Gjykata e Gjirokastrës ka lënë në burg 3 nga 4 të dyshuarit për sulmin me armë ndaj autobusit të linjës Tiranë-Athinë.
Kështu gjykata ka dhënë masën e sigurisë “burg pa afat” për Klajdi Tringën 20 vjeç, Jurgen Lolën 22 vjeç dhe Besmir Ruçin 23 vjeç ndërsa pritet të japë masën edhe për Gentian Beqirajn 24 vjeç.
Autobusi i linjës Athinë Tiranë u sulmua nga tre të rinj në orët e para të datës 27 janar pranë fshatit Kras, vetëm 20 km larg qytetit të Tepelenës. Autorët e krimit nën efektin e narkotikëve i kanë bërë pritë autobusit dhe pasi kanë parë se autobusi ka vijuar rrugën kanë qëlluar drej tij ku si pasojë 25-vjeçar nga Elbasani Laurent Tabaku, humbi jetën, ndërsa një 19 vjeçare mbeti e plagosur.
Brenda 48 orësh policia e Gjirokastrës ka mundur të kryej identifikimin e autorëve dhe vënien e tyre në pranga. Të ndihmuar nga një 29 vjeçar i cili u ka siguruar armët dhe automjetin, tre të rinjtë kanë thurur planin e grabitjes në një lokal në fshatin Vasjar.
I riu i cili ka bashkëpunuar që në fillim me policinë është dhe personi që ka drejtuar mjetin e arratisjes, ndërsa dy të tjerët kanë marrë përgjegjësinë e kryerjes së operacionit të dështuar të grabitjes. Ekspertët e kriminalistikës, bejne me dije se ne baze te dyshmive, autoret kane patur si qellim të terrorizonin udhëtarët duke shfrytëzuar errësirën. Sipas tyre në ndryshim nga rastet e zakonshme të grabitjeve nuk është ushtruar presion ndaj objektivit, ndërsa vrasja ka qenë e pamotivuar.
