Kryetari i FRD-së, Bamir Topi komenton darkën me kryeministrin Edi Rama në një prej lokale në kryeqytet. Për kreun e FRD-së takimi midis dy liderëve është mese normal , ndërsa shprehet se “kur je në politikë patjetër do kesh takime”. Në një i9ntervistë për “News 24”, ish-presidenti kritikon sjelljen e PD-së ndaj qeverisë duke i sugjeruar asaj që të mos kritikojë për gjithçka qeverinë.
Zoti Topi, ka patur edhe reagime negative në shtyp, lidhur me deklaratat tuaja të fundit, sa i takon Ministrisë së Brendshme. A mendoni se është në ditët më të këqija të saj. Ju jeni shprehur që SHISH duhet të bashkëpunojë fort, në mënyrë që situatat të parandalohen…
Sot unë jam në një pozicion politik, i cili konsiderohet një pozicion në opozitë. Nuk është faji jonë që brenda një opozite të ekzistojnë pozicione të ndryshme për politikën, për punën e qeverisë dhe për nevojën e një bashkëpunimi të gjerë edhe për reforma tepër të rëndësishme. Nëse unë kam thënë që duhet një bashkëpunim institucional, të policisë, të rendit, të SHISH, kam thënë gjënë më normale. Unë besoj që ajo që duhet të funksionojë sot duhet të jetë inteligjenca, e cila duhet të vihet në funksion për të parandaluar. Duhet t’i lemë këto motivet e natyrës politike se kush e ka zgjedhur, kush e ka propozuar. por duhet të bashkëpunojmë. duke dashur ndonjëherë që politikanë të caktuar për të qenë oratorë. Ka edhe një shprehje shumë të mençur që thotë: Shteti është i fortë kur “dëgjon” ligjet dhe dëgjon pak oratorët.
Por, ministri më i goditur është ai i brendshëm, zoti Tahiri. Ju si e shihni punën e tij dhe reformat e fundit që janë bërë në policinë e shtetit?
Për zotin Tahiri unë do të thosha që është e domosdoshme që të shkëputet nga ekranet. Ka nevojë që ministri, ekipi të ndajë interpretimin politik të gjërave që bëhen në Parlament me pjesën profesionale që është policia. Policia duhet inkurajuar. Të mos i anatemojmë. Të mos e marrin në konsideratë si një moment debati punën e policisë.
Ju keni thënë që do jeni pjesë e opozitës, por opozitë që do bashkëpunojë. Dy reforma të rëndësishme janë ajo territoriale dhe ajo në drejtësi. Ç’mendim keni?
Ne do bashkëpunojmë me të gjitha forcat politike që dëshirojnë të bëjnë reforma në funksion të shtetit, të cilat në përgjithësi janë reforma kushtetuese. Ato kanë nevojë për konsultime të gjera. Ne do të japim kontributin tonë sipas programit që kemi ne, për të gjitha ato reforma, për të cilat ne jemi të dobishëm, sepse Brenda nesh ka politikanë me karrierë, por edhe ekspertë. Në rats se do të flasim për reformën territoriale, unë jam shprehur që është domosdoshmëri që Shqipëria ta realizojë reformën territoriale.
Jeni dakord për zgjerimin e njësive vendore…?
Unë që po ju flas, jam një nga anëtarët e Task-Forcës, që ka punuar për paketën e decentralizimit në vitin 1998, kështu që mund t’ju flas pa fund për problemet e decentralizimit. Sot bota shkon drejt decentralizimit.
Si ish-President o vendit, a duhet të riformatohet KLD…?
Unë duke patur një eksperiencë nga qenia kryetar i shtetit dhe ish-kryetar I KLD-së do të thosha që reforma në drejtësi duhet të ketë më shumë mendim profesional se sa emocione politike.
Është mëse imediate që të ketë një reformë tërësore në drejtësi. Jo se gjithçka fillon nga e para. dhe për të ardhur te KLD unë mendoj që është nevojë, sepse është e provuar që ka qenë prapë politika që duhet të kishte miratuar ligjin për Konferencën gjyqësore në vitin 2009..
Ngjarjet e fundit sidomos në rend kanë patur kritika të forta nga opozita, nga PD-ja veçanërisht…
Në fakt unë do të komentoja diçka që nuk mund të thuash për gjithçka qeveria ka dështuar, sikurse nga ana tjetër nuk mund të thuash që për gjithçka qeveria është në rregull. Por gjithsesi më mirë një qeveri e dobët se sa një vend në anarki. Padurimi për të vështirësuar gjithçka nuk besoj se është mënyra më e mirë.
A do të ketë një tjetër darkë me zotin Rama?
Ndonjëherë hiperbolizohen disa gjëra që janë fare normale. Kur je në politikë patjetër do kesh takime. E rëndësishme është që këto takime të jenë të hapura. Të mos bëhen për qëllime të diversioneve politike. Pra, një njeri që ka për të shprehur diçka i shpreh në një darkë, nëpër studio, kur je i orientuar tek principet. Në rast se je pastaj tek konjukturat e çastit, që në fakt nuk është në natyrën tonë, pastaj rezultatet duket sikur vijnë, por mbeten në fakt shumë larg.
*Shekulli
