Kryetari i Kuvendit të Kosovës, Jakup Krasniqi, priti sot në një takim një delegacion nga Mali i Zi, i kryesuar nga Igor Llukshiç, zëvendëskryeministër dhe ministër i Punëve të Jashtme dhe Integrimeve Evropiane. Duke shprehur kënaqësinë për këtë vizitë, kryeparlamentari Krasniqi në fillim theksoi se marrëdhëniet ndërmjet Kosovës dhe Malit të Zi janë mjaft të mira, por ekzistojnë mundësi që këto marrëdhënie të avancohen edhe më tej. “Në këtë frymë ekziston gatishmëri për thellim të vazhdueshëm të bashkëpunimit, që vjen si obligim dhe vullnet, si nga fqinjësia e mirë, ashtu edhe nga fakti që në shtetet tona jetojnë përkatësisht komunitetet shqiptare dhe malazezë”, tha ai. Duke i bërë një vështrim të kaluarës së dy vendeve, Krasniqi theksoi se gjithnjë duhet të reflektojmë nga ajo që na bashkon edhe gjatë historisë, por edhe sot duke u angazhuar për raporte të mira, të ardhme më të mirë, jo vetëm ndërmjet dy shteteve, por edhe në tërë Rajonin. “Në këtë aspekt, komunitetet pakicë asnjëherë nuk shikohen si pengesë, por si mundësi për bashkëpunim”, u shpreh ai. Lidhur me çështjen e njohjes me Kushtetutë të komunitetit malazez dhe të drejtës së tij për të pasur një vend në Kuvendin e Kosovës, të ngritur nga Llukshic, kryeparlamentari Krasniqi tha se kjo çështje do të zgjidhet me ndryshimet kushtetuese. Në këtë kontekst, Llukshiç tha se shoqëria malazeze ka gatishmëri për realizimin e të drejtave për bashkësinë shqiptare në Mal të Zi, njofton zyra e shtypit e Kuvendit të Kosovës.
Zëvendëskryeministri dhe ministri i Punëve të Jashtme dhe Integrimeve Evropiane, Igor Llukshic, theksoi se kjo vizitë është një kontribut për marrëdhënie edhe më të mira ndërmjet Malit të Zi dhe Kosovës. “Me Qeverinë e Kosovës do të bisedohet për projekte konkrete në lëmin ekonomik, kulturor etj.”, theksoi Llukshiç.
Bashkëbiseduesit ishin unikë në vlerësimin se përpjekjet që bëhen nga dy shtetet drejt integrimit evropian dhe ndihma që mund të ofrohet në këtë shteg do të sjellin prosperitet dhe do të forcojnë bashkëpunimin e ndërsjellë.
