Meta rrëfen dhunën një natë para zgjedhjeve në Laç dhe çfarë ndodhi në Policinë e Lezhës

20

meta-braho-1024x677Në një intervistë dhënë mbrëmë në studion e televizionit TCH, Ilir Meta është pyetur edhe për thirrjet që ai dhe Rama bënë ndaj policisë ditën e votimit, të cilat u  konsideruan nga PD e Berishës si sulme. Në këtë pikë Meta tregoi një episod para natës së vrasjes së mbështetësit të kësaj partie në Laç.

“Një natë më parë, 7 mbështetës të LSI dhe PS u goditën dhe u keqtrajtuan fizikisht nga elementë kriminalë, – këtë e them me bindje – të PD-së. Unë shkova atë natë në spitalin e Lezhës ku ata u dërguan. Bashkë me Spartak Brahon shkuam më pas në zyrën e drejtorit të policisë së Lezhës në mesnatë. Fola me të për ato që na kishin treguar mbështetësit e plagosur. Nuk bëmë asnjë deklaratë për shtyp, nuk e bëmë publike, sepse donim që njerëzit të ishin të qetë të nesërmen. Por i thashë drejtorit të policisë që sipas atyre që dëshmuan të plagosurit, të nesërmen mund të kishte dhunë. Dhe ata nuk morën asnjë masë. E dinin. Ai qytetari u vra në mënyrë të pafalshme, sepse nuk u mor asnjë masë. Dhe kur ndodhi, atje ku ishte KZAZ kryesore e Laçit nuk kishte asnjë polic. Kjo është e pafalshme. Kjo ishte arsyeja që ne dolëm dhe bëmë ato thirrje për policinë”, tha Meta. / Gazeta Dita/