Kryeministri Edi Rama priti sot në takim, Presidentin e Bullgarisë Rosen Plevneliev. Në takim u vlerësuan marrëdhëniet shumë të mira midis dy vendeve, që ngrihen mbi miqësinë e hershme. Mbi këtë bazë, u shpreh vullneti reciprok për t’i zgjeruar e thelluar më tej këto marrëdhënie, veçanërisht në sferën ekonomike dhe të projekteve me rëndësi rajonale e më gjerë.

Presidenti Plevneliev, teksa nënvizoi se e njeh dhe e vlerëson punën që zoti Rama ka bërë për Tiranën, në detyrën e tij si kryebashkiak, u shpreh se me eksperiencën e frytshme dhe ndryshimin që solli për Tiranën, do të sjellë ndryshime pozitive edhe për vendin.

Kryeministri Rama i shprehu Presidentit Plevneliev mirënjohjen për mbështetjen që Bullgaria i ka dhënë Shqipërisë në rrugën e saj të integrimit europian. Kryeministri theksoi se qeveria shqiptare mirëpret çdo kontribut të mëtejshëm në këtë proces.

Nga ana e tij, Presidenti Plevneliev garantoi për mbështetjen mëtejshme dhe se Bullgaria ka kënaqësinë të ndajë me Shqipërinë, përvojën e saj të integrimit.

Kryetari i Kuvendit Ilir Meta priti sot në Kuvend Presidentin e Republikës së Bullgarisë Sh.T.Z. Rosen Plevneliev, me të cilin biseduan mbi marrëdhëniet shumë të mira mes dy vendeve, forcimit të  bashkëpunimit dhe zhvillimeve në rajon. Kryetari i Kuvendit Meta pasi i uroi mirëseardhjen në Tiranë, i shprehu Presidentit Plevneliev mirënjohjen e thellë për mbështetjen e fuqishme të Bullgarisë në kuadër të proceseve integruese të Shqipërisë.

Kryetari  Meta u shpreh se Shqipëria është e vendosur të avancojë me reformat e nisura, dhe në këtë drejtim vlerësohet forcimi i bashkëpunimit konkret mes Shqipërisë dhe Bullgarisë, jo vetëm në kuadër të procesit të integrimit evropian, por veçanërisht në funksion të thithjes së investimeve të huaja dhe forcimit të stabilitetit në rajon.

Presidenti Plevneliev u shpreh se Bullgaria qëndron përkrah Shqipërisë, duke theksuar se avancimi i merituar dhe zhvillimi i Shqipërisë është histori suksesi për të gjithë rajonin. Në këtë kuadër, Presidenti Plevneliev nënvizoi se përqasja rajonale është kyçe për mirëqenien dhe zhvillimin ekonomik të të gjithë vendeve të rajonit tonë.    Në përfundim, Kryetari i Kuvendit të Shqipërisë z. Ilir Meta dhe Presidenti i Bullgarisë z. Rosen Plevneliev ndanë bindjen e përbashkët se intensifikimi i bashkëpunimit bilateral dhe rajonal duhet përqendruar në rivitalizimin e projektit të Korridorit VIII, me fokus në fushat e energjisë dhe infrastrukturës.

“Niveli i lartë i korrupsionit në gjyqësor pengon seriozisht funksionimin e duhur të sistemit të drejtësisë dhe minon besimin e publikut tek drejtësia dhe sundimi ligjit në Shqipëri”.

Ky është konkluzioni i një raporti prej 25 faqesh hartuar prej Komisionerit për të Drejtat e Njeriut në Këshillit të Evropës, Nils Muiznieks.

“Autoritetet duhet të shtojnë përpjekjet e tyre për t’u siguruar që të gjitha rastet e korrupsionit në gjyqësor të hetohen në mënyrë efektive dhe të ndiqen penalisht”, thuhet në konkluzionet e raportit.

Muižnieks kërkon që përgjegjësit e ngjarjeve të 21 janarit të dalin para drejtësisë.

“Jam shumë i shqetësuar nga rritja e numrit të rasteve të keqtrajtimit të regjistruara, duke përfshirë torturën. Është e nevojshme që të gjitha këto raste, së bashku me aktet e raportuara të paligjshme të kryera nga ana e zyrtarëve të zbatimit të ligjit gjatë dhe pas ngjarjet e 21 janarit 2011, të hetohen urgjentisht me qëllim nxjerrjen e përgjegjësve para drejtësisë. Që procesi të jetë i besueshëm dhe të ndihmojë në restaurimin e besimit të publikut ndaj shtetit dhe institucioneve të tij, është e rëndësishme të vendosen dënime të përshtatshme parandaluese për çdo zyrtar të zbatimit të ligjit të përfshirë në shkelje të rënda të të drejtave të njeriut.”

Strategjia kombëtare dhe plani i veprimit në lidhje me reformënpër të forcuar gjyqësorin në Shqipëri janë masa inkurajuese thekson komisioneri  por ka nevojë për veprime më të vendosura, duke përfshirë më shumë transparencënë emërimin dhe vlerësimin e gjyqtarëve edhe procedura të bazuara në meritë.

Me ftesë të presidentit, Bujar Nishani, sot ka zhvilluar një vizitë zyrtare në Tiranë presidenti i Bullgarisë, Rosen Plevneliev. Vizita e kreut të shtetit bullgar zhvillohet në kuadër të 100-vjetorit të vendosjes së marrëdhënieve diplomatike mes Shqipërisë dhe Bullgarisë.

Thellimi i dialogut politik dhe tregtisë mes Shqipërisë dhe Bullgarisë, procesi i integrimit i Shqipërisë si dhe çështjet me rëndësi dypalëshe do të jenë në qendër të takimeve të kreut të shtetit bullgar me autoritetet shqiptare.

“Bullgaria gjithmonë ka mbështetur dhe do të mbështesë integrimin e Shqipërisë. Bullgaria në qershor votoi pro marrjes së statusit kandidat për Shqipërinë dhe do të vijojmë të mbështesim edhe në qershor. Ne t`ju mbështesim në rrugën tuaj të integrimit dhe do të ndajmë me ju përvojat dhe gabimet që kemi bërë ne që rruga juaj drejt integrimit të jetë më efektive”, tha presidenti bullgar.

Ndërsa presidenti Nishani u shpreh se integrimi në Bashkimin Europian është objekti kryesor i Shqipërisë.  Sipas kreut të shtetit, integrimi është një proces që duhet të bazohet në meritë dhe si i tillë Shqipërisë duhet t`i jepet statusi në qershor për arritjet që ka bërë.

“Integrimi është një proces që ka përpara sfidat e tij dhe për ti përmbushur të gjitha kriteret që duhet. Ne besojmë që në qershorin e ardhshëm të ketë një vendim pozitiv për Shqipërinë, por ky vendim është një stacion pasi rruga drejt integrimit ka shumë sfida përpara. Procesi i integrimit europian do të jetë i merituar dhe unë mendoj që Shqipëria, duhet të vlerësohet për atë që ka bërë deri më tani dhe të inaugurohet për atë që duhet të bëjë më pas”, tha Nishani.

Gjithashtu, kreu i shtetit të Bullgarisë do të zhvillojë takime edhe me kryeministrin Edi Rama dhe kreun e Kuvendit, Ilir Meta. Më pas në ambasadën bullgare në Tiranë, të dy presidentët Plevneliev dhe Nishani do të takohen me përfaqësues të biznesit, ku do të diskutohet për thellimin e tregtisë mes dy vendeve.

Më pas, të dy presidentët do të marrin pjesë në ekspozitën që do të zhvillohet me rastin e 100-vjetorit të vendosjes së marrëdhënieve diplomatike, mes Shqipërisë dhe Bullgarisë, që do të zhvillohet në Teatrin e Operës dhe Baletit. Në këtë eveniment do të performojnë edhe grupet folklorike nga të dyja vendet.

Ndërsa në ditën e dytë të vizitës së tij në Shqipëri, presidenti bullgar Plevneliev do të takohet me kreun e Bashkisë së Tiranës Lulzim Basha, ndërsa do  të vendosë edhe një kurorë me lule në monumentin “Nënë Shqipëri”. Gjithashtu presidenti bullgar do të zhvillojë edhe një vizitë në qytetin e Krujës, ku do të vizitojë edhe kalanë dhe muzeun etnografik.

Presidenti bullgar rikonfirmoi edhe njëherë mbështetjen e vendit të tij ndaj Shqipërisë në rrugën e saj të integrimit europian duke theksuar se Bullgaria do të votojë pro marrjes së statusit në qershor.