Vendosmani dhe mua tritolin

Të qartësohemi qysh në fillim. Nuk kam makinë. Lëviz zakonish më këmbë, me autobuz, dhe nëse kam lekë dhe më duhet të shkoj diku shpejt, marr taxi. Shtëpinë e kam në Tiranë të Re, punën e re diku andej nga 21 Dhjetori. Mëkate kam bërë pa fund, që nga fëmijëria e deri më sot. Kam sharë, kam vjedhur, kam gënjyer, kam plagosur, kam vrarë, jam koruptuar, kam përdhunuar…Jam munduar që armiqtë ti bëj miq por gjithësesi nuk ka funksionuar përsosmërisht. Nëse e kam tepruar me ndonjë nga ju hasmit e mi, merrni masa që C4 të mos e vendosni as te hyrja e pallatit, as te autobuzi, as te zyrat e punës. Tregohuni vrasës racionalë dhe të logjikshëm, shënjestra duhet të jem vetëm unë dhe nuk dua që për shkakun tim dikush tjetër të plagoset e të mbetet pa krahë e këmbë siç keni bërë zakonisht. Mos merrni me qera vrasës profesionistë dhe lekët që do paguani për atentatin ndaj meje përdorini për një kauzë më të hajrit. Provokoni si fillim ndonjë sherr dhe më shani, sepse edhe mua s’më rri goja. U shaj dhe unë dhe këtë përdoreni si pretekst. Llogariteni mirë kohën, sasinë e tritolit, shpërthimin dhe eleminimin. Mendoj se më bukur do ishte një kallëp dinamiti në xhepin e palltos time kur e marr nga pastrimi kimik ose nëse porosis ndonjë pizzë vendoseni brenda kutisë poshtë saj kur ma sjellin në shtëpi. Do u lutesha të ishit të suksesshëm. Do më pëlqente të tregoheshit të saktë dhe të mbaronit punë si burra, jo si frikacakë. Po u le një amanet. Më vdisni totalisht, s’dua të mbetem sakat pa kokë, pa këmbë, pa duar… Ashtu do më gjymtoni edhe jetën,ashtu do gjymtonit dhe do mundonit edhe veten tuaj. Do më shikonit për së largu në ndonjë karrocë e do të trembeshit deri në palcë. Megjithëse rrini rehat, edhe po shpëtova i gjallë nuk flas, nuk denoncoj, nuk hakmerrem, nuk do quravitem nëpër policira, prokuroria dhe gjykata sepse edhe ata kurva si ju janë. Të vrasin pas shpine zyrtarisht dhe ligjërisht. Vetëm po të jeni burra tregohuni të tillë deri në fund. Pas atentatit hapni fjalë që e bëtë për panik, për të poshtëruar jo mua, por Sajmir Tahirin. Dhe paskësaj Berisha do ulërasë në parlament: Ju jeni qeveria e tritolit, ju po vrisni edhe njerzit tuaj!!!

Link origjinal