E ftuar në emisionin “La vita in diretta” të “Rai Uno”-s (me temë: “Çfarë vendi është sot Shqipëria”), ministrja e Mbrojtjes Mimi Kodheli u gjend përpara pyetjesh që rikthyen prapa në kohë, vetëm për të treguar se sa shumë ka ndryshuar, që prej atëherë, situata në vendin tonë.

Mbërritja e anijes “Vlora”, të stërmbushur me emigrantë, në portin e Barit; pamjet e njerëzve që hidheshin në ujë, 8 gushtin e vitit 1991; ishin reminishencë e vuatjes së shqiptarëve, por edhe e kritikave të drejtuara qeverisë italiane nga autoritetet vendore, për atë që moderatori i emisionit, Franco di Mare, e quan një spektakël të padenjë për një vend të civilizuar.

“Të tilla pamje, – thotë ai, – më shkaktojnë emocion të madh, sepse unë isha në mol atë ditë, duke raportuar. Besoj se e njëjta gjë ndodh edhe me ju”. “Nuk mund të ndodhte ndryshe”, ishte përgjigja e zonjës Kodheli, që gjendet në Itali për një vizitë zyrtare.

Mimi Kodheli: Duket sikur ka kaluar një shekull nga ai moment.

Di Mare: Shumë gjëra kanë ndryshuar në vendin tuaj dhe në tonin përgjatë kësaj kohe.

Mimi Kodheli: Kanë ndryshuar shumë gjëra për të gjithë ne. 20 vjet nuk janë pak. Megjithatë, me siguri, për Shqipërinë ka qenë një moment vendimtar, ai i hapjes së portave, jo vetëm të zemrave, por të gjitha atyre, që vendi ynë i kishte të mbyllura, për ta hedhur vështrimin nga e ardhmja, një e ardhme që quhej Europë.

Di Mare: Nuk është e lehtë të shohësh një grua në pozicionin komandues, jo vetëm në vendin tuaj, por edhe tonin, për të qenë të sinqertë. Sidomos kur drejton një dikaster kaq delikat, si ai i Mbrojtjes. Besoj se në NATO janë 4 gra ministre të Mbrojtjes. Si shpjegohet ky ndryshim kaq i madh në Shqipëri.

Mimi Kodheli: Kjo do të thotë se qeveria e re ka sjellë shumë emancipim. Ne jemi 6 gra ministre dhe posti i Mbrojtjes është pak më i veçantë, sepse nuk është diçka që e shoh çdo ditë, për të thënë të drejtën. Italia nuk ka pasur akoma një të tillë, uroj që një ditë të takoj ndonjë kolege italiane, besoj do të ndodhë, me siguri.

Di Mare: Ndonjë ditë, mbase, do të kemi edhe kryeministre femër, ndoshta ndodh edhe në Shqipëri.

Mimi Kodheli: Asnjëherë nuk i dihet. Unë besoj se ky do të jetë shekulli i grave, që janë një forcë e madhe e shoqërisë.

Di Mare: Më vjen mirë ta dëgjoj këtë nga një grua, që vjen prej një vendi ku roli i gruas; të themi kështu; nuk është marrë shumë në konsideratë, – vazhdon Di Mare. – E shumë shpejt mbërrihet te konstatimi, që çdokush mund të nxirrte që në fillim të intervistës. Zonja ministre, po ku e keni mësuar kaq mirë italishten?

Mimi Kodheli: E kam mësuar prej kohësh, kam dëgjuar tim atë që fliste italishten, unë këtu kam kryer doktoraturën, kam jetuar këtu…

Përmendet, ndër të tjera, edhe marrëveshja dypalëshe për bllokimin e trafikimit të paligjshëm të klandestinëve, për të cilin Kodheli shpjegon se funksionon vërtet dhe është një nga arsyet e ndalesës së saj në Itali.

Mimi Kodheli: Trafiqet, jo vetëm ato njerëzore, por të çdo lloji tjetër, mbeten një problem si për Italinë, ashtu dhe për Shqipërinë, – thotë ministrja. – Për këtë arsye, duhet të punojmë së bashku e të ruajmë unitetin, për të treguar se që të dy vendet janë anëtarë të NATO-s, janë vende europiane, nga ku nuk duhet të ketë kalime të paligjshme.

Çështja e klandestinëve, sipas saj, shkon përtej probleme të sigurisë, sepse është një problem social shumë më i gjerë, që nuk prek vetëm Shqipërinë e Italinë, por në përgjithësi të gjithë Europën. Në fund, ministrja dërgon një përshëndetje për të gjithë shqiptarët, që punojnë e jetojnë në Itali.

Mimi Kodheli: I përshëndes me dashuri dhe i ftoj të vijnë në Shqipëri. Këtë qeveri, ne e kemi quajtur “Shqipëria e gjeneratës tjetër” dhe shpresoj të jetë vërtet e tillë.