Ministria e Jashtme greke ka shprehur mbështetjen për dhënien e statusit Shqipërisë. Lajmi është bërë i ditur nga një njoftimi në faqen zyrtare të Ministrisë së Jashtme greke, ku ka bërë të ditur se Athina zyrtare ka përkrahur në takimin e ministrave të jashtëm në Bruksel, dhënien e menjëhershme të statusit kandidat për anëtarësim Shqipërisë.
Sipas deklaratës për shtyp zv. Kryeministri dhe njëkohësisht Ministri i Jashtëm Evangjelos Venizelos ka udhëzuar Ambasadorin e Greqisë në Tiranë, z. Leonidhas Rokanas, të informojë qeverinë shqiptare për pozicionimin e Athinës në Këshillin e Çështjeve të Përgjithshme në favor të dhënies së menjëhershme Shqipërisë, të statusit të vendit- kandidat për anëtar të BE.
Gjithashtu në pajtim të qëndrimeve të 28 shteteve anëtare të BE-së, ky Këshill ka vendosur të diskutojë marrjen e këtij vendimi para fundit të presidencës greke, përkatësisht në qershor të vitit 2014. Në njoftim thuhet gjithashtu se Greqia është e gatshme të japë të gjithë ndihmën e mundshme për Shqipërinë për të përmbushur kushtet e vendosura nga BE-ja, ndërsa shprehet edhe gatishmëria e Athinës për t’i ofruar Shqipërisë çdo mbështetje dhe gjithë ndihmën e mundshme, në mënyrë që ajo të përmbushe kushtet që i janë vënë Tiranës nga BE-ja.
