I ashtuquajturi ” Cikli diplomatik “, një grup prej 23 ish-ambasadorësh grekë, shumica e të cilëve kanë shërbyer në postet kyçe jashtë vendit, i ka dorëzuar, pasditen e djeshme, një letër kryeministrit grek, Antonis Samaras, duke iu referuar të gjitha çështjeve të politikës së jashtme dhe duke paralajmëruar se kriza financiare nuk duhet t’u heqë rolin prioritar çështjeve kombëtare të Greqisë, raporton “Koha.net”.

Letra është nënshkruar midis të tjerave, nga ish-ambasadori grek në Turqi dhe ish-kreu i Shërbimit Informativ Kombëtar, Joanis Korantis, Konstantinos Politis, ish-ambasadorë në Shqipëri dhe ish-ambasadorë në Beograd dhe Qipro, raporton “Top-Channel”.

Midis çështjeve kombëtare për Greqinë, si marrëdhëniet me Turqinë, Shkupin dhe çështjen qipriote, një vend të rëndësishëm në këtë letër zënë marrëdhëniet me Shqipërinë.

Ish-ambasadorët kujtojnë se Shqipëria është një vend i krijuar nga Fuqitë e Mëdha në 1913 dhe deri tani nuk ka treguar një qëndrim miqësor ndaj Athinës, duke u bërë një shtet problematik për Greqinë që nga formimi i tij.

“Pas zhvillimeve pozitive për Tiranën në çështjet e Kosovës dhe Shkupit, rivaliteti i Tiranës me Athinën rritet gjithmonë e më shumë”, – kanë thënë ish-ambasadorët.

Sipas ish-diplomatëve grekë, “ndihma në anëtarësimin në NATO, pa asnjë shkëmbim si dhe mbështetja për integrim në BE, në të njëjtën mënyrë, duke lënë të ngrirë çështjen vorioepiriote, ka rritur ambiciet e Shqipërisë dhe kjo duket në radhe të parë me udhëheqësit Berisha dhe Rama, udhëheqës tipikë-ballkanikë, të zhdërvjellët, që më shumë kanë korrur fitime të konsiderueshme politike, pa asnjë shkëmbim nga kontaktet me Athinën zyrtare”.

Për çështjen çame, ish-ambasadorët, ndërsa rikujtojnë se, “kjo popullsi myslimane duhej të ishte dëbuar në Turqi sipas marrëveshjes të Lozanës, theksojnë sa kanë bashkëpunuar me italianët dhe gjermanët në Luftën e Dytë Botërore dhe më pas kanë shkuar në Shqipëri dhe se shumica e politikës shqiptare e konsideron këtë periudhë historike si çështje holokausti për shqiptarët”.

Këshilla përfundimtare që ish-diplomatët i japin kryeministrit grek është që Athina të korrigjojë gabimet e së kaluarës dhe të jetë më e kujdesshme me synimin e Tiranës për integrimin në BE.

Gjatë mbledhjes së sotme Komisioni i Ekonomisë ka vendosur të heqë bonuset e transportit për zyrtarët. Por ky vendim është shoqëruar me debat mes mazhorancës dhe opozitës, ku këta të fundit e kanë kundërshtuar.

Me këtë veprim, qeveria synon të kursejë 165 milionë lekë të reja. Vendimi bën fjalë për drejtuesit e bashkive dhe komunave, gjyqtarët, prokurorët, funksionarët e sistemit ushtarak dhe policor, si dhe titullarët e disa institucioneve qendrore dhe të pavarura, si dhe universiteteve.

Debati

Ervin Koçi: Synimi i projektligjit është ofrimi i shërbimit të transportit për funksionarët publik, duke shfrytëzuar mjete në dispozicion të institucioneve. Kjo masë do t’i kursej buxhetit të shtetit 165 milionë lekë të reja në vit.

Ridvan Bode: Nuk keni për të kursyer gjë, se vetë e thoni në relacion, që këta funksionarë publik me përjashtim të deputetëve, të gjithë të tjerëve që ju hiqen bonuset do të trajtohen me makina me shërbime nga vetë dikasteret. Kjo është nuk kursim, por mbishpenzim.

Deputet i PD-së, Edmond Spaho: Për të qëndruar shtrembër dhe për të folur drejt, kryeministri mund të mos i kishte bërë ato shpenzimet për kryeministrinë, sepse e gjeti fare mirë kryeministrinë, për të punuar aty. Ato para që janë disa herë më shumë, se këto kursime që sjell ky projektligj t’i kishte kaluar në të tjera vendime.

Pjerin Nderu: Në mungesë të argumentit, me shpenzimet marramendëse që keni bo, i quaj qesharake disa kursime, sado të vogla të  jenë, modeste, por që duhen sepse e keni lënë zero. Dhe ju mundoheni të shisni një përmirësim kushtesh në kryeministri, që s’ka lidhje fare me buxhetin e shtetit.

Ridvan Bode: A e di ti që në 3-mujorin e fundit atë që kini programuar është një ulje, në krahasim me vitin e kaluar, me paktin e vitit të kaluar prej 8 për qind.

Ervin Koçi: Jo, jo gënjen

Ridvan Bode: Po gënjen ti ore, mos më thuaj mua gënjen kokërrotë. Mos më thuaj mua gënjen unë të të jap shifrat.

Ervin Koçi: Jo, jo s’është e vërtetë fare

Ridvan Bode: Ore ti i kë trutë në vend

Ish-kryeministri Sali Berisha ka vijuar akuzat ndaj vendimeve të qeverisë së re. Ai ka akuzuar vendimin e qeverisë Rama-Meta në lidhje me hetimin. Sipas Berishës ky vendim i ndërmarrë është në kundërshtim me Kushtetutën e vendit. Berisha thotë se ky ligj i merr Prokurorisë hetimin dhe ia kalon atë Policisë së Shtetit. Sipas Berishës në krye të hetimeve do të qëndrojë vetë Edi Rama, i cili do të jetë kryehetues i shtetit. Këto deklarata Berisha i ka bërë në rrjetin social Facebook, ku ka shtuar se sipas këtij ligji i bie që Rama të hetojë veten.

“Vendim heroik: Rama vendos për hetimin e tij! Të dashur miq, mazhoranca Rama – Meta hartoi ligjin e ri antikushtetues të krijimit të FBI-së në Shqipëri, pra byrosë kombëtare të hetimit. Në kundërshtim me Kushtetutën e vendit, nenin 163 të saj, që thotë se Prokuroria ushtron ndjekjen penale, ky ligj i merr Prokurorisë hetimin dhe ia kalon atë Policisë dhe sipas tij, jo kryepolici, por kryeministri i vendit do të jetë dhe kryehetuesi i shtetit. Rama i kthehet kështu pasionit të atit të tij shpirtëror Enver Hoxhës dhe dajë Kolekës. Por kjo është vetëm njëra anë e zezë e medaljes apo sakrificës së Edi Ramës. Ana tjetër sterrë e saj është fakti që do jetë Rama, vetë ai, i cili do të vendosë për hetimin e Presidentit të Republikës, bashkëkryetarit të mazhorancës Meta dhe ministrave të tij. Por prisni sakrificën sublime të Edvinit! Sipas këtij ligji, dhe mos kujtoni se po tallem, do të jetë Rama kryehetuesi i shtetit, i cili do të vendosë për hetimin dhe do të hetojë Ramën kryeministër të vendit. Ky është një akt heroizmi socialist. Rama do të vendosë për hetimin e tij. Miq, këto janë karnavalet e pushtetit Rama – Meta! Sb”, shkruan Berisha.