Ish-komandanti i UÇK-së Rexhe Krasniqi dhe një grup ish-luftëtarësh vizituan fshatin Gurrë të rrethit të Matit, ku sipas ish-prokurores së Hagës Carla Del Ponte është kryer trafikim organesh të ushtarëve serbë. Sipas Krasniqit, këto akuza janë produkt i absurditetit të kokave të sëmura.
“Lajmin në fjalë e mora vesh nëpërmjet mediave, pas luftës së Kosovës. Mund të them se ky është një absurditet i kohës, absurditet i kokave të sëmura. Sepse unë jam njëri prej atyre që kam qenë tërë kohës në Burrel si komandant i qendrës stërvitore në Mollxa. Në atë kohë në ballafaqoheshim me vështirësitë tona për të stërvitur ushtarët dhe për përballimin e furnizimit me ushqime dhe me armë dhe mjete të tjera.”- deklaroi Krasniqi.
Ish-komandanti i UÇK-së tha se “këta njerëz duhet të kryejnë vizita mjekësore, pasi imagjinata e tyre e sëmurë nuk ka asgjë të përbashkët me realitetin.”
Më pas zoti Krasniqi u shpreh se në shtëpinë ku pretendohet se janë kryer transplante, nuk mund të shkohet me mjete tokësore, por vetëm nga ajri, gjë që nuk ka qenë e mundur për UÇK-në.
