pas 23 qershorit, do përballen me drejtësinë”, ka deklaruar Tahiri.

“Ju qe jeni përfshirë aktivisht në makinerinë e manipulimit të Saliut të pashpresë, pas 23 qershorit, mos u habisni kur ligji të trokasë në derën tuaj. Dhe besojeni që sot, nesër, nuk do ketë as amnisti, as falje dhe as harresë. 

Mbajeni mend që sot, se ndihma për Saliun e pashpresë, do i’u kthehet mbrapsht me braktisje kur të jeni përballë forcës së ligjit. Dhe Saliu nuk do jetë aty t’ju ndihmojë më. 

Ju që sot doni t’i dilni për zot Saliut duke shkelur ligjin, të jeni të bindur se nesër para forcës së ligjit, nuk do iu dalë njeri për zot”. 

Lista e drejtuesve të përfshirë në fushatën e PD-së:

1. Gezim Gj./ Drejtoria Tiranë

2. Bujar A./ Drejtues- Drejtoria e Policisë

3. Kujtim M./ Shef Kuadri- Drejtoria Tiranë

4. Xhavid C./ Burime Njerëzore- Drejtoria Tiranë

5. Ramiz B./ Seksioni Anti Korrupsion- Drejtoria Tiranë

6. Astrit L./ Shërbimi i Kontrollit të Brendshëm, Tiranë

7. Gazmend H./ Drejtues Komisariati

8. Nazmi Sh./ Drejtues Komisariati

9. Rakip H./ Drejtues Komisariati

10. Benet K./ Shef Sektori- Drejtoria Tiranë

11. Henigert M./ Shef Krimesh- Komisariati Tiranë

12. Pellumb N./ Drejtoria e Kufirit, Tiranë

13. Arjan H./ Krimi Ekonomik, Tiranë

14. Ervin D./ Shef Seksioni- Drejtoria Tiranë

15. Sokol S./ Drejtoria Tiranë

16. Granit Sh./ Drejtoria Tiranë

17. Agron B./ Drejtoria Tiranë

18. Fred Sh./ Drejtoria Tiranë

19. Him M./ Shef Rendi

20. Ilir Z./ Shef Qarkullimi

21. Altin M./ Oficer, Drejtoria Operacionale Tiranë

22. Hulian Sh./ Agjent Vëzhgimi

23. Durim S./ Agjent Vëzhgimi

24. Fatmir A./ Agjent Vëzhgimi

25. Bekim S./ Agjent Vëzhgimi

26. Gjergji M./ Agjent Vëzhgimi

27. Bardhi N./ Agjent Vëzhgimi

28. Ervin M./ Agjent Vëzhgimi

29. Gers L./ Agjent Vëzhgimi

30. Altin M./ Oficer, Reparti Renea

31. Osman L./ Oficer, FNSH

32. Mirbi B./ Inspektor, Komisariati Tiranë

33. Skender Gj./ Patrullë

34. Gjin Gj./ Seksioni i Ruajtjes së Objekteve

35. Osman F./ Oficer Komisariati Tiranë

36. Fatos M./ Agjent Krimesh, Komisariati Tiranë

37. Ylmi S./ Agjent Krimesh, Komisariati Tiranë

38. Besim N./ Agjent Krimi Ekonomik, Tiranë

39. Agron B., Komandant, Patrulla Tiranë

40. Florenc H., Inspektoriati Bashkia Tiranë

Partia Socialiste nëpërmjet deputetit të saj Sajmir Tahiri, ka denoncuar tentativat për manipulimin e votës dhe shndërrimin e institucioneve të shtetit në reparte militantësh për zgjedhjet. Ai konfirmoi edhe njëherë përpara publikut, se do të çohen përpara drejtësisë të gjithë ato, që do të shkelin ligjin për thesin e votave të familjes. Ai denoncoi faktin se, Administrata Publike, Policia e Shtetit, dhe Garda e Republikës janë kthyer në reparte militantësh, ndërsa disa drejtues të policisë së shtetit, janë kthyer në hajdut ordiner që kërcënojnë vjedhjen e votave.

“Ne inkurajojmë të gjithë qytetarët të denoncojnë çdo sipërmarrje që ka për qëllim manipulimin e votës. Nga mbledhja e kartave të identitetit deri të ofertat për para e ushqime, nga kërkesa për tu paraqitur ne seksionin e PD deri të detyrimi për të marrë pjesë në mitingjet e Saliut.  Çdo denoncim, pranë strukturave të PS, përfaqësuesve të PS, kandidatëve të PS, do trajtohet si konfidencial dhe me maksimumin e seriozitetit. Gjithashtu, kemi vënë dhe 2 numra në dispozicion për të mbledhur denoncimet e qytetarëve: 0682929292 (SMS) dhe 044801050 (TEL).

Ne jemi të vendosur të mos lejojmë të deformohet qoftë dhe një votë, sic jemi të bindur të merremi gjatë aq sa për të çuar para drejtësisë të gjithë ata që kanë marrë guximin të shkelin ligjin për thesin e votave të familjes.

Administrata Publike është kthyer ne seksion partie, ca nga detyrimi për ti kthyer mbrapsht shpërblimin politik partisë që i punësoi padrejtësisht, ca nga detyrimi për të mbuluar me punë partie zullumet e korrupsionit që kanë bërë gjatë këtyre viteve dhe ca të tjerë të detyruar nga kërcënimi me rrogën e bukën e gojës”,- tha Tahiri.

Tahiri denoncoi edhe faktin që institucionet shtetërore të sigurisë si Policia e Shtetit dhe Garda e Republikës, janë kthyer në reparte militantësh, duke u shndërruar në kamzhik për mbështetësit e PS apo hajdut ordiner që kërcënojnë njerëz për të mbledhur kartat e identitetit.

Ambasadori i BE-së në Tiranë Ettore Sequi, pas një vizite në KQZ, është deklaruar në të njëjtën vijë me prononcimet e Përfaqësueses së Lartë në BE, Ashton dhe Komisionerit për Zgjerimin në BE, Fyle se, është shumë e rëndësishme që KQZ të jetë funksionale duke e plotësuar atë. Ai theksoi se disa vendime në KQZ duhet të merren me 5 vota, çka aktualisht këto vendime po merren jo me një shumicë të cilësuar, siç e kërkon edhe ligji në fuqi.

“Ka disa vendime që duhet të merren me maxhorancë prej 5 votash. Politikanët ta bëjnë KQZ plotësisht operacionale dhe ta plotësojnë atë. Ashtu si e ka thënë edhe baronesha Ashton dhe komisioneri Fule duhet të jetë një zgjidhje e pranueshme për të gjithë, për mendimin tim nuk është kurrë tepër vonë, për të siguruar që KQZ është plotësisht e formuar,  kjo është çështje e lidhur ngushtësisht me besimin që kanë zgjedhësit në proces”- tha Sequi.

Sequi ritheksoi të njëjtin mesazh, që Ashton, Fyle dhe Reeker kanë deklaruar, se këto zgjedhje janë test për institucionet demokratike të vendit, çka nënkuptohet, se ato janë nën kuadrin e plotësimit të kriterit politik  të Kopenhagenit. Sequi konfirmoi edhe njëherë se procesi po monitorohet nga afër.

“Ata duhet të sigurohen të ndodhin dy gjëra: që së pari zgjedhësit shqiptarë të kenë besim te procesi, ta pranojnë rezultatin dhe të kenë respekt për rezultatin. Ndaj të njëjtin mendim me Reeker, se ne si BE jemi në dakordësi të plotë me SHBA për procesin zgjedhor dhe zgjedhjet. Kjo është tepër e rëndësishme, pasi zgjedhjet janë të rëndësishme për institucionet demokratike të vendit, janë test për të, për ecurinë apo progresin drejt BE. Mesazhi është votoni, shprehni qartë detyrimin dhe të drejtën tuaj. Ne po e monitorojmë procesin nga shumë afër, ashtu si do e shihni edhe në ditët në vijim”- tha Sequi.

Partia Socialiste, po ngre një padi kundër kryetares së KQZ-së, Lefterie Lleshi dhe administratës zgjedhore. Padia ngrihet mbi bazën ligjore të “shpërdorimit të fondeve publike dhe cënimin e interesave të ligjshme të shtetit dhe shtetasve me veprime dhe mosveprime që kanë shkaktuar pasojën e paligjshme të mosrealizimit të projektit SEV dhe dëmit ekonomik të shkaktuar”.

“Ajo që KQZ provoi ishte një vonesë dymujore për një, dy apo tri faqe specifikime teknike, e thënë ndryshe, dy muaj për të vonuar dhe për të dështuar procesin dhe sigurisht jo me kokën e tyre. Sot vërtetojmë dyshimin se qeveria në asnjë moment nuk ka dashur të realizohet ky projekt dhe nëpërmjet institucionit vegël, që është KQZ-ja, po i jep goditjen e fundit projektit SEV. Përfundimisht zonja kryetare, në këtë dështim të orkestruar KQZ është para të gjithëve ligjërisht përgjegjëse për shpërdorimin e fondeve publike dhe cenimin e interesave të ligjshme të shtetit dhe shtetasve me veprime dhe mosveprime që kanë shkaktuar pasojën e paligjshme të mosrealizimit të projektit SEV dhe dëmit ekonomik të shkaktuar”, tha përfaqësuesi ligjor i Partisë Socialiste Genci Gjonçaj.