Sali Berisha, që siç duket e ka të vështirë të mos shfaqet publikisht çdo ditë në ekranet e shqiptarëve si Kryeministër i tyre, pavarësisht se ato e rrëzuan me votë plebishitare, vazhdon të sulmojë liderin socialist Rama.

Në statusin e tij në Facebook, Berisha shkruan:

 “Të dashur miq, në selinë mavi revansh i paparë. Pas hapjes së tenderit online për fshesën ndaj administratës, z.Rama njofton se konkurset për vendet e punës në administratë nuk kanë qenë të hapura (paçka se botoheshin në të gjitha mediat e kontrolluara prej tij), prandaj për t’i hapur ato ai ka vendosur që çdo njeri për të marrë pjesë në konkurse për punësim në administratë duhet më parë të aplikojë online dhe të presë biletën në selinë e PS. Por siç thotë fjala e urtë, oreksi vjen duke ngrënë.

Z.Rama njoftoi se fshesa e partisë do të fshijë (pastrojë) edhe sektorin privat, i cili së shpejti do të “ndihmohet” me aplikantët e “virtytshëm” online të selisë së PS. Kjo është lule. Prisni, prisni tenderin e miellit. Aty deti bëhet jo kos, por flori. Tepron edhe për ndonjë mik të çmuar që çmendet pas gjahut dhe trafiqeve! Ndryshim!! Me vrap drejt të shkuarës!”

Ndërkohë që qeveria Berisha është akoma në detyrë, Kreu i Dhomës i Tregtisë, Nikolin Jaka, i cili nuk ka guxuar asnjëherë të flasë publikisht për borxhin, që qeveria Berisha u ka, i kërkon Kryeministrit Rama, në pritje të marrjes së detyrës, që t’i shlyejë borxhin prej 220 milionë euro të qeverisë Berisha.

“Qeveria Rama të ulet paraprakisht, të hartojë një strategji të qartë për daljen nga kriza dhe sidomos në kontekstin e shërbimit ndaj biznesit të qartësojë afatet se kur do të shlyhen detyrimet që ka Qeveria dhe buxheti i shtetit ndaj sipërmarrjes private. Rritja është thelluar, gjatë dy muajve shkon nga 8 në 10 për qind; mund të shkojë 220-215 milionë euro një detyrim i cili parashikohet që mund të jetë ndaj sipërmarrjes për vepra publike dhe shërbime, pa futur shifrat e kompensimit tatim-fitim, TVSH-ja apo taksa te tjera që qeveria është e detyruar të likuidojë ndaj biznesit”, – ka deklaruar Nikolin Jaka për Top Channel.

Pas deklarimit të Jaka, vjen dhe reagimi i deputetit socialist Erjon Braçe, i cili thekson, se u ka kërkuar për dy vite rresht të dhënat mbi borxhin, që qeveria Berisha i ka biznesit dhe përgjigja e tyre ka qenë, se Berisha nuk u ka borxhe.

“E mbani mend shefin e Dhomës se Tregtisë së Tiranës? Quhet Nikolin Jaka. E keni dëgjuar ndonjëherë t’i thotë Sali Berishës ndryshe nga kryeministër? Tani i thotë kryeministrit të ri, thjesht Rama.

Jo vetëm kaq. Por tani kërkon me tërsëllëmë dhe paratë që Berisha ua mori borxh. E keni dëgjuar ndonjëherë të kërkojë pagimin e parave të papaguara nga qeveria e Sali Berishës? Kurrë! Nuk guxonte as ta mendonte. Kurrë nuk e dëgjova një herë të vetme në takimet e Berishës të kërkonte paratë.

Por, tani i ka ardhur goja dhe kërkon edhe afate për kthimin e parave. Dy vite me radhë harxhova për t’ju kërkuar këtyre të dhëna për paratë që Qeveria e Sali Beishës ju kishte pa paguar. ‘Jooooo, s’na ka borxh’-thoshin. Ndërkohë, me paratë e tyre paguanin punët elektorale të Sali Berishës. Ja këta janë. PS bëri t’u vijë goja”, -ka deklaruar Braçe në rrjetin social Facebook.

Partia Socialiste ka reaguar pas emërimit në krye të shkollës së Magjistraturës të Neshat Fanës. Deputetja Ermonela Felaj e ka cilësuar emërimin e tij si një tjetër hallkë të sistemit të drejtësisë, që u mor peng nga pushteti i rrëzuar. Ajo nënvizon faktin se në krye të drejtësisë po vihen një kastë individësh, me të vetmin kriter shërbimet e kryera ndaj pushtetit të rrëzuar me votë.

“Ndërhyrja skandaloze e KLD-së në procesin e zgjedhjes të drejtuesit të kësaj shkolle, është një tjetër hap në tentativën për të marrë peng të gjithë hallkat e drejtësisë shqiptare. Fakt është se Shkolla e Magjistraturës është i vetmi institucion që në raportet e Komisionit Europian është nënvizuar si i pavarur, i paanshëm dhe i vendosur në luftën kundër korrupsionit.

Vënia në krye të kësaj shkolle e një individi me lidhje të ngushta politike me qeverinë dhe kryeministrin që u ndëshkua në mënyrë plebishitare me votë në 23 qershor, në kushte të konfliktit të hapur të interesit, si dhe ngritja e mëtejshme në detyrë nga KLD-ja, e një sërë gjyqtarëve të përfshirë në procese gjyqësore që kanë shkaktuar dëshpërim kombëtar dhe ndërkombëtar, në raport me Shqipërinë, flet qartë për faktin se në krye të sistemit të drejtësisë po tentohet të vihet një kastë individësh, me të vetmin kriter shërbimet e kryera ndaj pushtetit të rrëzuar me votë.  Ne jemi të vendosur të respektojmë në frymë e në germë Kushtetutën e Republikës së Shqipërisë në marrëdhëniet e ekzekutivit me gjyqësorin. Pushteti gjyqësor do të gjejë tek qeveria jonë një partner në luftën për rilindjen e drejtësisë. Askush nuk duhet të ushqejë iluzione se do të qëndrojmë duarkryq përballë uzurpimit politik të sistemit të drejtësisë apo përballë përpjekjeve të individëve të korruptuar brenda këtij sistemi të cilët mundohen e bëjnë gjithçka për të mbajtur njëri-tjetrin në karrige duke mbyllur sytë para mëkateve të tyre.

Ne jemi të vetëdijshëm se një nga arsyet kryesore përse 1 milion shqiptarë votuan për Rilindjen, është shqetësimi për rrënimin dramatik dhe korrupsionin në sistemin e drejtësisë.

Askush mos e vërë në dyshim apo në provë, vendosmërinë tonë për ta adresuar këtë shqetësim të shqiptarëve. Qeveria e zgjedhur me votën e shqiptarëve në 23 qershor, do të jetë aty për t’u thënë jo të korruptuarve në sistemin e drejtësisë”,- deklaroi Felaj.

Deputeti socialist, Erion Braçe ka reaguar sot sërish në lidhje me gjendjen financiare që po kalon vendi. Ai ka akuzuar kryeministrin Berisha, se po bën krim me financat publike dhe se në arkën e shtetit mungojnë mbi 170 milionë dollarë.

“Sali Berisha po bën krim me financat publike. Më shqip: Po bën krim me arkën e shtetit të shqiptarëve! Nuk po arkëton në të, po shpenzon gjithnjë e më shumë prej saj! Mungojnë shumë para! Shikoni, e kam thënë edhe diku tjetër këtë fakt: Në qershor 2005, ne muajin e fushates, plani i arkëtimit të të ardhurave ishte realizuar 103%. Në qershor 2013, në muajin e fushates, plani i arkëtimit të të ardhurave është realizuar nën 78%. Mungojnë mbi 170 milionë dollarë!”

Ky është dallimi! Poooor; Kjo është diferenca që dëshmon krimin me financat publike! Po po, është krim të mos arkëtosh detyrimet ligjore financiare! Drejtorët e Berishës, po e përsëris, të Berishës i ka emëruar ai personalisht; po konsumojnë krim!!

Të gjitha këto miliona që nuk po arkëtohen po i përfiton klientela politike e kësaj qeverie, por gjithkush duhet të dijë se detyrimet tatimore të paguara nuk fshihen, as falen, do arkëtohen me çdo kusht!”,- deklaron Braçe në rrjetin social Facebook.