Xhuvani mbetet në burg, mungojnë familjarët

80

xhuvani gjyqGjykata e Tiranës ka caktuar sot masën e sigurisë “arrest me burg” për Kostandin Xhuvanin, i cili akuzohet si i dyshuari kryesor i masakrës së 4 nëntorit në një lokal nate në Tiranë, duke shkaktuar katër viktima. Xhuvani akuzohet edhe për armëmbajtje pa leje dhe kundërshtim të punonjësit të policisë.

Gjatë dhënies së masës së sigurisë nuk ka pasur asnjë familjar të Xhuvanit në sallë, përveç avokatit të tij, i cili pas seancës tha se futja e tij me pranga në duar në kafazin e hekurt nuk ishte e arsyeshme, duke vërejtur shkelje procedurale.

Më pas 26-vjeçarit i janë hequr prangat nga duart, duke qenë i shoqëruar gjithsesi nga dy oficerë të forcave speciale.

I arrestuari i masakrës në lokalin e natës në Tiranë, ka kërkuar si avokat Ardian Lekën, i cili nuk ishte i pranishëm.

Gjyqtare e çështjes ka qenë Enkela Bajo, ndërsa Xhuvanit iu caktua nga gjykata si avokat Violent Coniku. Ky i fundit, ka pohuar pas seancës për mediet, se i ka kërkuar klientit të tij të mos japë shpjegime, përveç pyetjeve të gjyqtares për gjeneralitetet e tij.