FBI-ja ka shpallur në kërkim ndërkombëtar një shqiptar, i cili akuzohet për mashtrim. Mediet amerikane bëjnë me dije se një shqiptar dhe gjashtë rumunë kanë përfituar miliona dollarë nëpërmjet mashtrimeve në internet. Mësohet se në kërkim është shpallur shqiptari Fabjan Meme. Grupi i “mashtruesve” ka arritur që përmes internetit, të përfitojnë miliona dollarë, ku kanë mashtruar qindra amerikanë, duke u shitur automjete dhe varka të shtrenjta, por që në fakt nuk ekzistonin.
Interpoli ka kërkuar ndihmën e FBI-së për kapjen e këtyre personave, ndërsa kreu i grupit ishte rumuni Nicolae Popescu.
Ata përdornin dokument false për t’u bërë më të besueshëm për klientët, ndërsa mësohet se nëpërmjet skemës kanë mundur të përfitojnë mbi 3 milionë dollarë. Ata kishin hapur disa llogari bankare përmes identiteteve të rreme, në të cilat transferonin paratë kryesisht në bankat amerikane.
I dyshuari si koka e grupit, 32-vjeçari Popescu është person me precedentë penalë në fushën e krimeve kibernetike. Ai rezulton të jetë arrestuar në 2010 nga autoritetet rumune, por shkak të disa procedurave burokatrike kishte fituar lirinë. Në të njëjtin vit shqiptari, Fabjan Meme, u shpall në kërkim, pasi ai u akuzua për mashtrim me transferta parash, pastrim parash, falsifikim pasaportash.
