Forcat ruse të sigurisë janë duke studiuar një video të publikuar nga një grup militant islamik që mori përgjegjësinë për sulmet vetëvrasëse të muajit të kaluar në Volgograd, dhe kërcënuan për sulme në Olimpiadën e ardhshme në Soçi.
Videoja u publikua në internet të dielën nga një grup militant nga Dagestani, një rajon me shumicë myslimane. Nuk dihet se kur janë filmuar pamjet e transmetuara në këtë video.
Në video, dy burra paralajmëruan presidentin Vladimir Putin se ata i kanë përgatitur atij një “dhuratë” për Olimpiadën Dimërore në Soçi. Dy burrat e paraqitur në video morën përgjegjësinë për sulmet vetëvrasës me bomba të muajit të kaluar në Vollgograd, në të cilat u vranë 34 vetë. Pretendimet e tyre nuk janë konfirmuar nga mediume të pavaruara.
Në një zhvillim tjetër, punonjësit e një hoteli në Soçi i thanë gazetarëve se kanë parë afishe në të cilat kërkohet një grua nga Dagestani. Ajo është përshkruar si një e ve 22-vjeçare e një militanti të vrarë nga forcat ruse të sigurisë vitin e kaluar. Në deklaratën e shpërndarë nga autoritetet thuhet se gruaja, e identifikuar si Ruzanna Ibragimova, mund të jetë në Soçi ose afër tij dhe mund të jetë duke planifikuar kryerjen e një sulmi.
http://youtu.be/zviTlMFJW_w
