Në një deklaratë për shtyp, zëdhënësja e Partisë Demokratike, Laura Vorpsi theksoi, se Rama duhet të bëjë transparencën e ‘pallatit në pajë’ dhe të tregojë, përse shkeli ligjet e urbanistikës për ndërtimin e këtij pallati. PD, i kërkon liderit opozitar të tregojë, se ku i ka marrë 1 milion euro për ndërtimin e pallatit në pajë dhe të bëjë transparencën e ndërtimit të rezidencës në Malin e Dajtit.

‘’Z.Rama! Qytetarët kudo që Ju shkoni presin nga Ju, tu shpjegoni përse firmosët dy lejet e ndërtimit në konflikt flagrant interesi familjar dhe në shkelje të rëndë të nenit 62 të ligjit të urbanistikës për ndërtimin e pallatit të gruas suaj në lulishten para pallateve, ndërkohë që Ju, po aty i kishit anulluar një qytetari tjetër lejen e ndërtimit të një pallati në sipërfaqet kallkan të pallateve dhe jo në lulishte.

Zoti Rama, qytetarët nuk duan fyrje për infermieret që janë motrat, vajzat, nënat, bashkëshortet e tyre, por ata duan të dinë se ku janë marrë 1 milion Euro me të cilat u ndërtua pallati 5 katësh i gruas suaj.

Qytetarët prej tre muajsh presin që me transparence,, tu paraqesësh atyre faturat tatimore, bankare dhe ato të ndërtimit të pallatit 900 metër katror,,, që sipas jush është ndërtuar nga një pensionist dhe një i vetëpunësuar.

Zoti Rama! Qytetarët nuk duan që ti të ofendosh mësuesit, atyre të cilëve ata u besojnë edukimin e fëmijëve.

Ata duan të dinë cmimin e vërtetë të truallit të rezidencës suaj verore në malin e Dajtit që ju e keni deklaruar 2 Dollarë metrin katror, ndërkohë që në dokumentat zyrtare, komshinjtë  tuaj po në atë zonë e kanë deklaruar 50 Dollarë metrin katror.

Zoti Rama,,, qytetarët nuk duan që Ju t’ua quani femijët e tyre dele që hyjnë në klasa por ata kërkojnë  nga Ju,, që me transparencë tu tregosh  burimin e të ardhurave me të cilat po ndërtoni rezidencen tuaj verore në malin e Dajtit.

Qytetarët kanë të drejtë ta dinë këtë sepse kur gruaja e juaj deklaroi në intervistën e saj televizive se rezidenca juaj verore me gjatësi themelesh 57 metër po ndërtohet me “Parat e Kurbanit” ju të nesërmen e censuruat këtë deklaratë.
Partia Demokratike kërkon nga Ju Z. Rama të lini mënjanë: sharjet dhe fyerjet për mesuesit, nxënësit, infermjerët, policët, fermerët dhe prodhimet e tyre dhe të bëni transparencën si detyrim ligjor dhe moral i cdo politikani, përndryshe, “pallati i familjes në lulishte” ndërtuar me Leje të Paligjshme dhe burimi i parave të ndërtimit të tij, rezidenca juaj verore, cmimi i truallit dhe origjina e parave të ndërtimit të saj, do t’ju  mbeten në kurriz, në cdo takim, në cdo sallë, në cdo kuti votimi!’’ e.k/

Në një deklaratë për shtyp Partia Demokratike, nëpërmjet zëdhënëses së saj Laura Vorpsi, ka akuzuar sërish kryetarin e opozitës Edi Rama se, po bllokon integrimin duke mos votuar tre ligjet e shumë përfolura, të cilat sipas PD-së do të lejojnë integrimin europian të Shqipërisë. Faktikisht ligjet e pretenduara nga ana e PD-së, nuk janë tre ligje por tre akte, pra dy ligje dhe një rregullore, të cilat për më tepër sipas agjendës europiane, ato nuk janë kusht për integrimin e vendit. Pra miratimi i tyre, nuk mund të sjelle automatikisht një integrim të vendit në BE.

‘’Ne do të bëjmë çmos që të tejkalojmë edhe këtë bllokadë, sepse ne besojmë se çdo i ri duhet të ketë mundësi pa kufij. Por e vetmja zgjedhje për të cilën interesohet Z. Rama është të mbrojë pushtetin e tij në krye të Partisë Socialiste.

Sa herë që Parlamenti është mbledhur, Zotit Rama i është kërkuar të lejojë një votim me shumicë të cilësuar mbi tre ligjet – dhe çdo herë ai e ka refuzuar. Vazhdimisht, ne kemi parë një rrjedhë të pafund alibish dhe shpikjesh, ndërsa ai bllokon ëndrrën Europiane të të gjithë shqiptarëve, veçanërisht të të rinjve shqiptarë. E vetmja gjë që i zë rrugën integrimit në BE është Z. Rama! E vetmja gjë që i pret rrugën të rinjve për të studiuar në universitetet më të mira në botë është Z. Rama.E vetmja gjë që pengon të rinjtë të punojnë dhe të trajnohen jashtë vendit është Z. Rama.

Dhe e vetmja gjë që pengon me dhjetëra mijëra vende pune të paguara më mirë dhe me qindra milion Euro është Z. Rama. Në fakt, vitin e shkuar ne kishim statusin për vendin kandidat në BE deri sa Z. Rama e bllokoi përsëri duke përdorur një varg alibish absurde. Dhe tashmë është më e qartë se kurrë që bllokimi nga Z. Rama nuk ka të bëjë aspak me moralin sepse gjithçka është pjesë e strategjisë së tij elektorale.  Në mënyrë cinike ai ngadalsoi sepse e dinte se statusi i vendit kandidat në BE nuk mund të arrihet para zgjedhjeve, duke i kushtuar kështu të rinjve një arsimim të vlefshëm dhe mundësi punësimi të cilat atyre i nevojiten shumë.

Partia Demokratike nuk do të pushojë deri sa integrimi në BE të bëhet realitet dhe të rinjtë të jenë në gjendje të përfitojnë nga të gjitha të mirat që vijnë bashkë me integrimin në Europë si: “ trajnimet profesionale”  jashtë vendit, Master-at dhe Doktoraturat në universitetet Europiane dhe dhjetëra e mijëra vende të reja pune këtu në Shqipëri.

Sot, të rinjtë tanë janë më shumë se kurrë  të informuar, të përgatitur, të motivuar dhe të talentuar – dhe në qoftë se ata kanë të njëjtat burime si homologët e tyre në Europë, ata mund të konkurojnë këdo në Europë!’’

Në një deklaratë për shtyp, Partia Socialiste, nëpërmjet Edison Konomi theksoi se, modeli ekonomik i Sali Berishës ka dështuar. Të dhënat zyrtare nuk e fshehin dot këtë, jo vetëm për vitin 2012, por edhe për tremujorin e parë të vitit 2013. Sipas PS-së, deficiti në realizimin e të ardhurave është 40 milion Euro, me pak se plani, ose 5% minus. Totali i të ardhurave të 3-mujorit të parë 2013 është më i ulët se treguesi i realizuar në 3-mujorin e parë të vitit 2011 dhe 3-mujori i parë i vitit 2012. Në krahasim me të ardhurat e realizuara për të njëjtën periudhë një vit më parë, është konstatuar një rënie e ndjeshme e :

Tvsh-së në minus – 9,7 %;

Rënie të Akcizës – 8,2 %;

Taksa Doganore -14.1%;

Të ardhurat e pushtetit vendor – 21%;

Të ardhurat nga tarifat – 12,1 %.

PS theksoi se, qeveria ka dështuar gjithashtu me planin e shpenzimeve, ku vetëm investimet kanë një mos realizim prej 3,604 miliardë lekë. Për pjesën e shpenzimeve vërehet se ato janë të barabarta me ato të kryera në 3-mujorin e parë të vitit 2011. Investimet janë nga më të ultat në këto 5 vitet e fundit (që nga 2009 – 2013). Treguesit fiskalë raportojnë për deficitin aktual, i cili është 45 % më i lartë se ai i së njëjtës periudhë të vitit 2012. Tek deficiti dhe financimi i tij vërehet se ai është financuar me 6,3 miliard lekë më shumë se plani, gati 50 %  më shumë dhe se treguesi i financimit gjithashtu është shumë më i lartë se një vit më parë, është 129% më shumë. Këto të dhëna që raportohen për tre-mujorin e parë shfaqin qartë dështimin total në administrimin fiskal të vendit.

PS akuzoi gjithashtu Berishën se, jo vetëm fsheh situatën reale ekonomike në vend por edhe transformon të dhënat e shkruara nëpër raporte ndërkombëtare, duke iu referuar raportit të Komisionit Europian për situatën ekonomike të vendeve aspirante për anëtarësim.

PS bëri të ditur se, në respekt të publikut dhe qytetarëve shqiptarë, duhet thënë se, 4 të vërteta të hidhura kishte ky raport:

Rritja është ngadalësuar keqas;

Borxhi është i lartë;

Investimet e huaja kanë rënë;

Papunësia nuk po njeh përmirësim.

Sipas PS-së, Shqipërisë dhe shqiptarëve u nevojitet një model i ri ekonomik, nevojitet ristrukturimi i plotë i ekonomisë shqiptare. Një model ekonomik, i cili të ketë si prioritet më pak borxhe për brezat e ardhshëm, më shumë qëndrueshmëri fiskale. Qëndrueshmëri ekonomike nëpërmjet rivendosjes të ekuilibrave buxhetorë për të zbutur kështu barrën e detyrimeve mbi brezat e ardhshëm. Qeveria e re e majtë pas 23 qershorit, sipas Partisë Socialiste, do të shëndoshë financat publike, do të lehtësojë buxhetet familjare, duke i dhënë më në fund frymëmarrje të re ekonomisë shqiptare.