Kryeministri Edi Rama është shprehur se integrimi i Shqipërisë në Bashkimin Evropian nuk është thjesht një destinacion që duhet të arrihet, por një sfidë e brendshme, për të ndërtuar një vend me vlera europiane. Rama këto deklarata i ka bërë gjatë fjalës së tij që mbajti para një auditori studentësh të Universitetit të  Oksfordit, kushtuar zhvillimeve në Ballkan dhe perspektivës së këtij rajoni në Bashkimin Evropian.

Ai e paraqiti integrimin evropian si një shtyllë kryesore dhe prioritet madhor të politikës së jashtme të Shqipërisë. Kryeministri theksoi se, qeveria shqiptare e merr këtë proces në radhë të parë e merr si një sfidë të brendshme, për të ndërtuar në vend, pikërisht këto vlera që Evropa përfaqëson.

“Ne jemi të vendosur të ndërmarrim të gjitha hapat e kërkuar në mënyrë që të marrim statusin e vendit kandidat. Ne do të punojmë fort, duke mbajtur gjithmonë në mendje se integrimi në BE nuk është vetëm një destinacion, por është një set vlerash dhe standardesh që ne si fillim duhet t’i ndërtojmë në vend,” – u tha Rama.

Kryeministri shqiptar e ka vlerësuar si mjaft të rëndësishëm integrimin e të gjithë shteteve të Ballkanit në BE, jo thjesht si pjesë gjeografike, por edhe si bartës i vlerave të tij.  “Evropa nuk është një destinacioni jashtë nesh. Evropa duhet të jetë dhe Evropa është një destinacion brenda nesh. Arsyeja e parë dhe më e rëndësishme përse Ballkani ka nevojë për një BE të fortë dhe duhet të bëhet pjesë e saj, janë vlerat mbi të cilat u themelua Evropa dhe ajo që ato vlera përfaqësojnë sot”, – u shpreh kryeministri.

Rama gjithashtu foli edhe për përpjekjet që janë duke u bërë nga vend ynë për arritjen e standardeve evropiane dhe vendosmërinë e qeverisë  për të përmbushur çdo hap të nevojshëm për t’iu bashkuar BE-së. “Kjo lidhet – theksoi ai – me vullnetin tonë për të kontribuar në suksesin e një projekti ndërkombëtar brilant, të një Bashkimi Evropian që kontribuon ndërkaq për begatinë e miliona njerëzve, që krijon shoqëri akoma më të hapura dhe që kontribuon për një botë më të barabartë”.

Kryeministri Rama e vlerësoi edhe rolin e Britanisë së Madhe dhe mbështetjen që i ka dhënë  Shqipërisë në rrugëtimin evropian. “Shpresoj që, ndërkohë që Shqipëria vazhdon këtë udhëtimin të brendshëm, progresi dhe ndryshimi në mënyrë që të arrijë integrimin në BE, Britania e Madhe të jetë me ne, duke na shtyrë në drejtimin e duhur”, – tha kryeministri.

Rama gjithashtu foli edhe për bashkëpunimin mes vendeve të Ballkanit, pasi ky është një faktor kyç për një integrim të suksesshëm evropian.  “Unë jam shumë i vetëdijshëm se nuk mund të jemi të vetëm në këtë udhëtim. Unë e di se bashkëpunimi rajonal është një faktor kyç në procesin e integrimit dhe për të siguruar një integrim të suksesshëm dhe për të kontribuar për të ardhmen e BE-së, ne jemi të vendosur të punojmë sa më fort që të jetë e mundur me të gjithë fqinjët”, – u shpreh Kryeministri.

Në përmbyllje të fjalës së tij, kryeministri Edi Rama tha se Shqipëria, me brezat e saj të rinj, nuk do të jetë vetëm përfituese, por edhe kontribuuese në Bashkimin Evropian.“Ne jemi të sigurt që Shqipëria do të përfitojë nga BE-ja. Dhe mund t’ju premtoj se BE-ja do të përfitojë nga brezi i ri i shqiptarëve”.

Sot në Gjykatën e Apelit në Tiranë ishte programuar seanca gjyqësore për Jamarbër Malltezin, dhëndrin e ish-kryeminstrit Berisha, dhe kryetarit të Grupit Parlamentar Socialist, Taulant Ballës. Por kjo seancë nuk është zhvilluar, pasi mungonte Balla, pasi siç sqaron ai, ndodhej në një një mbledhje të Komisionit Parlamentar të Sigurisë Kombëtare.

Por bashkëshorti i Argita Berishës, vajzës së Sali Berishës, akuzon Ballën se po i fshihet drejtësisë. Nëpërmjet një njoftimi për mediat, Malltezi thotë se Taulant Balla po mashtron gjykatën.

“Pas shpifjeve ndaj qytetarëve, tani, Taulant Balla po mashtron gjykatën. Pasi ishte ankuar kundër vendimit të shkallës së parë të gjykatës së Tiranës që e shpalli shpifës ndaj meje, Balla iu fsheh sot përballjes në seancën e caktuar nga Gjykata e Apelit në Tiranë dhe kërkoi shtyrjen e gjykimit me pretendimin se ishte në një mbledhje të Komisionit Parlamentar të Sigurisë Kombëtare. Ndërkaq mësojmë se ky komision ka 3 javë që nuk mblidhet!!!”, -thuhet në njoftimin për shtyp që Jamarbër Malltezi u ka dërguar medieve.

Por Malltezi shkon edhe më larg kur e cilëson deputetin socialist si frikacak dhe mashtrues, me pretendimin se Balla shpif për qytetarët dhe mashtron gjykatën.

“Shpreh keqardhje që në parlamentin shqiptar kemi deputetë që përveçse shpifin për qytetarët sipas qejfit dhe interesit, shkojnë deri dhe mashtrojnë gjykatën. Kjo është shpërfillje dhe tallje me gjykatën e një bande që nuk njohin shtet, ligj dhe moral. Është trishtuese të shohësh që përfaqësohemi nga frikacakë si Balla që nga një anë përbetohen për respektim të ligjeve të vendit, e nga ana tjetër shpifin për qytetarët dhe mashtrojnë gjykatat. Shpresoj që të gjejë forca dhe të mos i përvidhet përballjes me shpifjet e tij në Gjykatën e Apelit në seancën e ardhshme”, -përfundon njoftimi për shtyp i Malltezit.

Balla: E garantoj dhëndrin e babit ish-kryeministër, familjen klanore në tërësi, se drejtësia do të vendoset shumë shpejt. Edhe për ju!

I menjëhershëm ka qenë reagimi i kreut të Grupit Parlamentar Socialist, Taulant Ballës, i cili nëpërmjet një njoftimi për mediat, sqaron arsyet se pse nuk u paraqit sot në sancën gjyqësore. Balla thotë se është kërkuar shtyrja nga avokati, për shkak të angazhimeve të shumta që ai ka si nënkryetar i Grupit Parlamentar Socialist, si kryetar i Delegacionit të Kuvendit të Shqipërisë në Parlamentin Evropian, si nënkryetar i Komisionit të Integrimit Evropian dhe si anëtar i Komisionit të Sigurisë Kombëtare.

Deputeti Balla deklaron ka kërkuar shtyrjen e seancës gjyqësore, pasi ai do të jetë i pranishëm për të shprehur qëndrimet e tij kundër klanit familjar të Sali Berishës.

Balla nuk lë pa përmendur akuzat ndaj Malletzit, që sipas tij vodhi klubin e futbollit “Partizani” me vendimet, siç i quan ai, të vjehrrit, babi Saliut.

Në fund Balla shprehet: “E garantoj dhëndrin e babit ish-kryeministër, familjen klanore në tërësi, se drejtësia do të vendoset shumë shpejt. Edhe për ju! Sa për frikacak, Jamarbëri bën mirë të pyesë Sali Berishën, se ky më njeh mirë”.

Fjala e plotë e Ballës:

Të dashur miq,

Sot në Gjykatën e Apelit ishte programuar zhvillimi i seancës gjyqësore me dhëndrin e babit ish-kryeministër Sali Berisha. Pas një vendimi qesharak në Gjykatën e Shkallës së Parë, ku dhëndri i Sali Berishës nuk u paraqit në asnjë seancë gjyqësore për të dhënë shpjegime, sot dëgjova se dhëndri qenka ankuar për një shtyrje normale dhe ligjore të seancës.

Është kërkuar shtyrja nga avokati, për shkak të angazhimeve të shumta që unë kam si nënkryetar i Grupit Parlamentar Socialist, si kryetar i Delegacionit të Kuvendit të Shqipërisë në Parlamentin Evropian, si nënkryetar i Komisionit të Integrimit Evropian dhe si anëtar i Komisionit të Sigurisë Kombëtare.

Është kërkuar shtyrja sepse edhe në këtë seancë gjyqësore në apel unë dua të jem përsëri aty personalisht, për të rishprehur qëndrimet e mija kundër klanit familjar të Sali Berishës, që sot është rrëzuar nga pushteti, në pritje të drejtësisë.

Të gjithë shqiptarët e dinë se dhëndri i Sali Berishës vodhi klubin e futbollit Partizani, me vendimet e vjehrrit, babi Saliut.

Shqiptarët duan transparencë dhe procesi sapo ka filluar. Hetimi i pasurive të politikanëve dhe familjarëve të tyre është pjesë e këtij procesi transparence. Procesi i reformës në drejtësi është në hapat e parë, por e sigurt është që kjo mazhorancë do bëjë gjithçka për vendosjen e drejtësisë në binarët dhe standardet e duhura.

E garantoj dhëndrin e babit ish-kryeministër, familjen klanore në tërësi, se drejtësia do të vendoset shumë shpejt. Edhe për ju! Sa për frikacak, Jamarbëri bën mirë të pyesë Sali Berishën, se ky më njeh mirë.

Përgatituni për diskutime jashtë rendit të ditës. Kjo ishte porosia që kryetari i Grupit Parlamentar të Partisë Socialiste, Gramoz Ruçi u përcolli dje deputetëve gjatë mbledhjes së përjavshme.

Në mbledhjen me dyer të mbyllura ku u diskutua axhenda e seancës plenare të ditës së enjte, Ruçi ka sjellë në vëmendje seancat e fundit ku debati është zhvendosur krejtësisht nga rendi i ditës. Duke i paraprirë një situate të ngjashme ai u kërkoi deputetëve që të përgatiten për një situatë të tillë.

Përplasjet 

Porosia e Ruçit është në vijim të kërkesës së bërë nga Kryeministri Edi Rama pak javë më parë në mbledhje grupi. Dhe kryeministri porositi ligjvënësit që akuzat e opozitës për çdo çështje të marrin përgjigje të argumentuar,jo vetëm nga ministrat e kabinetit qeveritar, por dhe nga deputetët e mazhorancës. Seanca e fundit plenare u kthye në një arenë debati mes palëve lidhur me vendimin e Kuvendit për të shkarkuar kryeispektoren e Inspektoratit të Lartë të Deklarimit dhe Kontrollit të Pasurive, Zana Xhuka.

Opozita duke mbrojtur emërimin e bërë prej saj kundërshtoi argumentet e mazhorancës për shkarkimin e kreut të ILDKP-së. Argumentet e kreut të deputetëve të PDsë, Edi Paloka, morën përgjigje nga kreu i deputetëve socialistë, Gramoz Ruçi, por dhe kreu i Kuvendit, Ilir Meta.

Përplasja vijoi mes kryeministrit Edi Rama, ish-kryeministrit Sali Berisha, ligjvënësve të Partisë Socialiste dhe Partisë Demokratike për një sërë çështjesh të aktualitetit politik. Kjo situatë është përsëritur në disa seanca me radhë çka çon në një tejzgjatje të seancave plenare.

 Axhenda 

Në seancën plenare të ditës së enjte në rend dite është miratimi i procesverbalit të seancës plenare, datë 20.02.2014; miratimi i projektligjit «Për aderimin e Republikës së Shqipërisë në Konventën e Vjenës “Për të drejtën e traktateve midis shteteve dhe organizatave ndërkombëtare ose midis organizatave ndërkombëtare”, 1986”’; miratimi i projektligjit “Për ratifikimin e marrëveshjes ndërmjet Këshillit të Ministrave të Republikës së Shqipërisë dhe Qeverisë së Republikës së Italisë, për realizimin e “Programit të ndihmës së integruar për zhvillimin e ndërmarrjeve të vogla dhe të mesme shqiptare”; miratimi i projektligjit “Për kujdesin shëndetësor të veçantë të punonjësve të strukturave speciale operacionale të Policisë së Shtetit”; miratimi i projektligjit “Për disa shtesa dhe ndryshime në ligjin nr. 8053, datë 21.12.1995 “Për kalimin në pronësi pa shpërblim të tokës bujqësore” të ndryshuar” si dhe miratimi i projektligjit “Për disa ndryshime ne ligjin nr. 97/2013 “Për mediat audiovizive në Republikën e Shqipërisë”.

Presidenti i Republikës shpalli sot listën e konkurruesve, të cilët plotësojnë kushtet ligjore si kandidatë për një vend vakant në Gjykatën e Lartë.

“Në përfundim të afatit për shqyrtimin e dokumentacionit të çdo konkurruesi për anëtar të Gjykatës së Lartë,  Presidenti i Republikës, Bujar Nishani, në zbatim të ligjit nr. 151/2013 “Për disa ndryshime dhe shtesa në ligjin nr. 8588, datë 15.3.2000 “Për organizimin dhe funksionimin e Gjykatës së Lartë të Republikës së Shqipërisë”, shpall kandidatët të cilët plotësojnë kushtet ligjore të përcaktuara në ligjin e lartpërmendur”, thuhet në njoftimin e Presidencës.

Procesi përzgjedhës do të vijojë me bashkëpunimin midis Presidentit të Republikës dhe kryetarëve të grupeve parlamentare  të Kuvendit të Shqipërisë, me qëllim përcaktimin e kritereve konkrete, bazuar në listën e kandidatëve, në përputhje me kërkesën kushtetuese për kualifikim të lartë të anëtarit, duke siguruar kështu përbërjen cilësore dhe të nevojshme për Gjykatën e Lartë.

Lista e konkurruesve që plotësojnë kushtet ligjore si kandidatë për anëtarë të Gjykatës së Lartë, për kandidatët që vijnë nga radhët e gjyqësorit është: Alaudin Malaj, Astrit Kalaja ,Entela Prifti, Fatos Qato, Luan Dervishi, Sokol Ngresi.

Ndërsa lista për kandidatët që vijnë nga radhët e juristëve është; Adnor Shameti, Ermir Dobjani, Genti Shala, Gjet Kola, Ilir Panda, Luan Daci, Pranvera Strakosha, Prel Martini, Rexhep Bekteshi, Sokol Sadushi, Shpëtime Pitaku.