Gjykata Kushtetuese rrëzon ankimimin e Partisë Demokratike për kompetencat e Inspektoriatit Ndërtimor Urbanistik Kombëtar,INUK.

Demokratët kishin kërkuar nga Kushtetuesja shpalljen si antikushtetues të vendimit të qeverisë që i jep të drejtë Inspektoriatit Ndërtimor Urbanistik Kombëtar, të ndërhyjë në prishjen e ndërtimeve me dhe pa leje në të gjithë territorin, por Kushetetuesja e ka rrëzuar këtë kërkesë ndërsa ka vendosur që ta shqyrtojë në themel aktin.

Pas vendimit të gjykatës, deputeti i PD-së Eduard Halimi ka theksuar se qeveria ka shkelur vendimet e gjykatave duke shembur pronat e ligjshme të qytetarëve.

“Ne kundërshtuam dëmet që po u bëhen qytetarëve shqiptarë nga qeveria me apo pa tritol. Ky ishte argument jonë duke i thënë gjykatës se i vetmi autoritet në Republikën e Shqipërisë që mund të cilësojë një pronë me leje ndërtimi apo me leje legalizimi si të ligjshme apo jo janë gjykatat e vendit. Nuk është i mundur kryeministri të  thotë që nuk më duhen gjykatat se kam INUK-un. Nëse një pronë është e ligjshme ose jo kryeministri me këtë akt normativ thotë se këtë çështje ma zgjidh INUK-u. Qeveria e tritolit ka shkelur vendimet gjyqësore dhe kanë vendosur tritol mbi pronat e qytetarëve shqiptarë.  Pronat e ligjshme nuk mund të shemben me tritol nga kryeministri apo kryeinspektori” tha Halimi.

Në seancë, përfaqësuesi i PD, Ivi Kaso ka theksuar se akti normativ për INUK është një cënim flagrant i të drejtave të njeriut.

“Akti normativ për INUK cënon pronën pasi e drejta e pronës mbrohet nga Kushtetuta por edhe nga Gjykata Evropiane e të Drejtave të Njeriut. Kushtetuesja duhet ta japë sot vendimin për ankimimin tonë në mënyrë që  qeveria të mos ketë mundësi që të prishë pronën e ligjshmetë qytetarëve me tritol” tha Kaso.

Vendimi i qeverisë

Inspektorati Ndërtimor Urbanistik Kombëtar do të ketë fuqi më të madhe vepruese në të gjithë territorin. Në mbledhjen e datës 30 shtator 2013, qeveria, për të realizuar ndërhyrjen në të gjithë territorin ndaj ndërtimeve pa leje, i ka dhënë INUK-ut më shumë kompetenca për të vepruar, mbi kompetencat që i atribuonte ligji i mëparshëm.

“Inspektorati Ndërtimor Urbanistik Kombëtar (INUK) i ushtron pa asnjë kufizim paraprak kompetencat e përcaktuara në nenet 9, 10 e 10/1 të ligjit nr. 9780, datë 16.7.2007 ‘Për inspektimin e ndërtimit’, në çdo rast kur ai konstaton objekt të kundërligjshëm, me ose pa leje ndërtimi, në të gjitha zonat e përcaktuara, si zona të rëndësisë kombëtare, me ligj, akte nënligjore apo me vendim të Këshillit Kombëtar të Territorit”, thuhet në vendimin e qeverisë.

Ish-kryeministri, Sali Berisha, ka reaguar sot pas refuzimit të qeverisë për tu paraqitur si palë e paditur në gjykatën Kushtetuese për ankimin e PD për ndryshimet në buxhetin 2013. Në rrjetin social facebook, Berisha thekson se këtë qëndrim të pashembullt të injorimit të Gjykatës Kushtetuese, institucionit garant të Kushtetutës së vendit, qeveria Rama-Meta e bazon në parimin antishtet, atë të vendimeve të pavlefshme të gjykatave të vendit.

“Te dashur miq, ne revanshin e tij te zevendesimit te shtetit ligjor me shtetin policor, Edvin Kristaq Rama urdheroi ministrat dhe perfaqesuesit e tij te mos paraqiten si pale e paditur ne seancen e gjykimit ne Gjykaten Kushtetuese te çeshtjes se rritjes nga qeveria Rama -Meta te borxhit publik në 75% te GDP-se, shnderrimin keshtu te financave publike ne nje megapiramide te llojit te krizes greke. Kete qendrim te pashembullt te injorimit te Gjykates Kushtetuese, institucionit garant te Kushtetutes se vendit, qeveria Rama-Meta e bazon ne parimin antishtet, ate te vendimeve te pavlefshme te gjykatave te vendit. Bazuar ne kete parim qeveria Rama-Meta ka rrezuar haptas me vendime qeverie nje seri vendimesh te Gjykates Kushtetuese si ato: Per kontrollin e territorit, nepunsin civil, vendimarrjen e Keshillit Kombetar te Territorit, aktet normative, nivelin e borxhit, paraqitjen e programit politik te qeverise ne Parlament etj etj” shkruan Berisha.

Më tej Berisha vlerëson se përmes këtyre akteve, qeveria Rama-Meta po e kthen vendin pas në të shkuarën.

“Po keshtu, kryekreu me vendime qeverie ka rrezuar vendime te gjykatave te tjera si: per masen e sigurise se baneses, shkarkime te paligjshme ne bordin dhe institutin e statistikave, agjensine e luftes kunder pastrimit te parave etj etj. Ne revanshin e tij drejt shtetit policor zerat i thone atij se ti je dhe kryegjykatesi, kryeprokuroi, kryepermbaruesi i vertete ndersa ata, te tjeret, jane ferri, Luçiferi i realitetit qe duhet zhdukur. Me vrap drejt te shkuares dhe sa me larg Europes!!”

Gjykata Kushtetuese ka shtyrë për në 11 shkurt shqyrtimin e ankimimit të Partisë Demokratike për shpalljen si të papajtueshëm me Kushtetutën të Aktit Normativ nr. 6, datë 04.10.2013 të Këshillit të Ministrave “Për disa ndryshime dhe shtesa në ligjin nr. 119/2013 “Për buxhetin e vitit 2013”.

Shtyrja e seancës u bë pasi mungonin përfaqësuesit e qeverisë. Deputeti demokrat Eduard Halimi theksoi se qeveria refuzoi të përballej me qytetarët dhe gjykatën.

Në kërkesën e saj, 1/5-ta e deputetëve të PD-së thekson se Gjykata Kushtetuese ka vlerësuar se qeveria është e detyruar të shpjegojë dhe argumentojë nevojën dhe urgjencën konkrete që e kanë detyruar të nxjerrë aktin normativ me fuqinë e ligjit.

Ministri i Brendshëm Saimir Tahiri ka raportuar sot në komisionin e sigurisë kombëtare në lidhje me vrasjen e vëllezërve Çollaku nga pala greke.

Mbledhja u shoqërua me debate mes ministrit dhe deputetit të PD-së Flamur Noka ndërsa pas përfundimit të saj janë shmangur përplasjet fizike  mes deputetëve Pjerin Ndreu dhe Flamur Noka.

Eshtë dashur ndërhyrja e deputetëve të tjerë të komisionit për shmangien e përplasjes fizike mes Nokës dhe Ndreut.

Gjithashtu debate të ashpra ka pasur edhe mes ministrit të brendshëm dhe deputetit demokrat Flamur Noka ku ky i fundit i është drejtuar Tahirit duke i thënë:”Je karagjoz”.

Ndërsa ministri Tahiri iu drejtua opozitës me fjalët: “Ka ikur koha kur policia bënte ekspertizën e vrasjeve që kryente vetë siç ndodhi më 21 janar”.

Ndërsa sa i përket vrasjes së dy vëllezërve Çollaku, Tahiri ka kërkuar nga politika të mos abuzojë me këtë ngjarje të rëndë.

“Dy vëllezërit Çollaku qëlluan me armë ndaj policisë greke dhe ata iu kundërpërgjigjën. Ne nuk mund ta kqyrim vendin e ngjarjes, sepse është jashtë juridiksionit tonë. Ministria e Brendshme nuk bën ekspertizë  mjeko-ligjore pasi kjo është kompetencë e organeve të tjera. Garantoj, që shteti shqiptar ka ushtruar të gjitha kompetencat për ngjarjen në kufi me Greqinë” tha ai.

I menjëhershëm ka qënë reagimi i deputetit të Partisë Demokratike Flamur Noka i cili ka theksuar se duhet të zbardhjet e vërteta për vrasjen e dy vëllezërve Çollaku.

“Ngjarja ka një terr informative. Duam të vërtetën e ngjarjes në kufirin me Greqinë ku u vranë dy vëllezërit Çollaku.   Policia jonë dha të njëjtin version të ngjarjes në kufi, si policia greke” tha ai.

Por ministri Tahiri ka përgënjeshtruar deputetin Noka duke theksuar se policia shqiptare ka dhënë versionin e saj zyrtar për ngjarjen.

Ndërsa deputeti demokrat Astrit Patozi ka theksuar se Tahiri duhet të mendojë dorëheqjen nga posti i ministrit.

“Tahiri nuk ka kohë të vijë në komision, pasi është kthyer në një “Star mediash” . A e keni menduar dorëheqjen nga posti apo shkarkimin nga detyra e ministrit?” iu drejtua Patozi ministrit.