Seanca e sotme parlamentare ka vijuar me debate mes ministrave të kabinetit Rama dhe ish Kreut të PD-së, Sali Berisha.
Ish-kreu i PD-së gjatë fjalës së tij theksoi se, ekonomia e vendit po shkon drejt një skenari grek duke paralajmëruar situatë të vështirë ekonomike. Ai akuzoi qeverinë e majtë se nuk është në gjendje të paguajë dot pagat, pensionet dhe ndihmat ekonomike.
“Sëmundjet kronike nuk shërohen, por kurohen. Shqipëria do të shkojë drejtë skenarit grek. Kryetari juaj tha se në dhjetor dalim nga rreziku. Por ju nuk po jepni dot rrogat pensionet. Për herë të parë, kjo nuk ka ndodhur asnjëherë. Pse po rrokullisni ekonominë e vendit? Nuk po investohet asnjë qindarkë në punë publike, nuk po hapet asnjë vend pune”,- deklaroi Berisha.
Ndërkohë që sot është bërë publike arrestimi dhe lirimi i shefit të IT-së së zyrës së tatimeve i denoncuar për fshirje të të dhënave nga Drejtoresha e Tatimeve Shehaj, Berisha deklaroi pikërisht të kundërtën se është kërkuar nga shefi i IT-së të dhëna pa procesverbal.
Në lidhje me “Belle Air” Berisha akuzoi qeverinë se ka prishur marrëveshjen mes shtetit dhe kompanisë së fluturimeve.
Debati në Kuvend mes Berishës dhe Ministrave Gjiknuri, Beqaj dhe Cani
Berisha: Nuk mund të merret e dhënë në këtë shtet pa procesverbal
Gjiknuri: Shqiptarët e dinë që ke gënjyer, se tek të dhënat e tatimeve ke futur duart
Berisha: Arrestuat si në vitet ‘50 shefin e IT së tatimeve.
Beqja: Këtë çështjen e serverave e dini mirë ju, se e bërë më 21 janar në mbrëmje. Më i rrezikshëm është ai që di keq. Meqë fole për sëmundje kronike, ju do të mbeteni doktori pacient i politikës shqiptare.
Berisha: Po i përmende serverin ai humbet logjikën.
Cani: Ka 5 vjet që ai 10 dollarëshi që derdhet për çdo biletë në buxhetin e shtetit nuk derdhet, është krijuar një borxh prej 5 milionë dollarë. Të mos paguash taksat është evazion, por t’i marrësh paratë tjetrit që nuk të takojnë është vjedhje. Ju jeni mësuar që të mos e zbatoni asnjë herë ligjin, por ne kemi ardhur për të zbatuar ligjin.
Kanë tentuar miq tua t’i fshijnë të dhënat, por aty janë. Një më një po ju vjen radha, nuk ka kush i fshin të dhënat.
Kur ju mërmërisnit për trimërinë me Alinë, unë jam takuar dhe kam paralajmërua ku do të shkonte ekonomia shqiptare. Kam fol me zë të plotë, ju vetëm keni mërmëritur. Atë pataten merreni se është e nxehtë mbajeni t’ju bëjë mirë.
Ju jeni rast tipik i pashërueshmërisë. Keni fol katër vjet për suksese imagjinare. S’ka ilaç. E pranoi Beqaj të heqë dot nga shërimi juaj.
Berisha: Këta janë vetëm për të bërë papagallin dhe për të përsëritur atë çka u mëson apo u dikton një krye papagall. Të dhënat kanë rregullin e marrjes së tyre.
Është gënjeshtër se keni dërguar audit, keni dërguar dy këshilltarë. Kur shefi i IT-së ka kërkuar zbatimin e rregullave, është kërcënuar se do të arrestohet. Pa procesverbal ka thënë nuk jap asgjë, si përfundim e arrestuan.
Sa i përket karrierës tuaj politike (i drejtohet Canit) nuk dua të hy, ti je njeriu që pasi u vodh thesari i bankës së shtetit, të cilin ju e kishit vendosur në raport të botuar se ekziston, dole u the shqiptarëve se banka nuk ka flori. Të shpëtoi Dhori Sollaku, se ti paguaje me verdhushkat e thesarit të Kërrabës.
