Rusia dhe Shtetet e Bashkuara të Amerikës kanë arritur një marrëveshje për Sirinë. Siria do u lejojë të gjithë inspektorëve të kenë akses të plotë tek armët kimike.
Sekretari i Shtetit, John Kerry lexoi planin me gjashtë pika, ku parashikohet që Siria të dorëzojë listën me të gjithë arsenalin kimik brenda një jave.
SHBA thotë se, regjimi sirian ka vrarë qindra njerëz në një sulm me armë kimike muajin e shkuar, por presidenti Bashar al- Assad mohon një akuzë të tillë, duke thënë se sulmin e kanë kryer rebelët.
Në një konferencë të përbashkët me homologun rus, Sergej Lavrov, Kerry i bëri thirrje qeverisë së Assad që t’i përmbahet angazhimeve të saj publike.
Ai tha se marrëveshje e arritur mes SHBA dhe Rusisë nuk lë hapësirë për lojëra.
Kerry dhe Lavrov thanë se nëse Siria nuk bashkëpunon, atëherë do kërkohet miratimi i një rezolute nga OKB, që do lejojë përdorimin e forcës.
Kerry tha se inspektorët do shkojnë në terren në nëntor dhe arsenali kimik duhet të shkatërrohet deri në mesin e vitit 2014.
Më shumë se 100 mijë njerëz kanë vdekur që kur nisën trazirat ndaj presidentit Assad në vitin 2011. Miliona të tjerë janë zhvendosur.
