Ndaj sulmit ushtarak në Siri ka reaguar në një konferencë për shtyp dhe kryeministri italian Paolo Gentiloni.
“Italia nuk ka marrë pjesë në këtë sulm ushtarak,” deklaroi ai.
“Nuk është momenti për përshkallëzim, është momenti për të vënë në siguri armët kimike. Është momenti i diplomacisë dhe punës për të garantuar stabilitet e demokraci në Siri, pas 7 viteve të një konflikti të tmerrshëm. Sulmi i kësaj nate synoi të godiste armët kimike e nuk mundet e nuk duhet të përdoret si fillimi i një përshkallëzim.”
Kryeministri italian ka nënvizuar faktin se Italia nuk ka marr pjesë në këtë sulm.
“Italia , – tha ai – ofron ndihmë logjistike SHBA me bazat ushtarake në territorin italian, por në këtë rast kemi kërkuar dhe kemi insituar që nga këto baza të mos niset asnjë sulm për të goditur Sirinë.”
Ndaj sulmit usharak të aleatëve në Siri ka reaguar dhe politika italiane.
Lideri i Partisë Lidhja , Matteo Salvini është shprehur kundër duke e konsideruar një çmenduri, që duhet ndaluar. “Ende po kërkojnë armët kimike të Sadamit, akoma po paguajmë për çmenduritë e luftës në Libi, e dikush me këmbëzën e lehtë insiston me raketa inteligjente duke ndihmuar veç terroristët islamikë që pothuajse janë mundur. Është çmenduri , ndaluni”, shkruan ai në rrjetet sociale.
Po kundër këtij sulmi është shprehur dhe liderja e Partisë Fratelli D’Italia, Giorgia Meloni e cila e quan “një sulm të kryer jashtë normave të së drejtës ndërkombëtare e pa një vendim të OKB mbi përdorimin e dyshuar të armëve kimike. Mesa duket fatkeqësitë e shkaktuar në Libi nuk na kanë mësuar asgjë, është shprehur ajo. Italia nuk duhet të ndjek këtë linjë të rrezikshme”.
Krejt ndryshe e mendon Silvio Berlsuconi i cili ka deklaruar “Në këto situata është më mirë të heshtësh e mos të thuash asgjë.”
Ndërsa Partia Demokratike me anë të kryetarit të saj Maurizio Martina shprehet: “Në këtë situatë të tensionuar është i nevojshëm impenjmi maksimal i diplomacisë dhe politikës për të ndaluar përdorimin kriminal të armëve kimike. Rruga e negociatave është e vetmja rrugë për t’i dhënë fund dramës që Siria po jeton prej 7 vitesh.”
