Në një deklaratë për mediat Kryetari i Partisë Demokratike, Lulëzim Basha ka deklaruar se Rama duhet të kuptojë se opozita nuk duhet urryer. Ndonëse vjen paksa ironike kjo këshillë se, si duhet të trajtohet opozita dhe kjo pikërisht nga ish Ministri i Brendshëm në detyre, kur opozitarët u vranë nga selia e Kryeministrise në mes të bulevardit.

Më poshtë keni deklaratën e plotë të Lulëzim Bashës:

“Kryeministri Rama mori në Bruksel, mesazhin e qartë për të bashkëpunuar ngushtë me opozitën e vendit të tij.

Në emër të Partisë Demokratike dua të falënderoj miqtë dhe partnerët e Shqipërisë në Bashkimin Europian për këtë mesazh kuptimplotë dhe për vendosmërinë e tyre konstante në mbështetje të aspiratave europiane të popullit shqiptar.

Me këtë rast dua të siguroj përfaqësuesit më të lartë të Bashkimit Europian në Bruksel, sikurse kemi siguruar qytetarët dhe Kuvendin e Shqipërisë këto ditë, se opozita e re shqiptare nuk do të jetë në asnjë moment pengesa dhe problemi i integrimit të vendit në BE, se do të jemi promotorë, siç kemi qenë në qeveri, se do të votojmë çdo ligj dhe akt shkon në përmbushje të kritereve të integrimit.

Ndërkaq sot, Partia Demokratike kërkon nga zoti Rama që ai ta lexojë drejt  dhe të  reflektojë pa humbur kohë  rreth  këtij mesazhi thelbësor për fatin e  integrimit të  Shqipërisë  në Europë  dhe për rolin përbashkues që duhet të luajë Tirana zyrtare në  marrëdhëniet me faktoret politikë shqiptarë në Kosovë, Maqedoni  dhe në trevat e tjera.

Ta lexojë jo si një mesazh rutinë por para së gjithash si një këshillë ndihmuese dhe qortuese për startin plot qëndrime përçarëse e konfliktuale të zotit Rama në detyrën e  tij si kryetar i këshillit të Ministrave.

Zoti Rama i shpalli luftë opozitës në daljen e tij të parë në foltoren e Kuvendit, duke provokuar largimin e  saj nga seanca.

Një ditë më pas provokoi braktisjen e Kuvendit të Kosovës nga opozita e Kosovës me qëndrimet e tij ideologjike përçarëse të stampës së vjetër ndaj figurës së ndritur të arkitektit të pavarësisë së Kosovës, Presidentit Ibrahim Rugova.

Në harkun e njëzet e katër orëve provokoi braktisje nga dy opozita kombëtare, një rekord që nuk e ka asnjë kryeministër.

Në vend që të nxirrte mësime përgjatë debatit parlamentar, zoti Rama e thelloi më tej luftëshpalljen ndaj opozitës me deklaratën e tij paprecedent se opozita nuk ka parë akoma se ç’është dhuna, deklaratë nga e cila nuk është tërhequr ende.

Në vrapin e tij drejt godinës së qeverisë, akoma pa u tharë boja e firmës së betimit para Presidentit të Republikës, nxitoi të hiqte portretin e tij në shkelje flagrante dhe përçarëse të Kushtetutës, etikës, dhe bonsensit.

Kjo nuk është rruga për të shkuar në Europë.

Shqiptarët nuk harrojnë se Edi Rama bllokoi integrimin e vendit si opozitar kundër qeverisë.

Me veprimet konfliktuale dhe përçarëse që po kryen ai po rrezikon të bllokojë  përsëri, kësaj radhe si qeveritar kundër opozitës.”

Presidenti i Komisionit Europian Manuel Barroso zhvilloi një takim me kryeministrin shqiptar Edi Rama në Bruksel ku kanë diskutuar mbi detyrat e mëtejshme që e presin Shqipërinë në rrugën drejt integrimit evropian.

Në një konferencë të përbashkët për shtyp me kryeministrin Rama, Barroso shprehu disa vlerësime për punën e bërë deri tani nga ana shqiptare ndërsa theksoi se Komisioni Europian pret nga politika shqiptare bashkëpunim, dialog, konsensus. Barroso vlerësoi mbarëvajtjen e zgjedhjeve parlamentare të 23 Qershorit në Shqipëri, ndërsa drejtoi apelet për Shqipërinë.

“E ardhmja e Shqipërisë është në BE. Shqipëria është e përkushtuar për të përmbushur statusin e vendit kandidat. Me kryeministrin Rama diskutuam të ardhmen e Shqipërisë në Bashkimin Europian”, theksoi Barroso.

“Zjedhjet shkuan vërtet mirë, shkuan në mënyrën më të mirë të mundshme. Eshtë shumë e nevojshme përkushtimi i shqiptarëve gjithashtu dhe dialogu është shumë i rëndësishëm për suksesin e Shqipërisë, gjithashtu është e nevojshme një bashkëpunim i përbashkët, përkushtimi në disa cështje kryesore: Bashkëpunimi mes opozitës dhe mazhorancës. Por ka dhe një cështje që kërkon një vëmendje të veçantë, nuk ka kohë për të humbur reformat duhet të vazhdojnë, dhe rezultatet e tyre të ndihen tek qytetarët shqiptarë”, tha Barroso.

Kryeministri i vendit Edi Rama, duke iu përgjigjur interesit të gazetarëve shqiptarë në lidhje me mundësinë e përmbushjes së 12 kritereve të cilat do ti hapnin dritën jeshile Shqipërisë drejt BE-së, vlerësoi se statusi kandidat është i mundur dhe qeveria do të bëjë më të mirën edhe me mbështetjen e KE-së, por dhe sportin e opozitës shqiptare.

“Procesi integrimit nuk po fillon tani, por ka një kohë të gjatë që ka filluar ne duhet të bëjmë punën tonë dhe objektivat tona janë të arritshme, dhe kemi besim se do arrijmë objektivat tona. Ne besojmë se duhet të punojmë fort për të arritur qëllimin tonë. Do të negociojmë dhe jemi të bindur se vendi jonë do të arrijë një nivel të ri. Ne do të bëjmë më të mirën me mbështetjen e KE-së, por dhe sportin e opozitës dhe Shqipërisë dhe shpresojmë të dëgjojmë lajmet të mira”, u shpreh Rama.

Në axhendën e tij të ngjeshur në Bruksel ku si rrallë herë kreu i vendit, brenda dy ditësh duhet të takojë gjithë krerët e BE-së, Edi Rama duket se po merr një mesazh të fuqishëm qeverisës.

Në takimin e radhës me Sekretarin e Pergjithshëm të NATO-s Rasmussen, Rama ka deklaruar se, Shqipëria ka dhënë një kontribut të rëndësishëm për sigurinë dhe se duhet të punojmë më ngushtë, bashkë, për të përballuar sfidat e përbashkëta.

“Zoti kryeministër, jam i bindur se mund të mbështetemi tek ju”,- ka deklaruar Rasmussen.

Rama ka konfirmuar edhe njëherë angazhimin e Shqipërisë përballë sfidave të NATO-s.

“Është një nder i madh që pritem nga sekretari Rasmussen. Shqipëria do vijojë të jetë vend anëtar i kësaj organizate. Neve na është dashur shumë kohë për t’u bërë pjesë e NATO-s. Kemi marrë përsipër të gjitha përgjegjësitë për të kryer këtë detyre dhe do të bëjmë më të mirën. Do të bëjmë më të mirën për të ruajtur reputacionin e kësaj organizate”, ka thënë Rama.

Partia Demokratike ka bërë një Deklaratë për shtyp, nëpërmjet zëdhënëses së grupit parlamentar të PD-së, Jorida Tabaku. Partia Demokratike shprehet e shqetësuar në këtë deklaratë për miratimin e kodit etik, ku informacioni do të dalë nëpërmjet një zyre qëndrore dhe jo nëpërmjet shumë zërave të ndryshëm.

Ndonëse nuk kanë pasur asnjë efekt në reagim, shfuqizimi, që Kabineti Rama i bëri dje importit të mbetjeve urbane, të miratuar nga ish kreu i PD-së Berisha, kodi i etikës duket se ka shqetësuar PD-në.

“PD shpreh shqetësim për miratimin dhe zbatimin e menjëhershëm të të ashtuquajturit kod të etikës, që është kodi i heshtjes, qeveria Rama po krijon sistem të mbyllur ku çdo gjë duhet të kaloje nëpër filtrat e kodit, aktet flasin qartë, në ditën e parë të punës qeveria shpalli si të bunkerizohet, si ta prodhoje imazhin e saj, jo nëpërmjet hapjes. Pse gjithë ky nxitim për të dalë nga rrezja e transparencës. Ky është kodi i propagandës së vjetër me mjetet e reja, censure e rrezikshme”- tha Tabaku.