Nga Kanina e Vlorës, Edi Rama deklaroi se mungesa e shtetit bën që njerëzit të jetojnë në varfëri e papunësi në një vend plot burime natyrore.

“Kanina është një mrekulli e Zotit dhe kur sheh varfërinë dhe papunësinë e banorëve të këtij vendi thua si ka mundësi që të lindësh në një vend me kaq bukuri e pasuri e të bashkëjetosh me varfërinë e papunësinë. Ka vetëm një përgjigje: sepse nuk ka shtet!”

Kreu i Partisë Socialiste shtoi: “Kjo fushatë nuk është ballafaqim për të zgjedhur midis dy palësh, kjo është një fushatë dhe një votë për të vendosur nëse do të vazhdojmë pa shtet apo do ndërtojmë shtet për të sjellë ujë në rubinet sepse është turp që në një vend si Shqipëria nuk ka ujë.”

Gjithashtu Rama premtoi se do i japë “certifikatën e pronësisë mbi tokën çdo familjeje fermere që punon tokën dhe jeton me tokën”.

Kreu i Frymes se Re Demokratike, Bamir Topi, vizitoi ditën e dielë tregun pranë Medresesë së Tiranës, ku përsëriti nevojën për një frymë të re politike në vend.

Në takimin me tregtarët e vegjël, ish-Presidenti fajësoi të dy partitë e mëdha në vend, për këtë sistem të pabarabartë, në të cilin “qytetarët e thjeshtë blejnë këtu, ndërsa bllokmenët i bëjnë shpenzimet e tyre jashtë shtetit”.

”Çdo zonë e Tiranës ka nevojë për treg publik modern, e jo për tregëtimet ambulante që bëhen nëpër lagje”, deklaroi Topi.

”Duhet t’i japim fund gjobave dhe presionit ndaj biznesit. FRD ka një plan për të lehtësuar biznesin e vogël dhe rikthyer rritjen ekonomike të vendit”, shtoi kryetari i FRD-së.

Kreu i Partisë Socialiste Edi Rama ka premtuar sërish dhënien e certifikatës së tokës brenda 2 viteve të para të mandatit qeverisës së socialistëve si dhe transparencë për kalimin e tokës.

Ndërsa ka zhvilluar një kënd fjale në Llakatund të Vlorës, kryesocialisti Rama tha se pas  23 qershorit do të  zgjidhet ato të cilat ai i cilësoi si krime me kalimin e pronës,

“Do japim pronësinë, do bëjmë transparence të plotë me pronën posaçërisht në bregdet. Brenda 2 vite të para të mandatit qeverisës do të përfundojmë reformën e plotë të tokës, duke iu dhënë certifikatën e pronës në dorë. Marrja e tokës nga familjet e pafuqishme të fshatit që trajtohen si të ishin bujkrobër nga disa kryetarë komunash dhe kalimi i tokës për hesapet e tyre tek të afërm tek miq partie biznesmenë, me ca kontrata skandaloze në dëm të zhvillimit nuk do të tolerohet. Janë bërë krime me kalimin e pronave dhe nuk do të tolerohen më. Ka mungesë ndërveprimi të pushteti lokal me atë qendror për zgjidhjen e këtij problemi”, tha Rama.

Kreu i PS-së i bëri thirrje qytetarëve të Vlorës të votojnë vetëm Parinë Socialiste si alternative e vetme për të zgjidhur problemet e tyre dhe jo kandidatin e pavaruar Arben Malajn apo për PD-në.

“Adresa të tjera nuk të zgjidhën asgjë. Votat kanë vlerë vetëm kur janë në numrin 29 për Partinë Socialiste.  Arben Malajn ta keni mik, t’i hapni derën e shtëpisë tuaj. Ta ndihmoni  që të kuptoj që nuk është çështje miqësie vota por investimi juaj për të marrë certifikatën e tokës, për të zgjidhur problemin e dritave dhe të ujit, për heqjen e TVSH-së për makineritë bujqësore. Për këtë është vota dhe për ketë nuk të ndihmon as Arben Malja dhe as Saliu por vetëm Partia Socialiste” tha Rama.

Raportuesi për Shqipërinë në komisionin e jashtëm parlamentar gjerman, Roderich Kiesewetter ka deklaruar  testi më i rëndësishëm për integrimin e Shqipërisë është një parlament funksional dhe një qeveri me besueshmëri dhe e fortë.

Ndërsa i është referuar situatës zgjedhore në Shqipëri,  Kiesewetter është shprehur optimist  që ecuria e zgjedhjeve parlamentare këtë herë në Shqipëri do të jetë pozitive.

“Mendoj se të gjitha partitë politike që konkurrojnë për të qenë pjesë e parlamentit kanë një interes të madh që zgjedhjet këtë vit të jenë të ndershme dhe transparente, dhe nuk kam dyshim që kështu do të ndodhë. Por pas kësaj duhet filluar pa vonesë nga puna. Funktionaliteti i parlamentit, administrata publike, shteti i së drejtës, luftimi i korrupsionit, por edhe luftë intensive kundër kriminalitetit të organizuar duhet të jetë në interes të parlamentit dhe qeverisë së re. Ne kemi interes të madh që Shqipëria të marrë mundësisht shpejt statusin e vendit kandidat. Po qe se populli është i vetëdijshëm për këtë, por edhe parlamenti atëherë ndodhemi në rrugën e duhur” tha ai.

I pyetur nëse në Shqipëri nuk do të ketë më zgjedhje të kontestuara, Kiesewetter ka theksuar se: “Po nuk mund të përfytyroj gjë tjetër veç asaj që vendi ka mësuar nga zgjedhjet e kaluara. Kam besim se kështu do të jetë, do të ishte për të ardhur keq nëse do të ndodhte ndryshe, sepse kjo do ta shtynte edhe më tej marrjen e statusit të vendit kandidat. Jam optimist që jo vetëm elektorati, por edhe personat përgjegjës për zhvillimin e procesit zgjedhor do të bëjnë ç’është e mundur që këto zgjedhje të jenë zgjedhje tërësisht të pranuara”.

Deputeti gjerman ka apeluar për plotësimin e vendeve vakante në Komisionin Qëndror të Zgjedhjeve pas dorëheqjes së anëtarëve të opozitës.

“Unë do të apeloja tek personat përgjegjës që Komisioni Qendror i Zgjedhjeve – i kemi ende pak javë kohë deri më 23. Qershor – që KQZ të funksionojë me kapacitete të mjaftueshme. Nuk duhet të jetë thjesht një komision legal, legjitim, por ai duhet të jetë i aftë të funksionojë. Por kemi edhe pak kohë, dhe unë mbetem me besimin që në fund të triumfojë arsyeja” tha ai.

I pyetur nëse Gjermani do të hapë dritën jeshile për marrjen e statusit për Shqipërinë pas miratimit të 3 ligjeve në Parlament, deputeti gjerman theksoi se kjo varet se si do të krijohet qeveria e re pas zgjedhjeve, nëse parlamenti i ri do të jetë funksional.

“Ne në Gjermani kemi vetë zgjedhje në shtator, kështu që nuk mund të flas për Bundestagun e ardhshëm, aq më pak për qeverinë e ardhshme gjermane. Por në parlamentin gjerman ka një simpati të madhe për të vlerësuar progresin e Shqipërisë – dhe po qe se zgjedhjet janë të mira dhe më pas qeveria e opozita e ardhshme bashkëpunojnë mirë me njëri-tjetrin atëherë nuk njoh argumenta të tjerë kundër” tha ai.

I pyetur nëse mosmarrja e statusit është një ndëshkim për klasën politike shqiptare, raportuesi për Shqipërinë në Parlamentin gjerman u shpreh se nuk bëhet fjalë për ndëshkim, por thjesht për respektimin e kritereve.

“Dhe kur këto kritere duhen përmbushur nga çdo vend, së fundmi nga Kroacia, nuk mund të bëhet asnjë përjashtim. Shqipëria e ka vetë në dorë statusin. Por mendoj se tani që është bërë më se e qartë se statusi kandidat vjen kur të përmbushen kriteret, është për këdo transparente dhe e kuptueshme se kjo është një zgjidhje e mirë. Kjo është kuptuar edhe në Shqipëri. Edhe nga udhëtimet e mia në Shqipëri e di se me sa seriozitet punohet nga parlamenti, nga kryetarja Topalli  dhe jam i gëzuar që më fund opozita dhe qeveria veprojnë më pa emocione se para një viti. Po qe se kjo frymë vazhdon jam optimist për vjeshtën. Dua të theksoj se ne jemi konstruktivë, vetëm me kritikë nuk arrihet shumë” tha ai.