Partia Demokratike ka mbledhur sot grupin e saj parlamentar. Kreu i PD-së Lulzim Basha deklaroi se Kryeministri i vendit po sillet si satrap oriental dhe se, PD do të depozitojë sot në Kuvend kërkesën për një referendum popullor në lidhje me armët kimike.

“Prej më shumë se një jave, shqiptarët po përjetojnë ankthin e lajmit të mbërritjes së armëve kimike në Shqipëri. Shqiptarët duan të dinë të vërtetën nga kryeministri, që është investuar personalisht dhe mesa shihet i vetëm fare në këtë çështje. Ne kemi kërkuar transparencë për këtë çështje, por Rama zgjodhi rrugën e tij të preferuar: heshtjen arrogante ndaj zërit të qytetarëve. Ne i bëmë thirrje publike: Mos bëj strucin përballë shqiptarëve dhe partnerëve ndërkombëtarë. Ai u përgjigj, por foli me gjuhën e mashtrimit. Qytetarët nuk e besuan. Edi Rama është dy herë gënjeshtar, edhe  ndaj publikut shqiptar, edhe me ata që u ka krijuar iluzionin se drejton një vend ku nuk ka opozitë. Rama e nis me mashtrime dhe shpreson t’ia dalë me mashtrime. Ne nuk do ta lejojmë.

Tani është radha jonë t’i bëjmë me dije këtij kryeministri që ka vendosur të sillet sipas standardit të një satrapi oriental. PD do të depozitojë sot në Kuvend kërkesën për mbajtjen e një referendumi popullor për armët kimike. Duhet të jenë shqiptarët ata që do të vendosin për Shqipërinë e nesërme.

Duam të garantojmë çdo shqiptar se për ne vullneti dhe zëri juaj janë gjëja më e shtrenjtë. Jemi të vendosur që së bashku të bëhemi një barrierë e pakaërcyeshme për papërgjegjshmërinë e Edi Ramës.

Ne do të depozitojmë edhe kërkesën për mocion me debat me kryeministrin që ua bëri ujë gjakun shqiptarëve”, tha Basha.

Para fillimit të seancës parlamentare kreu i Kuvendit Ilir Meta dha një deklaratë të shkurtër për mediat duke theksuar se nuk ka asnjë vendim qeveritar në lidhje me këtë pikë dhe se politikanë që s’janë çarmatosur vetë po e instrumentalizojnë këtë çështje.

“Mendoj se ka mjaft spekulim dhe është një çështje që po instrumentalizohet nga disa politikanë, që akoma nuk janë çarmatosur vetë. Politikanë që nuk kanë bërë asnjë reflektim për dëmet që i kanë shkaktuar mjedisit në të kaluarën. Nuk ka asnjë vendim dhe nuk mund të ketë të tillë jashtë syve dhe vëmendjes së shqiptarëve”, tha Meta.

Qeveria ka miratuar dje, gjatë mbledhjes së radhës, disa ndryshime në ligjin për sigurimet shoqërore. Ndryshimet konsistojnë në caktimin e Ministrisë së Mirëqenies Sociale dhe Rinisë, si autoritet kompetent për monitorimin dhe kontrollin e veprimtarisë së Institutit të Sigurimeve Shoqërore.

PROJEKTLIGJ:

1. Për disa ndryshime në ligjin nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar.

Ndryshimet që do t’i  propozohen Kuvendit për miratim me këtë projektligj, synojnë përcaktimin e Ministrisë së Mirëqenies Sociale dhe Rinisë, si autoritet kompetent për monitorimin dhe kontrollin e veprimtarisë së Institutit të Sigurimeve Shoqërore, në kuadër të miratimit, si një nga fushat e përgjegjësisë të kësaj ministrie, të zhvillimit të politikave dhe legjislacionit në lidhje me sigurimet shoqërore. Gjatë mbledhjes janë marrë dhe vendime të tjera që kanë të bëjnë me përcaktimin e formës të dokumenteve të gjendjes civile; emërime të ndryshme, etj. VENDIME:

1. Për një ndryshim në vendimin nr.332, datë 17.10.2010, të Këshillit të Ministrave, “Për përcaktimin e formës, elementeve përbërëse, mënyrës së mbajtjes e afatit të përdorimit të dokumenteve bazë, që mbahen dhe lëshohen nga Shërbimi i Gjendjes Civile”, të ndryshuar.

Vendimi ka si qëllim reflektimin në aktet nënligjore të ndryshimeve të fundit në ligjin nr.10129, datë 11.5.2009, “Për gjendjen civile”. Konkretisht të modelit të procesverbalit që mbahet gjatë procedurës për ndryshimin e emrit dhe mbiemrit të shtetasve.

2. Për lejimin e ekspozimit në Kosovë të 14 veprave të artit në pikturë, me vlera unikale, në kuadër të realizimit të ekspozitës “Imazhi gjuhësor i piktorëve të hershëm tradicionalë në viset tona”.

Vendimi ka si qëllim lejimin e ekspozimit në Kosovë, të 14 pikturave, në ekspozitën “Imazhi gjuhësor i piktorëve të hershëm tradicionalë në viset tona”, që do të qëndrojë e hapur nga data 19 nëntor deri më 20 dhjetor 2013.

3. Për emërimin në detyrë të drejtorit të Cirkut Kombëtar të z.Kujtim Dumi. 4. Për emërimin në detyrë të drejtorit të Përgjithshëm të Qendrës Kombëtare të Kulturës për Fëmijë dhe Teatrin e Kukullave të Znj. Monika Lubonja.

5. Për shfuqizimin e vendimit nr.983, datë 10.11.2010, të Këshillit të Ministrave, “Për përcaktimin e kompetencave të Institutit të Monumenteve të Kulturës “Gani Strazimiri” dhe riorganizimin e disa institucioneve të trashëgimisë kulturore”.

 Vendimi synon shfuqizimin e vendimit nr.983 datë 10.11.2010, të Këshillit të Ministrave, pasi Institutit të Monumenteve të Kulturës “Gani Strazimiri” i janë dhënë disa kompetenca në kundërshtim me ligjet materiale, për shkak të të cilave edhe struktura dhe organika e këtij  institucioni, nuk ka mundur dhe nuk mund të implementohet.

 6. Për lejimin e Ministrisë së Mbrojtjes për zhvillimin e procedurës së prokurimit, me objekt “Mirëmbajtje e sistemit të vëzhgimit të integruar të hapësirës detare”.

 Projekti ka për qëllim lejimin e zhvillimit të procedurës së prokurimit, me objekt “Mirëmbajtje e sistemit të vëzhgimit të integruar të hapësirës detare”, mosrealizimi i të cilës ka cënuar rëndë përmbushjen e misionit të Komandës së Forcës Detare.

Në një postim në Facebook Kryeministri Rama ka deklaruar se nuk do të ndërmarrë asnjë vendim që cënon jetën dhe të ardhmen e shqiptarëve.

“Duke kërkuar mirëkuptimin e të gjithëve, ashtu siç mirëkuptoj plotësisht të gjithë ata që ndihen të shqetësuar apo edhe ata që dalin në protestë, jo nga rruga e interesave politike, por nga rruga e interesit qytetar dhe atdhetar, sot ne mundet vetëm të themi me plot gojën se në asnjë rast dhe për asnjë arsye, ne nuk do të pranonim që të cënohej integriteti i vendit tonë, qoftë në aspektin jetik, qoftë në aspektin mjedisor, qoftë në aspektin e të ardhmes së vet.

Çdo vajzë dhe çdo djalë, nxënës apo student, që sot është përfshirë në këtë debat, duhet ta dijë se kurrë, unë vetë dhe kjo Qeveri nuk do të pranonte që, jo jeta, por vetë e ardhmja e tyre të vihej në diskutim me cenimin më të vogël. Çdo prind duhet ta dijë se kurrë, unë apo Qeveria nuk do të vendoseshim në asnjë lloj pozicioni që do të rrezikonte qoftë edhe një fije fëmijën apo familjen. Çdo gjyshe dhe gjysh, në këtë vend, duhet ta dijë se kurrë ne nuk do të thoshim një “Po” dhe kurrë unë nuk do të shkoja përballë publikut dhe përballë Parlamentit për të kërkuar “Po”-në e tyre të domosdoshme, pa pasur në dorë një plan të bazuar mbi një marrëveshje, që do të garantonte jo vetëm që të gjitha rreziqet e imagjinuara për shkak të një propagande, do të thosha të mbështetur në një tërësi të pavërtetash dhe me disa të vërteta që janë dhe të vërtetat tona, të kthehej në një problem.

Pra, është absolutisht e qartë që për ne, për mua, për Qeverinë, me patjetër, kontributi ynë dhe pozicionimi ynë i qartë krah për krahë Shteteve të Bashkuara është i lidhur me interesin e çdo shqiptari, të çdo familjeje shqiptare dhe të ardhmërisë së këtij vendi dhe të familjeve të këtij vendi në këtë vend. Çka do të thotë se “Po”-ja jonë do të mund të lidhet vetëm me një plan dhe me një marrëveshje, nga ku, të jetë e qartë për të gjithë, që Shqipëria do të dalë jo vetëm më kokën lart, por e fituar dhe edhe më e pastër seç është sot.” shkruan Rama.