Qeveria shqiptare ka shkarkuar nga detyra prefektët e Vlorës dhe të Kukësit.

Besnik Dervishi nuk do të jetë më prefekt për qarkun e Vlorës dhe në vend të tij do të emërohet Etjona Hoxha. Ndërsa, Besnik Dervishi pritet të emërohet në një detyrë të re si zyrtar.

Qeveria ka shkarkuar gjithashtu edhe prefektin e Kukësit, Ram Hoxhën dhe në vend të tij do të emërohet presidenti i klubit të futbollit të Kukësit, Safet Gjici.

Në dhjetor të 2013-ës, Besnik Dervishit iu gjet lëndë eksplozive në makinën e tij. Edhe pse kanë kaluar më shumë se sa tre muaj, ende nuk është zbardhur kjo ngjarje. Policia ka hetur në pista të ndryshme, por ende nuk ka mundur të identifikojë autorët e vendosjes së eksplozivit në makinën e ish-prefektit Dervishi.

Nga grupi hetimor mësohet se pista kryesore mbi të cilën po hetohet është ajo për shkak të detyrës së Besnik Dervishit si ish-prefekt i Vlorës. Hetime ka pasur edhe për persona të veçantë ku në lupën e hetimit janë dy persona tashmë të dënuar për vrasje dhe që ndodhen në qeli, të njohur si organizator të rrjetit të vendosjes së bombave me aparat celular.

Kryesisht hetimet po kryhen në rrethin shoqëror të këtyre dy personave, të cilët dyshohet se janë autorët që kanë vendosur C4-ën në makinën e ish-prefektit.

Kryetari i Kuvendit Ilir Meta priti sot në Kuvend Zv. Ministrin e Punëve të Jashtme të Mongolisë Damba Gankhuyag.
Kryetari i Kuvendit Ilir Meta vlerësoi avancimin e dukshëm të marrëdhënieve mes dy vendeve gjatë muajve të fundit dhe shprehu bindjen se vizita e Zv. Ministrit të Jashtëm Gankhuyag në Tiranë do t’i japë në shtysë të re marrëdhënieve dypalëshe. Në këtë drejtim, Meta bëri një vlerësim të veçantë për zhvillimin dhe rritjen e madhe ekonomike që ka njohur Mongolia gjatë viteve të fundit dhe shprehu vullnetin për forcimin e bashkëpunimit ekonomik mes dy vendeve.
Zv. Ministri i Punëve të Jashtme të Mongolisë Damba Gankhuyag shprehu kënaqësinë e vizitës së tij në Tiranë duke theksuar se në këtë 65 vjetor të vendosjes së marrëdhënieve diplomatike, Shqipëria dhe Mongolia kanë shansin e hapjes së një kapitulli të ri në marrëdhëniet miqësore mes tyre. Në këtë kuadër, Gankhuyag i dorëzoi z. Meta ftesën e Kryetarit të Parlamentit të Mongolisë Zandaakhuu Enkhbold për një vizitë zyrtare në Ulan Bator gjatë këtij viti, ftesë të cilën Kryetari i Kuvendit e pranoi me kënaqësi.
Meta dhe Gankhuyag shprehën vullnetin e përbashkët për nënshkrimin e marrëveshjeve të nevojshme bilaterale në funksion të forcimit konkret të shkëmbimeve parlamentare, ekonomike, turistike, kulturore dhe arsimore mes dy vendeve. Në përfundim të takimit, u vlerësua edhe hapja e Konsullatave të Nderit në të dy vendet si një hap i rëndësishëm për forcimin e marrëdhënieve dhe miqësisë mes dy popujve.

Kryeministri shqiptar, Edi Rama, shpalli sot nga Paskuqani, planin e ri të qeverisë shqiptare për legalizimin e ndërtimeve informale dhe urbanizimin e të gjithë zonave duke i kthyer në kapital të çliruar.

Rama, deklaroi se qeveria ka ndryshuar ligjin aktual të legalizimeve, i cili më pas do të marrë votën e Kuvendit. Thelbi i këtij ndryshimi ka të bëjë me ndryshimin e skemës së procesit të legalizimeve, ku nuk janë qytetarët që do të shkojnë te zyrat e shtetit, por administrata do të shkojë tek qytetarët për të kryer procesin e regjistrimit të banesave informale.

Kryeministri shqiptar deklaroi se procesi i legalizimit për qytetarët që kanë ndërtuar shtëpi banimi do të jetë falas, ndërsa për ata që kanë ndërtuar për objekte biznesi, procesi do të kryhet me faturën përkatëse.

Në takimin që po zhvillohet pritet të shpërndahen edhe një numër dokumentesh të përfundimit të procesit të legalizimit, të cilat më pas do të regjistrojnë pronën në hipotekë, duke e kthyer një ndërtim në kapital real financiar.

Kryeministri, Edi Rama, deklaroi se qeveria do të falë të gjitha pealitetet që i janë vënë qytetarëve në të shkuarën.

Këto ndryshime do t’i kalojnë për miratim përfundimtar parlamentit dhe do të na garantojnë zotimit tonë që ju dhe si ju mbi 200 mijë familje që presin prej vitesh pa fund legalizimin të mund të bëheni pronar legjitim të shtëpive tuaja. Shtëpitë tuaja të kthehen nga kapitale të vdekura, në kapitale të qarkullueshme, që do nxisin ekonominë e familjes suaj.”, theksoi Rama.

Kreu i Ekzekutivit theksoi gjithashtu se “ne kemi pasur një plan shumë të qartë për legalizimet dhe duhet ta kujtoni sepse besoj është me rëndësi që unë personalisht së bashku me Artan Lamen, kemi qenë të parët në Shqipëri që kemi folur për legalizimet, kemi qenë të parët që kemi bërë një plan legalizimesh, kur ishim në fillim të rrugëtimit tonë për të modernizuar Tiranën.”
“Plani ynë, tha Rama, solli një produkt të rëndësishëm, qytetarët i morën informacionin nga njësia bashkiake, por mbetën peng të peshkaqenëve që drejtonin Aluizmin, por sot përfundoi kjo padrejtësi, pasi ne vendosëm t’ju japim mundësi të gjithë shqiptarëve që kanë sakrifikuar shtëpitë e tyre për një jetë më të mirë të realizojnë ëndrrën e tyre”, tha Rama, i cili kujtoi se kanë qenë rreth 160 mijë familje që kanë tetë vjet që sorollaten nëpër tiranë për të legalizuar pronën e tyre.