Shefi i Zyrës së Federatës Ruse në Prishtinë, Andrei Shugorov ka deklaruar se Rusia i ka kufijtë deri ku ajo mund të durojë, dhe se Perëndimorët i shkelën kufijtë e saj, ndaj dhe Rusia nuk ua fal këtë gjë.
“Askush nuk është i vetëdijshëm dhe nuk e ka kuptuar se Rusia i ka kufijtë deri ku mund të durojë. Kolegët perëndimorë i shkelën ata kufij”, -tha ai duke shtuar se “Rusia këtë nuk ua fal”!
Sipas Shugurovit, Rusia punoi 25 vjet me Perëndimin që të ketë raporte partneriteti, po kjo shkoi kot dhe Rusia nuk është gati më për kompromise në dëm të “vëllezërve sllavë”, -raporton “Blic”.
Shugorov ka hedhur akuza të rënda edhe për Kosovën, duke deklaruar se shkatërrimi i sovranitetit të shteteve të tjera filloi në Kosovë dhe Serbi, dhe se Rusia nuk do ta harrojë atë që ndodhi atëherë.
Duke folur në veri të Mitrovicës, përgjatë promovimit të një libri, Shugurov i vuri fajin Kosovës edhe për ngjarjet në Irak, Iran, Libi, Siri, Afganistan, Egjipt dhe Ukrainë.
“Shpresoj që nuk ju bie ndërmend lufta. Qëndrimi i Rusisë është parimor: Nuk do të ndërrojmë qëndrimin tonë ndaj Kosovës”, -deklaroi më tej Shugurov.
