Pas një investigimi disa-mujor, emisioni “Fiks-Fare” nisi nga mbrëmja e së martës transmetimin e një cikli emisionesh për denoncimin e korrupsionit në gjyqësor.

Historia e një familjeje, 6 anëtarët e të cilës u arrestuan gjatë një proteste për të drejtat elementare të mbijetesës, zbuloi hallkat e korrupsionit në kete sistem.

Investigimi i “Fiks-Fare” solli një zinxhir sekserësh, të cilët kërkojnë para në emër të gjyqtarëve dhe prokurorëve, duke sjellë me zë dhe figurë të vërtetën e funksionimit të sistemit të drejtësisë në vend.

Korrupsioni në drejtësi që i referohet shpesh politika, raportet ndërkombëtare e deri tek ambasadori i SHBA kur tha se në Shqipëri ka gjyqtarë që duhet të ishin pas hekurave, erdhi në serinë e denoncimeve të Fiks Fare i provuar me fakte reale.

“Unë jam banor i Fushë Arrëzit. Në muajin Prill më arrestuan gjashtë pjestarë të familjes në një mënyrë kriminale. Arsyeja e arrestimit ishte një protestë e realizuar për arsye se kompania “Beralt” na ka shkatërruar ekonomikisht, na ka bllokuar tokën, ujin, ndot ambientin e shumë të tjera, diçka për të cilën nuk na ka kompenuar kurrë”, denoncoi në mikrofonat e “Fiks-Fare” banori që nuk deshi të identifikohej me emër dhe fytyrë.

“Protesta u zhvillua në 15 prill 2013. Gjatë protestave u arrestova dhe unë. U lirova pas dy muajsh e gjysmë, kur më ndryshuan masën e sigurisë në arrest shtëpie. Bëra kërkesë dhe u lirova me detyrim paraqitje. Nuk kishte shanse të liroheshe pa paguar. Liria më kushtoi katër milionë lekë (të vjetra)”, vazhdoi denoncimin viktima e kësaj skeme gjigante të korrupsionit në drejtësi.

“Nga Prilli deri në Gusht mund të kem shkuar në gjykata 20 herë dhe nuk pranonin të më merrin kërkesën, pasi kërkonin lekë. Unë s’isha mësuar me këtë, gjykatësit përdorin sekserë. Paratë kërkoheshin për prokurorin e gjyqtarin, kërkonin jo më pak se 5,5 mln lekë për lirim. Unë detyrohem të marr borxh, më vonë nëse vazhdon kështu do të detyrohem të shes shpinë dhe rrugë tjerë s’ka sepse nëse s’paguajmë ata s’do të dalin nga burgu”, vazhdoi denoncimkin qytetari.

Të alarmuara nga ky denoncim, kamerat e “Fiks-Fare” mbërritën në vendngjarje, në Gjykatën e Rrethit Pukë, që pa shumë vështirësi mundën të takoheshin me sekserin. “Prokurori nuk ta qit djalin pa marrë kafen. Bën 6 milionë lekë. Prokurorët dhe gjyqtarët marrin në fillim kafet dhe më pas të mbarojnë punë”, thotë sekseri me zë dhe figurë përpara qytetarit.

Më pas, kamerat dokumentojnë oficerin e policisë gjyqësore, Hasan Allën, i cili ndërmjetëson lirimin pas pagimit të lekëve. Kamerat dokumentojnë takimin me avokatin Fariz Xhuxhi, i cili thotë: “Paguaj dhe për dhjetë ditë lirohet”. Ai del garant për të zgjidhur të gjithë situatën, ndërsa i pyetur nga qytetari se nëse ka rrezik që çështja të rihapet, Xhuxhi jep të sigurt se gjykatësi nuk do ta bëjë kurrë gjyqin.

“Unë do i them, në ta mban b…. liroje dhe merr lekët. Kështu funksionon, çështje interesi”, shton Xhuxhu, duke iu referuar gjyqtarit.

Në “Fiks-Fare”, në këtë emision të parë që hap një seri emisionesh që demaskojnë korrupsionin në drejtësi, dokumentohet pjesëmarrja në këtë skemë madhore edhe e kancelares e sekretares së gjykatës.

Sekretarja, nga ana e saj del garant që do të dorëzojë lekët gjykatësit dhe prokurorit, ndërsa kancelarja jep udhëzimet e duhura për mënyrën se si duhet të realizohet të gjitha veprimet. “Kam 21 vite që merrem me këtë punë, unë jam mafie”, thotë në një moment sekretarja.

Ngjarjet e transmetuara këtë të martë i përkasin shkallës së Parë të Gjyqësorit. Por, në ditët në vazhdim, investigimi i ”Fiks-Fare” do të tregojë se pazaret bëhen edhe në shkallët më të larta të gjyqesorit. / Top Channel/

Një raport i Organizatës Botërore të Shëndetësisë bën të ditur se ka një numër të madh në rritje të qytetarëve grekë që infektojnë veten qëllimisht me virusin HIV, në mënyrë që të përfitojnë ndihmën ekonomike që ofron shteti për këtë kategori.

OBSH-ja i publikon këto të dhëna alarmante pas hetimit të raportit mes rënies ekonomike dhe numrit të infektimeve me HIV. OBSH shkruan se rreth gjysma e infeksioneve të reja me HIV janë vetëshkaktuar duke bërë të mundur që njerëzit e infektuar të marrin nga shteti rreth 700 € në muaj, si dhe të përfitojnë pranimin më të shpejtë në programet e rehabilitimit të drogës.

Por, të martën, grupi pranë OBSH-së që ka realizuar raportin ka sqaruar se një gjë e tillë nuk është e vërtetë dhe se kemi të bëjmë me një gabim.

“Nuk ka të dhëna që njerëzit në Greqi apo diku tjetër në Evropë kanë infektuar veten me qëllim”, tha Martin Donoghoe, zëdhënës i OBSH-së. Ai ka shtuar se në raport kjo gjë është paraqitur si pasojë e një gabimi gjatë shkrimit

Në vijim të turit me përfaqësuesit e vendeve anëtare të Bashkimit Evropian, Ministrja e Integrimit Klajda Gjosha zhvilloi një sërë takimesh me zyrtarë të lartë të shtetit suedez. Siç bën të ditur zyra e shtypit e Ministrisë së Integrimit, çështjet në të cilat ministrja Gjosha e vuri theksin në këto takime ishin plotësimi i prioriteteve të lëna nga progres-raporti, përmirësimi i imazhit të Shqipërisë tek vendet anëtare si dhe progresi i bërë me reformat e ndërmarra muajit e fundit.

Fillimisht Ministrja Gjosha u prit nga Sekretari i Shtetit Frank Belfrage. Ai i shprehu ministres shqiptare, vlerësime për rolin stabilizues të Shqipërisë në Ballkan. Ministrja Gjosha, theksoi në fjalën e saj se shqiptarët janë një popull që e duan Bashkimin Evropian dhe se marrja e statusit të vendit kandidat do të ishte vetëm një hap i rëndësishëm përpara në procesin e integrimit të vendit. Gjithashtu u zhvillua një takim me Ministren e Çështjeve Evropiane të Suedisë, Eva Birgitta Ohlsson. Ministrja e Integrimit Evropian, Klajda Gjosha shprehu vendosmërinë e qeverisë për të çuar përpara reformat në vend dhe procesin e integrimit në tërësi. “Ne jemi të vendosur për të vazhduar me përmbushjen e prioriteteve , kyçe të cilat do ta drejtojnë Shqipërinë drejt Evropës”,- tha ministrja Gjosha.

Refuzimi që Shqipëria i bëri armëve kimike të Sirisë, me gjithë këmbënguljen amerikane, është komentuar si shenjë e pjekurisë politike nga eurodeputetët, të cilët u shprehen përgjithësisht në mbështetje të Këshillit të Evropës për t’i dhënë Shqipërisë statusin e vendit kandidat. Komiteti i Jashtëm në Parlamentin Evropian diskutoi draftrezolutën për Shqipërinë, përpiluar nga raportuesi i ri kroat, Nikola Vuljaniç, në të cilin u vërejtën sukseset e Shqipërisë, por edhe problemet. Ndër çështjet e shtruara si të pazgjidhura ishte edhe problemi i gjakmarrjes dhe ngujimit.

Ja disa prej diskutimeve të eurodeputetëve lidhur me draft-rezolutën për Shqipërinë:

Nikola Vuljaniç, raportues për Shqipërinë në PE: “Për mua ka dy qëllime, së pari për të ndihmuar vendin, duke mbështetur raport-progresin e Komisionit e duke ofruar arsye shtesë ndaj Këshillit për t’i dhënë Shqipërisë statusin kandidat. Arsyeja tjetër është stabiliteti rajonal e forcimi i pozicionit e politikës së Unionit që thotë se arritjet duhen respektuar e shpërblyer në rrugën e integrimit. E nuk ka dyshime për arritjet, pjekuria politike u dëshmua me refuzimin e shkatërrimit të armëve kimike siriane në Shqipëri. Me gjithë insistimin e SHBAve, qeveria shqipëtare dëgjoi popullin”.

Jelko Kacin, raportues për Serbinë, slloven: “Ajo çfarë na mungonte prej disa vitesh ishte një raportues proaktiv mbi Shqipërinë, pasi Shqipëria nuk mund të na paraqesë vetë një raport përsa kohë që ne nuk jemi veprues për të dorëzuar diçka, ndaj kjo është për t’u nënvizuar. Megjithëse erdhi shumë vonë, në fund të fundit u shënua një kontribut i madh për të mobilizuar dhe për të vërtetuar përpjekjet e Shqipërisë”. Ndërsa Këshillit i sugjerohet të shmang “vonesa të panevojshme” për dhënien e statusit kandidat në Dhjetor, Tiranës i kërkohet dialog politik dhe reforma të qëndrueshme për të siguruar pavarësinë e institucioneve, gjyqësorit, administratës e medias, krahas luftës kundër korrupsionit, krimit e trafiqeve.

Eduard Kukan, PPE, kreu delegacionit për Ballkan: “Në i bëjmë thirrje Këshillit të njoh progresin e vendit dhe t’i japë statusin kandidat pa vonesë të panevojshme. Por duhet kuptuar gjithashtu me këtë raport se progresi i arritur kërkon më tepër konsolidim e zbatim dhe për reformat e mbetura duhet përshpejtuar miratimi”.

Marije Cornelissen, eurodeputete hollandeze, Të gjelbrit: ” Kalimi i pushtetit pa dhunë, greva urie apo çfarëdolloj qoftë, është një gjë normale për t’u bërë dhe po kështu edhe kryerja e reformave të përcaktuara, ndaj nuk mendoj se është e drejtë që të bëjmë shumë lavdërime për këtë. Ne duhet të kujtojmë të shkuarën, e të jemi paksa të shqetësuar për të ardhmen e afërt. Kuvendi nuk nisi dhe aq në harmoni siç duhej, dhe unë do doja që Shqipëria të na tregonte dëshmi provash se është konsistente dhe vijon bashkëpunimi pozitiv mes partive”.

Nikola Vuljanic, raportues për Shqipërinë: “Në asnjë moment e në asnjë fjali, nuk dhashë idenë se përmirësimi erdhi me ndryshimin e qeverisë. Nuk ndodh asgjëkundi kështu, as në Shqipëri. Ajo që më shqetëson në mardhënien qeveri-opozitë është mungesa e plotë e dialogut dhe ky dialog duhet vendosur nëse duan të ecin para”.

Charles Tannock, britanik, konservator: ”Shqipëria është një anëtare e plotë e Konferencës së Organizatës Islamike, një gjë e pazakonshme për Ballkanin. E kjo shkakton ca dilema në politikën e jashtme, kurdo që t’i bashkohet Bashkimit Europian, për mënyrën se si aleatët votojnë në Kombet e Bashkuara”.

Marietje Schaake, ALDE, hollandeze: ”Dëgjojmë shumë njerëz në shoqëritë tona të thonë se Shqipëria nuk është gati për anëtarësim, çfarë është mëse e vërtetë dhe askush nuk e kundërshton, sepse mbeten shumë shqetësime: korrupsioni, krimi organizuar, diskriminimi, liria e medias e sundimi i ligjit. Ndaj besoj se është e rëndësishme të japim sinjal të qartë se ne presim Shqipërinë të vazhdojë reformat pozitive me statusin kandidat dhe se ka shumë hapa për t’u ndërmarrë e se BE do të ndihmojë Shqipërinë për të ecur përpara e për t’ia arritur”.

Knut Fleckenstein, eurodeputet gjerman, S&D: “Ajo që është më e rëndësishmja për këtë komitet, kur këtu kemi eurodeputetë gjermanë e hollandezë, është të dërgojmë mesazhe të qarta ndaj qeverive tona, se ne kemi mbërritur në pikën që mbështesim statusin kandidat dhe se Shqipëria e meriton këtë, shqipëtarët e kanë fituar këtë. Nëse bëjmë hap mbrapa, e kemi parë të ndodhë me serbët, ne do të humbisnim besimin e i dimë pasojat që do tëkishim atje. Ndaj duhet të jemi shumë të bindës ndaj qeverive të vendeve tona, zoti Posselt mund të më bashkohet, për të treguar se gjërat po shkojnë mirë”.

Marije Cornelissen, eurodeputete holandeze, Të gjelbrit: “Gjakmarrja është disi e rëndësishme në Shqipëri. Janë të paktën 10 mijë familje të prekura. Numri i viktimave të gjakmarrjes është rritur vitet e fundit, regjistrohen të paktën në 150 veta në vit. Shumë fëmijë djem janë të detyruar të rrinë brenda shtëpisë e të mos shkojnë në shkollë e të mos luajnë jashtë. Ka një makineri shteti për këtë, një komitet i ngritur prej 2005, ka një ligj, por në terren asgjë nuk ka ndryshuar dhe problemi qëndron tek përkeqësimi, në vend që të përmirësohet”.

Nikola Vuljanic, raportues për Shqipërinë: “Amendamentin për gjakmarrjen nuk e përfshiva në rezolutë pasi e njohim të gjithë këtë problem, por nuk mund të përfshihen shumë çështje në një raport e kjo mund të konsiderohej në dokumente të mëtejshme. Por e kuptoj se ky amendament kompromisi është pranuar e do të votohet, sipas proçedurës. Jam i lumtur që u përmend toleranca fetare. S’mund ta besoja kur shkova atje. E për habinë time, qeveria dhe opozita më konfirmuan se kështu ndodh e ata nuk i kushtojnë vëmendje fare, është një çështje private e njerëzve. E shkëlqyeshme, pasi nuk e kam parë në asnjë vend të Ballkanit, përfshirë Kroacinë. Për lojërat e fatit dhe krimin e organizuar, i vura një minus amendamentit pasi dëgjova aksionin pjesërisht të suksesshëm për të ndaluar kumarin e paligjshëm, por nuk ia dolën të kapin asnjë bos, asnjë kriminel, pasi dikush nga policia i kishte njoftuar përpara aksionit”. Përfaqësuesja e Komisionit Europian vlerësoi se gjatë periudhës shtator-nëntor, Shqipëria ka ndërmarrë reforma për sundimin e ligjit dhe veprime ndaj shërbimit të taksave e doganave, si dhe ka rritur efikasitetin për luftën kundër korrupsionit e krimit të organizuar, duke dëshmuar gadishmëri e vullnet politik për marrjen e statusit kandidat. Pavarësisht insistimit të raportuesit, votimi i rezolutës për Shqipërinë pritet të votohet nga Komiteti i Jashtëm më 5 Dhjetor, për t’u miratuar në seancë plenare 10 ditë përpara dhënies së vendimit nga Këshilli i BE-së. /Arta Tozaj – TCH/