Qeveria po shqyrton mundësinë e trajtimit financiar shtesë për Task Forcën Speciale, e cila është në vijën e parë të luftës kundër krimit të organizuar me operacionin kombëtar “Forca e Ligjit”.

Një fakt të tillë e bëri me dije Ministri i Brendshëm, Fatmir Xhafaj, në Konventën e Bashkëpunimit Policor në Evropën Juglindore.

Xhafaj: Që nga fillimi i këtij operacioni në Nëntor të vitit të kaluar, në zbatim të këtij Plan Veprimi, lufta kundër krimit të organizuar ka marrë një dinamikë dhe dimension tjetër. Rezultatet e arritura, edhe në bashkëpunim me partnerët ndërkombëtarë kanë qenë vërtetë inkurajuese, duke u përballur dhe goditur një sërë grupesh kriminale të rrezikshme, të cilat ushtronin veprimtarinë e tyre në Shqipëri, por edhe jashtë territorit tonë.

Xhafaj tha se policia shqiptare po investon seriozisht në forcimin e kapaciteteve njerëzore dhe logjistike të hetimit, si garanci në rritjen e zbulueshmërisë së veprimtarisë kriminale dhe vënien para përgjegjësisë të autorëve.

Xhafaj nenvizoi se rajoni dhe Evropa përballen me sfida te ndryshme të sigurisë. Por, krimet e rënda, krimi i organizuar, terrorizmi dhe flukset migratore përbëjnë padyshim sfidat më të mëdha të cilat kurrsesi nuk mund të adresohen të vetme.

Karakteri ndërkufitar, madje transnacional i tyre bën domosdoshmëri bashkëpunimin dhe koordinimin e energjive të përbashkëta, theksoi Xhafaj.

Xhafaj: Për fat të keq, natyra delikate e këtyre sfidave dhe interesat që preken nga forca reaguese e Policisë ndaj tyre, shkaktojnë shpesh herë sulme frontale ndaj Policisë, akuza, përbaltje dhe goditje të llojeve të ndryshme jo rrallë edhe nën influencën e vetë grupeve kriminale, ndaj ekipeve drejtuese dhe operacionale qe veprojnë në fushën e rendit dhe sigurisë.

Ministri i Brendshëm deklaroi gjithashtu se Evropa po përballet me flukse migratore nga vende të Afrikës Veriore, Lindjes së Mesme dhe Azisë.

Kjo, tha ai, ka patur një impakt të drejtpërdrejtë, si në nivelin politik, ashtu dhe atë praktik.

Xhafaj: Lëvizje populiste dhe anti-migratore kanë shënuar rritje ashtu siç kanë shënuar rritje dhe veprimtaritë e paligjshme dhe rrjetet kriminale të kontrabandimit të migrantëve, të trafikimit të qenieve njerëzore, trafikimit të armëve, etj.

Rreziku terrorist dhe format e ndryshme të ekstremizmit të dhunshëm janë bërë gjithashtu shoqëruese të këtyre fenomeneve. Të gjitha këto, kanë shtuar ndjeshëm barrën dhe pritshmëritë mbi agjencitë ligj zbatuese.

Ndërkohë që ne, politikanët, diskutojmë për zgjidhje rreth tyre apo për të fituar popullaritet në elektorat, përgjegjësia e vërtetë bie mbi ju!

Jeni ju Policia, linja e parë, me të cilët emigrantët përballen në kufi, e bashkë me to dhe kontrabandistët, krimin e organizuar trafikantët dhe terroristët potencialë!

Fatkeqësisht, adresimi i këtyre sfidave, përveç risqeve dhe kohës së mundimshme që kërkojnë, has edhe në sfida të tilla që lidhen më shumë me të shkuarën sesa kohët moderne në të cilat jetojmë.

Takimi i sotëm vjen dy ditë përpara Ministerialit të Ministrave të Brendshëm dhe Sigurisë të rajonit, i cili do të mbahet në Tiranë, i fokusuar në sfida të rëndësishme me të cilat jemi duke u përballur, siç janë krimet e rënda, migracioni dhe terrorizmi.

Një grupim prej 50 organizatash, aktivistë të të drejtave të grave dhe vajzave si dhe qytetarë kërkuan zbardhjen e plotë dhe pa zbarritje të ngjarjes së dhunimit të Xhisiela Malokut nga djali i deputetit socialist.

Përfaqësi të këtyre organizatave i bënë thirrje Prokurorisë të kryejë hetime të shpejta me qëllim vënien e autorëve të dhunës përpara përgjegjësisë penale.

“Kërkojmë nga prokuroria të hetojë me paanësi, përgjegjshmëri me qëllim që çdo person që ka shkelur ligjin pavarësisht statusit të tij, funksionit politik, apo veshjes kriminale të vihet para përgjegjësisë penale”.

Ndërkohë Qëndra për Nisma Ligjore Qytetare tha se i ka ofruar vajzës shërbim ligjor falas me dy nga avokatët e saj.

“Ky shërbim është pranuar të merret nga viktima Xhisiela Malokut.Do ofrojmë dhe shërbime të tjera për të cilat ajo mund të ketë nevojë si shërbime psikologjike falas për atë dhe anëtarët e tjerë të familjes, etj”.

Policia ka arrestuar Rexhep Rrajën pas denoncimit të Xhisiela Malokut por përkundër denoncimit të saj për dhunë, policia aktualisht ndaj tij ka ngritur vetëm akuzën e përndjekjes.

Gjeorgjia dhe Shqipëria janë dy vendet kryesore të origjinës të listës së azilkërkuesve në Irlandë këtë vit, pas ndryshimeve në modelet e migracionit ndërkombëtar, shkruan gazeta britanike “The Sunday Times”.

Rritja e kërkesave për azil dhe vonesat në strehimin e refugjatëve, kanë bërë që qeveria të ngrejë qendra të reja për pritjen e drejtpërdrejtë të emigrantëve, masë e cila merret për herë të dytë brenda vitit.

Ministri i emigracionit dhe integrimit David Stanton javën e kaluar tha se qeveria kishte rritur numrin e hapësirave të tilla me 646 gjatë vitit të kaluar duke hapur qendrat e pritjes në Lisdoonvarna, Co Clare dhe Moate në Co Westmeath, por që “javët e fundit numri i njerëzve që aplikojnë për mbrojtje ndërkombëtare u rrit në Irlandë”.

Numri i shqiptarëve që aplikuan për azil në Irlandë në 8 muajt e parë të këtij viti, ishte 235 persona, shifër që i rendit të dytët pas gjeorgjianëve. Shtimi i numrit të aplikimeve nga viti i kaluar për shqiptarët është 50% nga e njëjta periudhë e vitit të kaluar.

Një zyrtar për agjencitë ligjzbatuese në Irlandë tha se “nuk ka persekutim të këtyre njerëzve për arsye etnike apo për çështje fetare”, duke shtuar se shqetësimi kryesor janë elementët kriminalë në radhët e tyre.

Gjithsesi, Këshilli Irlandez për Refugjatët thotë se ky nuk është një fenomen i izoluar, sepse azilkërkuesit shqiptarë dhe ata gjeorgjianë janë shtuar ndjeshëm edhe në Francë dhe Gjermani.