Nëna shqiptare, nga Troy, Michigan, që ka marrë urdhër deportimi për 24 orë vendosi ta sfidojë autoritetin e emigracionit, duke thënë se nuk ka ndërmend të lëvizë nga shtëpia. Çile Preçetaj pritej të dëbohej dje në orën 10:30 të mëngjezit nga Metro Airport në Detroit, mirëpo, bashkëshorti i saj i tha gazetës lokale “Frë Press” se oficerët e emigracionit le të vijnë ta marrin po të duan me forcë në shtëpi. Le ta marrin nga duart e tre fëmijëve të vegjël që janë qytetarë amerikanë, sikur të ishte një kriminele e rrezikshme. “Kjo do t’i tregojë botës se me çfarë ‘kriminelësh të regjur’ po merret emigracioni”, tha ai. “Çfarë krimesh ka kryer? U përpoq në të gjitha mënyrat për të bashkëpunuar me këta njerëz”, tha i shoqi, Pjeter (Pete) Gojçeviç, i cili shtoi se gruaja e tij 40-vjeçare ka jetuar me ndershmëri dhe nuk ka kryer asnjë krim. “As edhe një gjobë për parkim, nuk ka marrë ndonjëherë”, tha Gojçeviç, që ka jetuar në SHBA për 40 vite.

Ai tregoi për vajzat që janë të tmerruara nga situata dhe duan të dinë se kur mund të kthehen në shkollë. Ai beson se gruaja e tij që hyri në SHBA në mënyrë të paligjshme, përpara 13 vitesh, duke ikur nga një ish-i fejuar abuzues dhe i dhunshëm, e ka fituar të drejtën të jetojë në këtë vend. Ajo kërkoi azil, por gjykatësi ia hodhi poshtë kërkesën në 2007. “Në eksperiencën time, nuk kam parë kurrë që të dëbohet një nënë me fëmijë. Asnjë nuk arrin ta besojë se kjo gjë do të ndodhë realisht”, -është shprehur avokati ligjor i shqiptares, Andrew Johnson, i cili duhet të shpëtojë në një kohë rekord klienten e tij nga dëbimi. Ndërsa bashkëshorti i saj, me origjinë jugosllave, Pjetero (Pete) Gojçeviç tha se po pret që të ndodhë ndonjë mrekulli që gruaja dhe fëmijët e tij të mos dëbohen nga Detroit-i, raporton “Detroit Free Press”.

Historia

40-vjeçarja shqiptare, Çile Preçetaj, ka lindur në vitin 1972 në Shqipëri. Në vitin 2000 ajo udhëtoi drejt Shteteve të Bashkuara të Amerikës, në mënyrë që t’i shpëtonte kështu abuzimit të të  fejuarit të saj, nga i cili kishte frikë se mos e rrëmbente dhe e shiste për prostitucion. Pas arratisjes nga Shqipëria, Preçetaj së bashku me disa shoqe të tjera, nëpërmjet Kanadasë, hyri ilegalisht në SHBA. Menjëherë pas arritjes në “tokën e premtuar”, ajo iu dorëzua autoriteteve amerikane dhe kërkoi strehim. Gjatë kohës që ajo jetonte në SHBA në mënyrë ilegale, Preçetaj u martua me një jugosllav, i cili ishte zhvendosur në SHBA 40 vjet më parë. Ajo ka tre fëmijë dhe që të tre kanë nënshtetësi amerikane. Pavarësisht kërkesës së saj për strehim, një gjyqtar që merrej me çështjet e emigracionit, e rrëzoi kërkesën e 40-vjeçares për strehim, duke argumentuar se asaj i mungonte besueshmëria dhe dyshohej se ajo ishte e përfshirë krime dhe prostitucion. Preçetaj nuk e mori të drejtën e strehimit, për shkak se “femrat e reja dhe të pashme nuk bëjnë pjesë në grupin e azilkërkuesve”.

Kështu në vitin 2008 gjykata e rrëzoi përfundimisht kërkesën e shqiptares për azil. Ndërkohë 40-vjeçarja shqiptare vazhdoi të jetonte në SHBA, dhe gjatë kësaj kohe ishte e detyruar që të paraqitej tek autoritetet e Detroit një herë në muaj. Ajo e dinte që do të vinte një ditë kur duhej të largohej, por nuk e dinte se cila do të ishte ajo ditë që do të sillte dëbimin e saj nga SHBA-të dhe ndarjen nga bashkëshorti. Të hënën Preçetaj mori urdhrin që brenda 24 orëve duhej të largohej nga Shtetet e Bashkuara të Amerikës dhe dje pritej që të kthehej në Shqipëri, për të jetuar me prindërit e saj të moshuar në një fshat në veri të vendit, bashkë me tre fëmijët e saj, por larg bashkëshortit. Burri i saj, Gojçeviç thotë se është i habitur për këtë vendim të qeverisë amerikane, pasi presidenti Barack Obama, ka thënë se nga SHBA-të duhet të largohen vetëm ata emigrantë, të cilët kanë histori kriminale dhe jo ata që kanë fëmijë me nënshtetësi amerikane, dhe për më tepër ata që janë të pastër dhe nuk kanë kryer asnjë vepër penale. “Lërini fëmijët të jetojnë dhe të rriten në një vend të cilin e njohin”, -i ka bërë apel qeverisë Gojçeviç.

Sot 73 minatorët e zonës D në Bulqizë, janë në ditën e 3-të të grevës së urisë.

Greva po zhvillohet në hyrje të minierës. Edhe pse kushtet me të cilat po përballen minatorët prej dy ditësh nuk janë aspak në favor të tyre, ata janë të vendosur që të vazhdojnë deri në fund derisa t’i jepet zgjidhje përfundimtare problemit të tyre.

Bëhet me dije se në vendin ku ndodhen grevistët nuk ka asnjë ambulancë apo mjek, që t’iu qëndrojë pranë pasi gjendja shëndetësorë e tyre është tepër kritike.

Pasi minatorë kanë kërkuar shkakun e bllokimit të punës së tyre, përfaqësuesit e policisë private u kanë shpjeguar që e gjithë kjo situatë ka ardhur si pasojë e një shkrese, që iu ka dhënë këtyre të fundit, kreu i Komisariatit të Bulqizës.

Ai ka thënë se minatorët nuk duhet të lejohen të punojnë në galeritë e nëntokës.

Ndërkaq, minatorët kanë zbritur nga autobusi dhe forcërisht kanë thyer dyert e garderobës, ku dhe po vazhdojnë grevën e urisë të vendosur për t’i dhënë zgjidhje përfundimtare problemit të tyre.

Ministri i Energjisë dhe Industrisë, Damian Gjiknuri, priti dje në një takim përfaqësuesit e sindikatës së minatorëve, Kol Nikollaj dhe Taf Koleci.

Përfaqësuesit e minatorëve dhe ministri, diskutuan për gjetjen e një zgjidhjeje, për problemin e pagesave në përputhje me ligjin dhe në respekt të detyrimeve kontraktuare që kompanitë kanë ndaj punëmarrësve. Ministri deklaroi se të gjitha subjektet do të jenë të detyruara të trajtojnë me pagesë punëtorët, në zbatim të Kodit të Punës dhe detyrimeve që lindin prej kontratave.

Në një deklaratë për mediat, Ministria e Energjetikës deklaroi se në zbatim të Kodit të Punës, minatorët duhet të përfitojnë pagat e tyre edhe gjatë kësaj periudhe. Ndërkohë, greva e urisë ka hyrë në ditën e tretë të saj.

Minatorët grevistë, thonë se nuk do të largohen nga greva pa u plotësuar kërkesat e tyre.

Në respektim të Urdhrit të Ministrisë së Energjisë dhe Industrisë, shoqëria Albchrome i ka kërkuar Tur-Alb-Krom shpk:

 Të pezullojë menjëherë aktivitetin minerar në Zonën D   Të marrë masa për eliminimin e mangësive të konstatuara nga kontrollet e RISHMI dhe AKBN, mangësi që janë përgjegjësi e drejtpërdrejt e Tur-Alb-Krom dhe që kanë sjellë pezullimin e Zonës D.