Hiqet gardhi rrethues i Kryeministrisë, njerëzit mund të kalojnë lirisht pranë saj

By

-

Një staf punëtorësh ka punuar sot paradite, për heqjen e gardhit që rrethonte Kryeministrinë. Një gardh i vendosur prej kohësh dhe nuk dihet se kë ruante dhe ndaj kujt e ruante, është hequr sot, siç duket pas një vendimi që ka ardhur nga Kabineti Rama.

Dje, pas mbledhjes së parë, Kabineti Rama vendosi me dyer të mbyllura shfuqizimin e ligjit për importin e mbetjeve urbane, vendosjen e kodit të etikës, dhe vendosjen e fotos së Ismail Qemalit në të gjitha zyrat shtetërore.

Stafi punonjës është marrë dje edhe me sistemimin e kabinetit qeveritar, ku duket qarte që ngjyrat dhe kompozimi i tavolinës ka ndryshuar duke marrë simbole të tjera.

Takim rajonal dy ditor i 4 Presidentëve të Ballkanit, në Durrës

By

Albania Plus

-

Takimi rajonal dy ditor i presidentëve të katër vendeve të Ballkanit, Shqipërisë, Maqedonisë, Kosovës e Malit të Zi, do të nisë sot punimet në qytetin e Durrësit.

Ky takim, do të zhvillohet në kuadrin e nismës së ish-Presidentit të Republikës së Shqipërisë, z. Bamir Topi, në frymën e takimeve të përvitshme jozyrtare të katër vendeve të rajonit.

Takimi i parë është zhvilluar në Vlorë më 23-24 qershor 2009, vijoi në Prizren më 26-27 qershor 2010, më tej në Ohër më 11-12 korrik 2011, dhe takimi më i fundit u mbajt në Budva, më 4-5 dhjetor 2012.

Ndër të tjera, synimi i këtyre takimeve është gjetja dhe shfrytëzimi i mëtejshëm i fushave me interes të përbashkët që çojnë drejt forcimit të marrëdhënieve të fqinjësisë së mirë dhe nxitjes së bashkëpunimit rajonal midis vendeve tona. Ky bashkëpunim është një mekanizëm thelbësor që ndikon pozitivisht në përmbushjen e aspiratës se përbashkët eurointegruese të vendeve tona.

Këto takime dëshmojnë për lidhjet e ngushta midis vendeve tona dhe për kontributin personal të Presidentëve për konsolidimin e tyre dhe për nxitjen e përmbushjes së objektivave tona strategjike.

Në një komunikim të Presidencës së Shqipërisë, shprehet edhe dëshira që bashkëpunimi rajonal të shkojë përtej shprehjes së vullnetit politik të fqinjësisë së mirë dhe të marrë kuptim nëpërmjet përpjekjeve për krijimin e një infrastrukture të përbashkët rajonale, kapërcimin e barrierave historiko-politike, lëvizjes së lirë të njerëzve, rritjes së shkëmbimeve, njohjes më mirë të kulturës, traditave e zakoneve të popujve tanë dhe angazhimit të përbashkët në ndryshimin e imazhit të rajonit, për ta bërë atë një treg tërheqës e konkurrues, dhe të gatshëm për t’u bërë denjësisht pjesë e familjes evropiane.

Tematika kryesore, rreth së cilës do të diskutohet në këtë Samit të pestë të radhës është: “Përqasje për shfrytëzimin praktik të mundësive për bashkëpunim rajonal më efikas”.

Në këtë nivel të marrëdhënieve midis vendeve të rajonit tonë, merr një rëndësi shumë të madhe gjetja e qasjeve të reja për shfrytëzimin e potencialeve të bashkëpunimit, dhe, veçanërisht, konkretizimi i shpejtë i tyre në praktikë.

Obama në mbrojtje të marrëveshjes me Rusinë

By

Albania Plus

-

Presidenti Barak Obama thotë se marrëveshja amerikano-ruse përmbush një objektiv kryesor amerikan lidhur me stoqet siriane të armëve kimike. Korrespondenti i Zërit të Amerikës Michael Bowman njofton nga Uashingtoni, se marrëveshja ka zgjuar reagime të përziera tek ligjvënësit amerikanë.

Në një intervistë në emisionin This Week with George Stephanopoulos të rrjetit ABC, Presidenti Obama tha se presioni amerikan ndaj Sirisë po jep rezultate.

“Si pasojë e presionit që kemi ushtruar gjatë javëve të fundit, kemi detyruar Sirinë që për herë të parë të pranojë se zotëron armë kimike dhe të bjerë dakord të nënshkruajë konventën për ndalimin e armëve kimike. Ndërkohë rusët, përkrahësit kryesorë të Sirisë, thonë se do t’i bëjnë presion Sirisë të pastrojë vendin nga të gjitha armët kimike. Përparimi i bërë gjatë këtyre dy javëve është për t’u shënuar”.

Dy senatorë republikanë, John McCain dhe Lindsey Graham, e kritikuan marrëveshjen duke thënë “Ky dokument kërkon që me vetëdije të përpiqemi të bindim veten në mënyrë që kjo marrëveshje të na duket si diçka më shumë se një qorrsokak diplomatik”.

“Mendoj se është një marrëveshje e dështuar”, tha Senatori McCain dje në programin Meet the Press të rrjetit NBC.

“Tani po varemi tek vullneti i mirë i rusëve nëse Presidenti Bashar al-Assad e shkel këtë marrëveshje”.

Javën e kaluar një numër i konsiderueshëm ligjvënësish deklaruan se nuk do të votonin për t’i dhënë Presidentit Obama autorizimin për të përdorur forcë ushtarake kundër Sirisë. Por nëse anëtarët e Kongresit duket se po ngurojnë për të përqafuar alternativën ushtarake, shumë prej tyre kanë shprehur dyshime të thella ndaj Rusisë. Megjithë këto rezerva, ligjvënësi republikan Michael McCaul thotë se nuk është kundër mundësisë që Presidenti rus Vladimir Putin të marrë një rol udhëheqës ndaj Sirisë. Zoti McCaul i bëri komentet në emisionin Fox News Sunday.

“Mendoj se Putini është në një pozitë unike krahasuar me Presidentin Obama dhe mund ta udhëheqë këtë proces me sukses si rezultat i ndikimit që ka mbi Assadin dhe Sirinë”.

Në fund të diskutimeve maratonë me homologun Sergei Lavror, Sekretari i Shtetit John Kerry theksoi nevojën për një verifikim absolut të zbatimit të marrëveshjes. Po në emisionin Fox News Sunday, ligjvënësi demokrat Chris Van Hollen tha se ishte i kënaqur:

“Ky rezultat nuk kishte si të bëhej më në përputhje me objektivin e presidentit. Në fakt, ne kemi bërë më shumë se thjesht dekurajimin e përdorimit të armëve kimike në të ardhmen, pasi kemi një plan për të shkatërruar stoqet e armëve kimike të Assadit.

Kur u pyet lidhur me mbështetjen e procesit tek Rusia, Presidenti Obama tha “Nuk jemi më në Luftë të Ftohtë. Nuk bëhet më fjalë për konkurrencën e dikurshme mes Shteteve të Bashkuara dhe Rusisë”./VOA/

Mama dhe bijë, bukuri konkurruese

By

Albania Plus

-

article-0-1BD7F44A000005DC-560_634x646 — Kendall Jenner

Modelja e njohur Kendall Jenner, ka postuar një foto në profilin e saj në Instagram, ku shfaqet rrezulluese me një palë rroba banje. Por, menjëherë pas kësaj edhe mamaja e saj Kris Jenner poston një foto po me rroba banjo, ku është vërtet vështirë të dallosh diferencën e moshës mes tyre. Siç duket, shprehja ‘Më e mirë e ëma se e bija’ , është pikërisht rasti në fjalë.

Alfred Peza i kthehet profesionit të vjetër, përshkruan si hyri Rama në zyrë

By

Albania Plus

-

Deputeti socialist Alfred Peza përshkruan në adresën e tij në Facebook përshtypjet e tij brenda godinës së kryeministrisë pak para nisjes së mbledhjes së parë të qeverisë.

“Isha pak para mbledhjes së parë të qeverisë, në zyrën e re të Edi Ramës. Në atë zyrë, nga ku sot doli pas 8 vjetësh si Kryeministër, Sali Berisha. Kryetari socialist m’u duk i emocionuar, kur nën vëzhgimin e pandërprerë të kamerave dhe bliceve të aparateve fotografike që punojnë për arkivën zyrtare, vizitoi pothuajse të gjitha ambientet e katit të dytë të godinës së qeverisë së Shqipërisë. Për një çast, Rama hodhi vështrimin nga ajo dritare, ku kamerat e kanë fiksuar Sali Berishën të hapi perden e zyrës së tij, gjatë protestës së 21 janarit, ku mbetën të vrarë 4 qytetarë të pafajshëm. Më pas, u rikthye nga korridori i gjatë nga ku erdhi, për të hyrë në sallën e re të mbledhjeve të qeverisë. Dera u mbyll dhe mbledhja filloi. Unë isha aty, kur sot filloi një etape e re e historisë së Shqipërisë”, shkruan Peza.

600 mijë nxënës ulen sot nëpër banka

By

Albania Plus

-

Rreth 600 mijë nxënës të arsimit 9-vjeçar dhe atij të mesëm do të ulen sot në bankat e shkollës për nisjen e vitit të ri shkollor. Pjesa më e madhe e tyre janë të regjistruar në arsimin bazë, ndërsa pjesa tjetër do të ndjekin shkollat e mesme të përgjithshme dhe ato profesionale. Ndërkohë që, për shkak të situatës politike në të cilën ndodhet vendi, Ministria e Arsimit dhe Shkencës nuk ka bërë të ditur numrin e saktë të të regjistruarve, numrin e fëmijëve që do të ulen për herë të parë në bankat e shkollës dhe të atyre që do të ndjekin arsimin bazë dhe të mesëm. Vitin e kaluar shkollor numëroheshin rreth 385 mijë nxënës në arsimin bazë dhe 146 mijë në atë të mesëm, ndërsa mbi 36 mijë fëmijë ishin regjistruar në klasën e parë. Mendohet që shifrat të jenë pak a shumë të njëjta me një vit më parë, ndërsa një vend të rëndësishëm zë edhe regjistrimi i fëmijëve të emigrantëve të kthyer.
Shkollat në Tiranë
Sa u takon shkollave të kryeqytetit, Bashkia e Tiranës ka njoftuar se ka krijuar të gjitha kushtet e nevojshme për mbarëvajtjen e mësimit. Konfirmimi është dhënë nga drejtori i Ndërmarrjes Nr.3, Alfons Muça. Sipas tij, për vitin shkollor 2013-2014 janë rikonstruktuar 4 shkolla, ndërsa është bërë restaurimi dhe mirëmbajtja e plotë e gjithë objekteve të tjera. “Me fillimin e vitit të ri shkollor 2013-2014, Bashkia e Tiranës ka marrë të gjitha masat për restaurimin, mirëmbajtjen dhe rikonstruksionin e një pjese të madhe të shkollave të Tiranës. Kemi mundësuar rikonstruksionin e 4 shkollave të kryeqytetit, nga të cilat, 2 kanë përfunduar dhe janë gati për fillimin e vitit të ri shkollor, ditën e nesërme, përkatësisht shkollat “Ibrahim Brahja” dhe “Murat Toptani”. Janë në proces rikonstruksioni dhe pritet të përfundojnë semestrin e dytë të vitit të ri shkollor shkolla “Niket Dardani” dhe “Eqerem Çabej”. Gjithashtu kemi bërë restaurimin dhe mirëmbajtjen e plotë të të gjitha objekteve shkollore që ka qyteti i Tiranës. Pritet që kushtet në të gjitha shkollat e Tiranës të jenë shumë më mirë se viti i kaluar”, – u shpreh Muça. Gjithashtu, ai ka reaguar edhe në lidhje me një raport të Autoritetit Shëndetësor Rajonal, në të cilin thuhej se 4 shkolla duhej të mbylleshin për shkak se nuk plotësonin kushtet higjieno-sanitare. Sipas Muçës, për këto shkolla janë realizuar të gjitha detyrat e lëna nga ASHR-ja. “Kemi pasur lidhje dhe kontakte të herëpashershme me të gjithë Autoritetin e Shëndetit Publik, kemi marrë masa, kemi bërë evidente dhe kemi realizuar të gjitha detyrat që ata kanë lënë. “Siri Kodra”, është një ndër ato shkolla që është përmendur nga Autoriteti i Shëndetit Publik, dhe është bërë restaurimi i plotë i saj. Të gjitha objektet shkollore, pa përjashtim, do të jenë në kushte shumë më të mira. Ju garantojmë se të gjitha shkollat e Tiranës dhe një pjesë që brenda semestrit të dytë do të futen në fazën tjetër të rikonstruksionit, do të jenë me parametra shumë bashkëkohorë”, – shpjegoi Muça.

Familjarët e Florije Pecit: Të zbardhet e vërteta për shtatzëninë

By

Albania Plus

-

Familjarët e Florije Pecit, studentes që mbijetoi nga aksidenti tragjik në maj të vitit të kaluar, kërkojnë nga drejtësia shqiptare që të zbardhet e vërteta e shtatzënisë së saj. Burime nga prokuroria bëjnë me dije se para disa ditësh, në dyert e këtij institucioni janë paraqitur të afërmit e 23-vjeçares, të cilët kanë kërkuar detaje të reja për hetimet në lidhje me këtë çështje. Të kontaktuar nga gazeta, familjarët e Florijes kanë pohuar se nuk kanë marrë asnjë të dhënë nga organi i akuzës.

“Kemi shkuar dhe kemi trokitur në dyert e prokurorisë, por aty na thanë se nuk ka asnjë të re për këtë çështje. Dosja ka shkuar në Austri dhe presim të dhënat që do vijnë që atje. Ne kërkojmë që drejtësia të zbardhë të vërtetën e asaj që i ndodhi motrës sonë”, pohojnë të afërmit e Florijes. Ndërkohë, ata pohojnë se 23-vjeçarja dhe vajza që ajo solli në jetë gëzojnë shëndet të plotë. Vetëm disa muaj më parë, pranë Prokurorisë së Përgjithshme mbërriti një kallëzim penal nga Gazmend Peci, vëllai i Florijes, një nga vajzat që i mbijetoi aksidentit të Himarës në maj të vitit të kaluar, e cila, për shkak të plagëve të marra u dërgua për kurim në Austri. Sipas këtij kallëzimi, gjatë kohës që Florija ka qenë në koma, me të është abuzuar seksualisht dhe ajo ka mbetur shtatzënë. “Unë që po ju shkruaj jam Gazmend Peci, vëllai i Florije Pecit. Unë dhe familjarët e mi jemi shumë të tronditur nga një ngjarje shumë e rëndë që ka ndodhur. Motra ime, në aksidentin e Qafës së Vioshës në Himarë pësoi dëmtime të rënda shëndetësore. Ajo u dërgua për mjekim në Austri, ku për më shumë se 55 ditë qëndroi në koma. Në 11 tetor motra jonë u kthye në Shqipëri dhe për shkak të shqetësimeve të shumta specialistët konkluduan se ajo është shtatzënë.

Konceptimi (ngjizja) i shtatzënisë ka ndodhur nga data 20 deri në 25 shtator 2012, periudhë në të cilën Florija ka qenë e shtruar në klinikën ‘Gmunderbergut Almunster’ në Austri, në periudhën e rehabilitimit. Motra ime Florije Peci është përdhunuar në kushtet e spitalit ku ka qenë për kurim. Me motrën time janë kryer marrëdhënie seksuale në kohën kur ajo ishte në gjendje të rëndë shëndetësore dhe kur nuk kishte mundësi të mbrohej”, citohej në kallëzimin e depozituar në prokurori.

Edi Rama nis sot vizitën dyditore në Bruksel

By

Albania Plus

-

Kryeministri Edi Rama pritet të nisë sot një vizitë dyditore në Bruksel. Ashtu siç edhe ishte paralajmëruar, ai do të shoqërohet nga ministri i Punëve të Jashtme, Ditmir Bushati dhe ministrja e Integrimit Evropian, Klajda Gjosha.

Rama do takohet si fillim me kreun e PE-së, Martin Schultz e më pas ai do të mbajë një fjalë në Komisionin e Jashtëm të PE.

Në vijim të vizitës, Rama dhe ministrat Bushati e Gjosha do të takohen me Presidentin e Këshillit të Evropës, Komisionit Evropian, me Sekretarin e Përgjithshëm të NATO-s, Anders Fogh Rasmusen dhe me Kryekomisionerin për Zgjerimin, Stefan Fyle.

QEVERIA E RE
Etapat nga votimi në kuvend deri tek mbledhja e parë e qeverisë…
E diele Ora 16:20- VOTIMI NË PARLAMENT
Qeveria e re mori dje votëbesimin nga deputetët në Kuvend, me 82 vota pro dhe 55 vota të opozitës kundër. Në votim mungoi ish-kryeministri Berisha
Ora 18:00 – BETIMI TE PRESIDENTI
Shumë pak pas votëbesimit nga Parlamenti, kryeministri Rama dhe ministrat bënë betimin tek Presidenti. Ata bënë edhe një foto të përbashkët me kreun e shtetit.
Ora 18:35-ECJA NË KËMBË
Pas rreth gjysmë ore me dekretet në duar, ministrat e rinj ecën në këmbë përgjatë bulevardit, për të shkuar në shkallët para Kryeministrisë.
Ora 18:40- FJALA PARA KRYEMINISTRISË
Fjalën e parë si kryeministër zyrtar, Rama e mbajti para selisë së Kryeministrisë, ku u prit nga një masë e madhe njerëzish,
mbështetës të PS-së.
Ora 18:47- QEVERIA HYN NË KRYEMINISTRI
Të udhëhequr nga kryeministri Edi Rama, ministrat kaluan përmes tapetit të kuq dhe hynë në mjediset e Kryeministrisë,
për të vijuar punën.
Ora 18:55 – FISHEKZJARRET E FESTIMET
Nisja e punës së qeverisë së re u shoqërua dje në mbrëmje me fishekzjarre. Menjëherë pas fjalës së Ramës, fishekzjarret mbushën qiellin në qendër të Tiranës.
Ora 19:05- MBLEDHJA E QEVERISË
Qeveria e re, “Rama”, nisi dje menjëherë nga puna. Pas një dite të lodhshme, Rama nuk mundi të mos mblidhte tashmë zyrtarisht kabinetin e tij.
Ora 20:00 -VENDIMET E QEVERISË
Qeveria e re vendosi dje të heqë foton e Presidentit në zyrat e shtetit dhe të verë atë të Ismail Qemalit, anulimin e importit të plehrave dhe u miratua Kodi i Etikës.
Ora 20:40 – TAHIRI TAKON BURGAJN
Ministri i Brendshëm Saimir Tahiri thirri dje urgjentisht Drejtorin e Përgjithshëm të Policisë, Hysni Burgajn, për të folur për situatën e krimit në vend.
Ora 20:45- AKTIVITET E MINISTRAVE
Nuk ka kaluar asnjë orë nga betimi në Presidencë dhe ministrat e rinj nisën publikimin e axhendave. Kështu, sot pritet që Veliaj të marrë detyrën nga Spiro Ksera.

Rama fillon punën duke mbajtur premtimet, ndalohet importi i mbetjeve urbane

By

Albania Plus

-

Mblidhet për herë të parë pas betimit në Presidencë, kabineti Rama. Gjatë mbledhjes, e cila ka zgjatur rreth 30 minuta, me dyer të mbyllura, janë miratuar tre vendimet e para.

Vendimi kryesor dhe më i rëndësishëm, i premtuar nga Rama edhe gjatë fushatës, ka qenë ndalimi i importit të mbetjeve urbane. Vendimi i dytë, ka të bëjë me miratimin e kodit të etikës, që do të thotë se për daljen e informacionit do të ketë një organizim dhe qendërzim të tij, duke shmangur daljen kontradiktore të zërave të ndryshëm nga qeveria.

Ndërsa vendimi i tretë, ka të bëjë me atë çka Kryeministri Rama e ka deklaruar edhe gjatë fushatës se zyrat e shtetit nuk do të jenë më të detyruara të mbajnë foton e Presidentit, por ajo do të zëvendësohet me një figurë statike me vlera historike, siç është ajo e Ismail Qemalit, kreut të qeverisë së parë të shtetit shqiptar dhe babai i Pavarësisë.

Sequi: Punë të mbarë qeverisë së re!

By

Albania Plus

-

Ambasadori i Bashkimit Europian në vendin tonë, Ettore Sequi uroi qeverinë e re për marrjen e detyrës dhe theksoi se institucionet ndërkombëtare do ta mbështesin kabinetin e ri në reformat që do të ndërmarrin.

“Ne do mbështesim qeverinë e re në detyrat e saj. Do të jem dy ditë në Bruksel. Edhe kryeministri i ri Edi Rama ku do të marrë, në vizitën që nis nesër në Bruksel. Ndaj punë të mbarë!” uroi në shqip Sequi.