Partia Demokratike u është rikthyer sërish akuzave ndaj Ministrisë së Brendshme për fshehje të ngjarjeve kriminale që kanë ndodhur në vend. Ish-Ministri i Brendshëm, Flamur Noka, në një deklaratë për mediat akuzoi Ministrin Tahiri për fshehje të numrit të viktimave përgjatë periudhës katërmujore të qeverisë Rama. Sipas tij kjo është një këmbanë alarmi për rënien e autoritetit të policisë, uljen e zbulueshmërisë dhe rritjen e krimit nën këtë qeverisje.

Deklarata e plote:

Ministri i Brendshëm krekoset se vrasjet me ardhjen e tij në pushtet janë vetëm 34.
Ndërkohë që Shqipëria është nën terrorin e maskave dhe tritolit, Ministri i Brendshëm ngrihet e krihet. Është skandaloze kurajoja që ka ky zyrtar i lartë i vendit për të gënjyer.
Nga shtatori e deri sot që flasim, janë 51 të vrarë. 51 viktima të krimit, që tregojnë jo vetëm pasigurinë në vend, por e nxjerrin Ministrin një gënjeshtar të paskrupullt. Tahiri thotë se në Janar, ka 11 të vrarë. Në fakt janë 17 të vrarë. Të dhënat e tregojnë këtë. Këto janë ngjarje të rënda dhe kur shoqërohen edhe më gënjeshtrat e Ministrit të Brendshëm bëhen këmbana alarmi, për rënien e autoritetit të policisë, uljen e zbulueshmërisë dhe rritjen e krimit nën këtë qeverisje. Teksa Ministri bën si polic, Drejtori i Përgjithshëm i Policisë sillet si politikan. Numëruesi i parë i zgjedhjeve për Partinë Socialiste e tradhtoi veten me deklaratën që bëri kundër opozitës.

Drejtori i Policisë është në shërbim të qytetarëve dhe nuk mund t’i ndajë ata në pozitë dhe opozitë. Qëndrimet e tij politike, janë në kundërshtim me ligjin dhe një shkelje e rëndë e standardeve të drejtimit të Policisë së Shtetit. Didi e dëshmoi vetë dje se nuk është drejtori Policie, por drejtor partie. Qëndrime të tilla, kërkojnë të largojnë përgjegjësinë nga situata e rënduar kriminale, dhe nga skandali më i fundit, kur i penduari vinte vërdallë në Durrës e Tiranë, për të denoncuar bandën e tritolit, sepse në komisariate e përzinin. Arsyen pse refuzonin të penduarin, e dinë vetë ata. Partia Demokratike ka denoncuar në vijimësi gënjeshtrat e Ministrit dhe fshehjen që ai u bën ngjarjeve të rënda. Ja fakti më i fundit.
Dje në orët e para të mëngjesit, në Shkodër, një grup i armatosur dhe i maskuar, ka hyrë me forcë dhe ka marrë paratë që gjendeshin në zyrat qendrore të postës. Ngjarja nuk është bërë e ditur nga policia.Të gjitha këto manipulime të Ministrit dhe Drejtorit të Policisë, jo vetëm nuk e përmirësojnë rendin dhe sigurinë, por nxisin edhe më shumë kriminalitetin dhe i bëjnë ata palë me keqbërësit.

Presidenti i Republikës, Bujar Nishani, konsideron se vendimi i mazhorancës për të rrëzuar dekretet e tij për anëtarët e Gjykatës së Lartë, është bazuar në një gjykim të thjeshtëzuar, një arsyetim të pabazuar dhe një justifikim të sforcuar. Sipas presidentit, për përzgjedhjen e dy kandidatëve Petrit Çeno dhe Gjovalin Përnoca, është garantuar tërësia e parimeve kushtetuese.

Presidenti Nishani thekson se me dekretimin e zotërinjve Petrit Çeno dhe Gjovalin Përnoca, i ka qëndruar korrekt kritereve ligjore të: vjetërsisë në profesion; cilësisë së lartë të punës së kandidatit; ecurisë në karrierë; integritetit të lartë moral, pa anashkaluar përbërjen e trupës gjyqësore të Gjykatës së Lartë sipas raportit të përcaktuar nga ligjvënësi.

“Në të kundërt të kësaj, me keqardhje, Presidenti konstaton se në rastin e refuzimit të fundit, refuzuesit kanë vepruar në rend të kundërt. Kanë marrë një vendim, direktivë, ndoshta sugjerim, ndoshta urdhër, dhe në përputhje me këtë, kanë hartuar relacionin, kanë sugjeruar grupeve parlamentare të Shumicës refuzimin. Është në favor të interesit të përgjithshëm të vendit dhe qytetarëve shqiptarë, që vendimmarrje të tilla që në thelb kanë edhe parimin e luajalitetit ndërinstitucional, të mos cenohen nga interesa të grupimeve politike.”- thekson presidenti

“Bazuar në detyrimet kushtetuese dhe në ligjin “Për organizimin dhe funksionimin e Gjykatës së Lartë, të Republikës së Shqipërisë”, që siç dihet është ndryshuar me miratim dhe konsensus të gjerë politik, realizuam këtë proces duke bërë njoftimin publik për fillimin e procedurave, shpallëm publikisht emrat konkretë të kandidatëve të cilët plotësonin kushtet ligjore, procedura, të cilat u bënë prezent gjatë procesit të këshillimit me përfaqësues të grupeve parlamentare. Vlerësova veçanërisht procesin e bashkëpunimit me përfaqësuesit në Kuvend dhe dakordësinë e tyre për kushtet dhe kriteret konkrete bazuar ne listën e konkurrenteve për një përbërje cilësore të Gjykatës së Lartë.”- nënvizon presidenti.

“Në një vështrim më të thellë, e shprehur në mënyrë të kondensuar, ajo që ndodhi me votimin, është një tregues më se i qartë se konsensusi politik i arritur mes palëve pas kërkesës së Bashkimit Europian për Ligjin e ri të Gjykatës së Lartë, të bind se konsensusi në fjalë nuk e kaloi provën. Çfarë vihet re fare qartë është se refuzimi u bë përmes një truku procedurial. Flitet për “Presidentin” nga njëra anë, dhe nga ana tjetër për “Shumicën Qeverisëse” qe ka përballë një palë armike politike. Çka është një qasje apo tablo thellësisht e gabuar.”- vijon më tej kreu i shtetit.

Një ditë më parë me votat e deputetëve të maxhorancës, Kuvendi rrëzoi dekretet e Presidentit të Republikës për emërimin e dy anëtarëve të rinj të Gjykatës së Lartë.

Pas një votimi nominal, me 44 vota pro, 77 vota kundër dhe 2 abstenime kandidati i propozuar, Petrit Çeno nuk mori pëlqimin e Kuvendit për të qenë gjyqtar në Gjykatën e Lartë.

Edhe kandidatit tjetër, Gjovalin Përnoca, me 39 vota pro dhe 75 vota kundër nuk mori pëlqimin e Kuvendit për të qenë pjesë e kësaj gjykate.

Kryetari i Partisë Demokratike Lulzim Basha ka deklaruar se situata ekonomike në vend është përkeqësuar.

Duke folur në forumin ekonomik me temë “Ku po shkon ekonomia shqiptare?” Basha ka theksuar se punësimi mbetet ende një plagë për vendin.

“Shteti shqiptar padyshim është dhe mbetet vetëm një fraksion i fuqisë punëdhënëse t ë sektorit privat. Nga ana tjetër punësimi është sot edhe sfida edhe plaga më e rëndë e vendit prandaj nëse në një logjikë lineare ne partitë politike, parlamentarët duam të japim kontributin tonë është e domosdoshme t`i kthejmë nga biznesi. Për fat të keq të dhënat e fundit që vijnë nga Banka e Shqipërisë dhe nga ndërkombëtarët madje edhe nga vete INSTAT i vendosur nga një kontroll politik i paligjshëm tregojnë një përkeqësim të situatës ekonomike në tërësi” tha Basha.

Basha theksoi më tej senjë problem i madh mbetet edhe borxhi që sipas tij sa vjen dhe akumulohet.

“Hyrja në fuqi e paketës së re fiskale natyrisht  që është një barrë shtesë për biznesin në tërësi. Rritja me 50 përqind e tatimit mbi fitimin nga njëra anë dhe mungesa e çdo stimuli zhvillimi nga ana tjetër është ndiher nga ju nga ata që përfaqësoni dhe nga ekonomia në tërësi. 400 milionë dollarë mori qeveria borxh me aktin normativ të vitit të kaluar dhe tha se do paguaj borxhin e biznesit. Pagoi vetëm 30 milionë dollarë apo 7.5 përqind të kësaj shume. Problemi është që jo vetëm nuk janë larë borxhet por u morën 400 milionë dollarë borxh 3 muaj më parë, por borxhet vazhdojnë të akumulohen” tha Basha.

Sipas Bashës, konsumi ka rënie dhe në këtë rënie evidente pjesën e vet po e ben dhe paketa fiskale, taksa e karburantit që po shtrin efektin e saj me efekte shkatërruese.

Më pas Basha u ndal dhe tek fshirja e të dhënave në serverin e tatimeve që sipas tij përbën skandalin korruptiv më të madh të tipit mafioz.

“Megaskandali i vjedhjes së të dhënave të serverit të tatimeve, korrupsion i tipit mafioz. Të gjithë këto të dhëna të mbrojtura me ligj janë në duar të krimit, të shantazhuesve dhe në duar të klientelës. Nuk do të reshtim derisa përgjegjësit të vihen para përgjegjësisë, por djalli ka dalë nga shishja. Ky akt kriminal me përmasa të padëgjuara, do të ketë efekte mbi sigurinë fizike të sipërmarrësve dhe konkurrencën e lirë dhe në natyrën normale është detyra jonë të bëjmë çfarë është e mundur dhe të gjejmë rrugët se çfarë duhet të bëjmë së bashku për ti bërë fre këtij fenomeni kaq të rrezikshëm, si një shtet kryekëput mafioz” tha Basha.