Partia Fryma e Re Demokratike, ka mbledhur në këto momente Kuvendin e parë Kombëtar, që sipas Kryetarit të FRD-së Bamir Topi, do të shënojë një fazë tjetër të intensifikimit të kontakteve me njerëzit. Sipas tij, ky është momenti që të orientohen qytetarët në një rrugë të drejtë, në mënyrë që më 23 qershor ti jepet fund politikës që deformon, politikës që tregton deputetë, politikës pa dinjitet e moral.
Në Kuvendin e sotëm FRD, sipas Topit, do të shpalosë filozofinë politike dhe programin përkatës, që ka marrë miratimin e të gjitha strukturave dhe shpreh interesat e qytetarëve.
Vetëm 3 ditë para mbledhjes së Kuvendit Kombëtar, FRD mblodhi Asamblenë Kombëtare ku u miratuan: rregullorja e brendshme e FRD-së; përbërja e Komisionit të Përhershëm Statutor; miratimi i propozimit, që do t’i drejtohet Kuvendit Kombëtar të FRD-së, për mandatimin e strukturave ekzistuese në nivel qendror dhe vendor të FRD-së; miratimin e listës së plotë të kandidatëve për deputetë të FRD-së sipas propozimit të kryesisë së degëve të FRD-së.
Pritet të bëhet publike së shpejti lista e miratimit të deputetëve gjatë zhvillimit te Kuvendit të sotëm./a.b/
