Vetëm pak orë pas arrestimeve dhe shpalljeve në kërkim të disa nëpunësve të larte të Ministrisë së Punës fakte të tjera mbi abuzimet bëhen publike.
Brenda Ministrisë së Punës ndodhej një apartament “suite relaksi”, me pajisje nga më luksozet. Ndërkohë që kompjuteri i Shefit të Kabinetit ka zbardhur afera të tjera me abuzime në fonde, vjedhje dietash deri në 1500 euro ne ditë, në udhëtime të rreme dhe fryje të numrave të personave me probleme fizike për të përfituar nga skema e mashtrimit nëpërmjet pensioneve që këtyre personave iu takon me ligj.
Ndërkohë deponimet e personave të shkarkuar sepse nuk pranonin të bëheshin bashkëpunëtorë në vjedhje kanë folur për një arrogancë dhe mospërfillje ligjore të personave që kryenin vjedhjet. Fjalori i përdorur nga këto persona ishte ‘burgu për burra është’ gjatë kohës që kryenin abuzimet.
Personat në fjalë kanë deponuar gjithashtu se kanë denoncuar këto vjedhje edhe te Kabineti i Berishës, por kanë dalë që andej me një përgjigje se ‘ nuk ka shkelje’, çka vërteton dhe njëherë skemën e ngritur në piramidën e sistemit.
