Krerët e lartë të shtetit dhe të politikës uruan sot të gjithë besimtarët myslimanë për festën e Fiter Bajramit.
Urimet e politikanëve u përcollën fillimisht në vizitën tradicionale në Komunitetin Mysliman dhe në Kryegjyshatën Botërore të Bektashinjve ku u pritën Haxhi Selim Muça dhe nga baba Edmond Brahimaj.
Në emër të Partisë Socialiste dhe të qeverisë së re, Niko Peleshi ka uruar të gjithë besimtarët myslimanë festën e Fiter Bajramit.
“Në emër të Kryeministrit Rama dhe qeverisë re dua të uroj mysimanët shqiptarë brenda vendit dhe në trevat jashtë tij, gëzuar festën e bukur të Bajramit. Ditët e bukura dhe të gëzuara si Bajrami vijnë pas sakrificave. Le t’i qëndrojmë këtij mesazhi sa hyjnor aq edhe njerëzor duke pritur ditët e begata që presin gjithë shqiptarët” u shpreh Peleshi.
Basha uron myslimanët: Sakrifica e Ramazanit t`u kthehet në mirësi
Ndërsa Kryetari i Bashkisë së Tiranës Lulzim Basha pasi uroi besimtarët myslimanë për Festën e Fiter Bajramit vlerësoi sakrificën e atyre që kanë agjeruar duke i uruar që kjo sakrificë t`u kthehet në mirësi.
“Pas javëve të mundimshme të muajit të Ramazanit sot besimtarët myslimanë festojnë Bajramin. Dua ti uroj Gëzuar! Sakrifica e agjërimit, lutjet e tyre u kthefshin në mirësi, dritë për cdo besimtar, Shqipërinë e gjithë kombin shqiptar!” tha kryebashkiaku.
Më pas Basha uroi edhe besimtarët bektashianë, pas një vizite në Kryegjyshatën Bektashiane. “Përcjell urimet për besimtarët bektashinj anembanë Shqipërisë, begati dhe dritë” tha Basha.
