Në Shkup sot rreth orës 14:00 pritet të zhvillohen protesta të shqiptarëve dhe maqedonasve.
Shqiptarët do të protestojnë lidhur me vendimin me burg të përjetshëm të gjashtë shqiptarëve për rastin e ashtuquajtur “Monstra”, ndërsa maqedonasit do të protestojnë me moton “Maqedonia e maqedonasve” dhe në mbrojtje të vendimeve institucionale.
Sipas agjencisë maqedonase INA, Ministria e Brendshme ka shtuar masat e sigurisë në kryeqytet, për të shmangur kontaktin e mundshëm të turmave protestuese, ndërsa forca të mëdha policore janë të pranishme në kryeqytet.
Protesta që pritet të jetë masive e shqiptarëve me moton Stop , diskriminimit dhe drejtësisë selektive’ do të nisë nga pjesa e komunës së Çairit. Protesta e shqiptarëve ka marrë mbështetjen e shumë organizatave shqiptare nga vendi, trevat e tjera dhe diaspora.
Ndërsa protesta e maqedonasve do të zhvillohet para qeverisë dhe nuk dihen organizatorët e saj.
Lidhur me këto protesta janë bërë apele nga partitë politike, shoqatat dhe bashkësia ndërkombëtare për protesta të qeta dhe për shmangie të dhunës.
Protesta e shqiptarëve pritet të mbahen edhe në qytete të tjera të vendit, pasi ka pasur disa thirrje përmes rrjeteve sociale.

Vendimi i Gjykatës Kushtetuese në lidhje me procedurat që duhet të ndjekë presidentja e Kosovës për caktimin e mandatarit për krijimin e qeverisë në dy rastet kushtetuese, paraqet një mundësi të mirë për tejkalimin e krizës dhe evitimin e zgjedhjeve të reja të parakohshme, vlerësojnë analistët e çështjeve politike e juridike. Fisnik Korenica nga Grupi për Studime Juridike dhe Politike thotë se në rastin e parë, mandatari, sipas interpretimit të Kushtetueses do t’i takojë PDK-së, si partia shumicë e dalë nga rezultati i zgjedhjeve. “Në rastin e parë, presidentja e Republikës e ka një pozicion pasiv. Koalicioni më i madh parazgjedhor e që ka njëkohësisht numrin apo shumicën relative të deputetëve në Kuvend bën një propozim për emrin e mandatarit dhe presidentja këtë propozim e dekreton duke qëndruar në këndin e shikuesit dhe duke mos pasur rol në ndërtimin e ndonjë konsensusi jashtë apo përtej propozimit që vjen nga partia apo koalicioni më i madh parazgjedhor”, ka thënë Korenica. Në vendimin e Kushtetueses një interpretim më i gjerë i është bërë rastit të dytë të caktimit të mandatarit, nëse partia e parë, fituese e zgjedhjeve nuk arrin të sigurojë miratimin e Kuvendit për zgjedhjen e qeverisë. Në rastin e dytë del në pah roli aktiv i presidentes, e cila do t’i konsultojë partitë politike, pa dallim, dhe më pas në bazë edhe të vlerësimit të saj, do të përcaktohet se kë do të mandatojë për krijimin e qeverisë, në bazë të perceptimit të saj. Në këtë rast, vijon Korenica, presidentja sigurohet se ka një marrëveshje dhe ka një shumicë, kështu që bëhet edhe garantuese se mandatari i dytë ka siguruar të paktën 61 vota të deputetëve për formimin e qeverisë.”Te rasti i dytë, Gjykata i jep presidentes diskrecion. Ky diskrecion nuk i jep të drejtën presidentes që ta caktojë se kush është mandatari, por nënkupton që presidentja del në terrenin politik dhe aktivisht e kërkon një grup të partive politike të cilat së bashku janë në gjendje t’i garantojnë asaj se kanë numrin e mjaftueshëm të votave dhe janë në gjendje të formojnë qeverinë pavarësisht se cilat janë ato parti, pa asnjë përjashtim”, ka vlerësuar Korenica. Vendimi i Gjykatës Kushtetuese ishte kërkuar nga presidentja Atifete Jahjaga, e cila kishte kërkuar sqarime në lidhje me nenet përkatëse që përcaktonin dhënien e mandatit partive për krijimin e qeverisë. Sidomos, e diskutueshme ishte fakti nëse qeverinë mund ta formojnë edhe partitë jo fituese të zgjedhjeve, siç është rasti i koalicionit me LDK, AAK dhe Nisma të mbështetura edhe nga Lëvizja Vetëvendosje që po synojnë të krijojnë qeverinë e ardhshme pa PDK-së si fituese të zgjedhjeve.

Presidentja nuk mund ta çojë vendin në zgjedhje të jashtëzakonshme  

Vendimi i shumëpritur i Gjykatës Kushtetuese për mandatarin e ardhshëm të qeverisë që u bë i ditur të martën, u interpretua në forma të ndryshme nga ekspertë të drejtësisë, analistë dhe subjekte politike. Vendimi i Gjykatës Kushtetuese ishte që së pari të provojë të formojë qeverinë partia që ka fituar përqindjen më të madhe në zgjedhje e nëse ajo dështon, atëherë vendimi i mbetet Presidentes Jahjaga, që të vendosë sipas fuqisë politike që ka partia apo koalicioni. Pra, çështja mbetet mbi Presidenten e vendit, Atifete Jahjaga. Nëse Presidentja do të ndjekë rrugën kushtetuese, asaj i takon të mandatojë PDK-në, si partia fituese në këto zgjedhje dhe nëse kjo parti dështon që brenda 15 ditësh të marrë votat e duhura në Parlament, mandaton partinë e dytë që ka fituar më së shumti në zgjedhje, përkatësisht koalicionin LDKAAK- Nisma për Kosovën.

Rinumërimi i kutive nuk ndryshon rezultati  

Rinumërimi i 51 kutive të votimit, pas vendimit të Panelit Zgjedhor për Ankesa dhe Parashtresa për rinumërim, sipas Burim Ahmetaj, koordinator i Qendrës së Numërimit dhe Rezultateve nuk ka krijuar ndryshim të efektshëm në rezultatet në përgjithësi për votat e subjekteve politike dhe për kandidatët për deputetë. Rezultatet përfundimtare nga QNR-ja, u diskutuan në mbledhjen e djeshme të Komisionit Qendror të Zgjedhjeve, por nuk u përmend certifikimi i rezultateve përfundimtare të shpallura javën që shkoi. Në rend dite ishte edhe shqyrtimi i raportit të Auditorit Gjeneral për auditimin e pasqyrave financiare të KQZ-së për vitin 2013, dhe Planin e Veprimit për Zbatim të Rekomandimeve që dalin nga ky raport u la të diskutohet në një tjetër mbledhje.

PDK kërkon të çojë vendin në zgjedhje të jashtëzakonshme  

Përgjigja e Gjykatës Kushtetuese  karshi pyetjeve të Presidentes  duket se vetëm e ka komplikuar  edhe më shumë interpretimin  e Kushtetutës së Kosovës në veçanti  nenet 84 dhe 95 të saj. Edhe pse  Gjykata Kushtetuese në vendimin e saj të ri, së pari i jep të drejtën  për të pasur mandatarin që të krijojë  qeverinë ia ka dhënë PDK-së,  ajo nuk i përjashton këtë parti edhe  nga marrja për herë të dytë e kësaj  të drejte.

Megjithatë për herën e dytë e ka  lënë të vendosë Presidenten e Kosovës.  Analisti politik në vend, Imer  Mushkolaj ka thënë se e gjithë  kjo situatë i shkon më së shumti  për shtat PDK-së, pasi kjo parti  do ta çojë vendin në zgjedhje të jashtëzakonshme. “PDK do të provojë të krijojë qeverinë,  edhe pse nuk i ka numrat. Në  interesin e kësaj partie është që ta  çojë vendin në zgjedhje të jashtëzakonshme  dhe këtë do të provojë ta  bëjë”, tha Mushkolaj për “Zëri”.  Mushkolaj ka shtuar se nga zgjedhjet  e jashtëzakonshme fituesja  më e madhe do të dilte pikërisht  PDK-ja.  “Në atë rast, PDK-ja do të ishte fituesja  më e madhe, ndërkaq koalicioni  opozitar paszgjedhor do të ishte  humbës. Por, gjasat janë që problemet  të lindin që në tentimin e përzgjedhjes  së kryetarit dhe të kryesisë  së Kuvendit. Mbase koalicionit  opozitar i duhet të bëjë kompromis  në këtë fazë, nëse nuk dëshiron  zgjedhje të jashtëzakonshme”,  ka përfunduar ai.

Arsyet pse LDK nuk bëhet më me Thaçin  

Anëtari i kryesisë së LDK-së,  Arben Gashi, ka shpjeguar  se pse askush nuk dëshiron  marrëveshje me kryeministrin në largim, Hashim Thaçin. Nëpërmjet  një postimi në Facebook ka shkruar  për gënjeshtrat, siç thotë ai, që  kryetari i PDK-së u ka bërë: LDKsë,  AAK-së,VV-së si dhe NISMËS.  Ai në postimin e tij ngre shumë  pikëpyetje sepse askush nuk do marrëveshje me Thaçin. Ka gënjyer  LDK-në për çështjen e Presidentit dhe të zgjedhjeve, AAK-në  për çështjen e Kryeministrit, Nismën  për çështje Limaj, Lëvizjen Vetëvendosje  për çështjen e decentralizimit  dhe të negociatave etj. Dhe  me e keqja te të gjitha bisedat edhe  private me spektrin politik të Kosovës,  në momente debati politik i  ka keqpërdorur për interesa politike  personale dhe partiake, dhe për t’i  shkatërruar kundërshtarët politikë  me të cilët në një moment mund të  ketë pasur bashkëpunim.