Presidenti Nishani ka dhënë një mesazh, një ditë para hapjes së votimeve në mbarë vendin. Ai ka theksuar se vota është shumë e rëndësishme dhe se duhet votuar për Shqipërinë. Nishani bëri thirrje gjithashtu që të shkojnë sa më shumë të rinj në votime.

MESAZHI I NISHANIT 
Të dashur dhe të nderuar bashkëqytetarë,

Nesër do të votojmë.

Pra do të kryejmë aktin më të natyrshëm në një shoqëri të lirë.

Që është veprimi politik, qytetar, shoqëror, më i rëndësishëm, që përmban në vetvete, thelbin e Demokracisë.

Si të tillë, kjo ditë dhe ky akt, kërkojnë prej të gjithëve ne, përqendrim, seriozitet, përgjegjshmëri, për gjithçka që ka lidhje me këto votime.

Të votosh provon se di të jesh i përgjegjshëm për fatet e tua, di ta përdorësh Lirinë, për vete dhe për të tjerët, për të tashmen dhe të ardhmen.

Të mos votosh, është pasivitet i pafalshëm që nuk justifikohet nga asgjë.

Të mos harrojmë për asnjë çast rëndësinë e jashtëzakonshme që ka dita e nesërme lidhur me punët, problemet, perspektivat e brendshme.

Të vlerësojmë si duhet rëndësinë që votimet e nesërme kanë lidhur me marrëdhëniet tejet të rëndësishme të vendit me botën, me të cilat liria, begatia, fatet tona të tashme dhe të ardhshme janë ngushtësisht të lidhura.

Të votojmë duke respektuar në përgjithësi rendin, veçanërisht procedurat e votimit, vetë ne si zgjedhës së pari, pastaj autoritetet e ngarkuara me zbatimin e atyre procedurave.

Të bëjmë kujdes për një sjellje sa më qytetare gjatë ditës së votimit.

Të votojmë me bindjen se të tjerët që votojnë parti të ndryshme, votojnë ndryshe sepse mendojnë në mënyra të ndryshme, por së brendshmi jemi të gjithë të njëjtë dhe dallimi se për cilën parti apo individ votojmë, nuk është dallim që na ndan, por dallim që na bashkon.

Të kuptojmë si duhet gjënë kryesore; Se partitë dhe ideologjitë për të cilat votojmë janë disa, por Shqipëria dhe e ardhmja e saj janë një.

Të mundësojmë sa më tepër të rinj të votojnë, posaçërisht ata që votojnë për herë të parë…që dita e nesërme të jetë një ditë e bukur.

Votim të mbarë!

Denoncim tjetër vjen kundër forcave të policisë të cilat akuzohen, se po ushtrojnë presion ndaj forcave opozitare. Pas Kukësit opozita ka denoncuar aktet e ushtruara nga ana e policisë në Berat. Me urdhër të kandidatit të PD-së për deputet, po shoqërohen për në polici pa asnjë lloj motivi dhe pa pasur mandate arresti forcat opozitare të LSI-së dhe PS-së.

Deputeti i LSI-së Nasip Naço ka bërë gati kallëzimin për Prokurorinë, ndërkohë që ka lajmëruar se, dosja me abuzimet përkatëse do të dërgohet edhe në zyrat e OSBE-së.

Opozita ka denoncuar ditët e fundit presionet e forcave policore, sidomos në qarkun e Kukësit, ku nën akuzë për këto akte ndalimi, shoqërimi për në polici dhe bastisje shtëpish të opozitarëve, është vënë Ministri i Brendshëm Flamur Noka. Ndërkohë që po në Kukes, nën këtë klimë ka deklaruar dorëheqjen Shefi i Policisë, i gjendur nën presione të forta nga SHKB.

Në një Koferencë të përbashkët për shtyp paradite, kreu i opozitës Edi Rama së bashku me Kreun e LSI-së Ilir Meta i ka bërë thirrje Berishës të tërheqë forcat policore nga sulmet e tyre dhe të pranojë kryerjen e zgjedhjeve të lira dhe të ndershme.

Si rrallë ndonjëherë në terren ditën e dielë do të gjenden 9 mijë vëzhgues, kur rreth 400 persona i përkasin vetëm OSBE/ODHIR-it. Në terren në funksionin e vëzhguesve do të gjenden edhe stafet e ambasadave të vendeve të ndryshme përfshirë edhe atë amerikane.

Lëvizje këto që dëshmojnë për vënien në dyshim të kryerjes sipas standardeve demokratike të zgjedhjeve të lira dhe të ndershme.

Podesta Grup’ e cila lobon në Uashington për llogari të Qeverisë shqiptare, e paguar deri më tani mbi 1 milion euro nga paratë e takspaguesve shqiptarë, ka sjellë si përfaqësuese të saj një ish-zyrtare të lartë të Departamentit Amerikan të Shtetit.

Top Channel ka zbuluar se Bay Fang e cila ka punuar që prej vitit 2011 deri në Maj të 2013-ës si zëvendësasistente në byronë e Europës dhe Euroazinë ka mbërritur në Tiranë 1 javë më parë.

Lajmin e punësimit të saj prej ‘Podesta Grup’ i ka kushtuar një shkrim të veçantë revista amerikane “Foreign Policy” me titull “Podesta Grup rrëmben zëvendës asistentet e Departamentit të Shtetit”.

Nga artikulli mësohet se Fang e ka lënë Departamentin Amerikan në fund të muajt Maj dhe ka nisur punën më datën 3 Qershor për ‘Podesta Grup’.

Dhe menjëherë disa ditë më pas ajo dërgohet me urgjencë në Shqipëri, në një kohë kur kishte nisur fushata elektorale dhe marrëdhëniet mes Kryeministrit Berisha dhe kryediplomatit amerikan Arvizu kanë hyrë në një klimë të acartë.

Ardhja e saj në Tiranë ngre një sërë pikëpyetjesh për Bay Fang dhe vetë Departamentin Amerikan të Shtetit si ish-punëdhënës i Fang.

Detyra që ka marrë Fang nga punëdhënësi i ri Toni Podesta është një konflikt interesi dhe në kundërshtim me ligjet amerikane për nëpunësit shtetërorë që lënë detyrat shtetërore.

Ky ligj njihet si “”one-year cooling-off period” (Një periudhë prej një viti ftohje).

Le t’i referohemi ligjit që thotë: “Një vit ndalese përfaqësimi, ndihme apo këshillim të qeverive apo  partive politike, të huaja në praktikat ndërkombëtare me qëllim influencimin e një vendimi të  marrë nga agjencitë e Departamentit Amerikan. Por nuk ka ndalesë në këshillimin e një korporate ndërkombëtare për qëllime komerciale”.

Ky kufizim, i ashtuquajturi  “një periudhë prej një viti ftohje” përgjithësisht kufizon kontaktet me agjencinë, duke përfshirë kontaktet, që lidhen me legjislacionin e politikave, vendimet e personelit, ose ndonjë çështje tjetër zyrtare.

Kjo është e specifikuar në ligjin 18 U.S.C. 207(d), ku është sanksionuar qartësisht  se i ashtuquajturi  “Një periudhë prej një viti ftohje”, përfshin ish-sekretarët amerikan të shtetit dhe të gjithë ish “punonjësit e nivelit të lartë”, ku padyshim kjo kategori përfshin edhe Bay Fang e cila ka punuar në një seksion që ka pasur nën mbikëqyrje edhe Shqipërinë në Departamentin e Shtetit, ndërsa tani punon në Shqipëri për një krah politik të angazhuar në një betejë zgjedhore.

Pikërisht për këtë konflikt të pastër interesi të Bay Fang, Top Channel i kërkoi një prononcim  disa ditë më parë zyrës së shtypit në Departamentin Amerikan përfshi Filip Riker, zëvendësndihmëssekretari i Shtetit për Evropën dhe Euroazinë, Jonathan More drejtor për Europën Qendrore dhe Jugore dhe ambasadorit Arvizu.

Deri tani Departamenti i Shtetit nuk i ështe përgjigjur interesimit të Top Channel, ndërsa në mënyrë jo zyrtare është thënë se kjo çështje po diskutohet.

Gjithashtu edhe vetë protagonistja e këtij lajmi Bay Fang ende si ka dhënë përgjigje kërkesës së Top Channel për një intervistë në lidhje me këtë çështje. Zonja Fang është parë në hotelet luksoze të Tiranes, ku ka vendosur kontakte me përfaqësues të misioneve të huaja të vëzhgimit si edhe me korrespondentët e shtypit ndërkombëtar, në kuadër të detyrës si përfaqësuese e Podestës.

Kush është Bay Fang?

Pas një karriere 11-vjeçare në gazetari si korrespondente e çështjeve diplomatike  e gazetës ‘Chicago Tribune’ gjatë luftërave në Afganistan dhe Irak ajo punësohet në vitin 2009 nga DASH si këshilltare komunikimi në Afganistanin jugor.

Më pas ajo kthehet në Uashington ku punon për byronë e Euro-Azisë e cila mbulon edhe Shqipërinë. / Top Channel/

Ambasada amerikane ka njoftuar sërish qytetarët e vet të bëjnë kujdes, se mund të ketë dhunë gjatë zgjedhjeve. Ato paralajmërohen të mos i afrohen qëndrave të votimit pasi mund të ketë grumbullime, të shmangin protestat, tubimet, apo grupime të çdo lloji.

“Zgjedhjet parlamentare për Shqipërinë, do të mbahen ditën e diel, më 23 qershor. Më shumë se 5 mijë qendra votimi do të qëndrojnë të hapura nga ora 7:00 deri në orën 19:00. Numërimi do të nisë menjëherë pas mbylljes së votimit në 89 qendra të numrit të votave. Me këtë rast, njoftojmë dhe kujtojmë, shtetasit amerikanë, që të qëndrojnë larg tubimeve, organizimeve, apo mitingjeve partiake, pasi në këtë kohë ato kanë një shans të madh të kthehen në gjeneratorë dhune. Ne u kujtojmë shtetasve amerikanë në Shqipëri, se edhe tubimet paqësore rrezikojnë të përshkallëzojnë në dhunë. Ndërkohë që zgjedhjet mund të jenë të qeta, incidentet sporadike dhe të izoluara që kanë ndodhur në të shkuarën, përbëjnë rrezik sërish. Shtetasit amerikanë duhet të jenë vigjilent, të qëndrojnë larg qendrave të votimit apo numërimit, pasi ekziston mundësia që të ketë grupime në afërsi të tyre. Ju bëjmë thirrje edhe njëherë, të shmangni çdo protestë, tubim, takim elektoral apo grupime të çdo lloji. Ju këshillojmë që të ndiqni të rejat më të fundit për t’u informuar mi gjendjen dhe mjedisin përreth. Mos hezitoni të informoheni përmes mediave”, thuhet në njoftimin e ambasadës amerikane.

Bllokohet pika e Kapshticës dhe Kakavijës nga pala shqiptare, duke penguar kalimin e emigrantëve, që po vijnë në Shqipëri për të votuar. Partia Socialiste po denoncon bllokimin e pikave kufitare të cilat sipas saj, po bëhen qëllimisht për bllokimin e prurjes së votuesve.

Deklarohet se prishja e fibrave optike, ka bërë që sistemi TIMS të mos funksionojë duke penguar hyrjen e qytetarëve shqiptarë në territor.

Ditët në vazhdim kanë shënuar një hyrje të konsiderueshme të emigrantëve shqiptarë, të cilët pritet të votojnë në zgjedhjet e së dielës.