“Kam dy fjalë edhe për miliarderin e nderuar, Xhorxh Soros. Na ndihmoi në vitin 2000, sepse edhe ai është socialist në pikëpamje. Por më pati thënë Viktor Orban: ‘kini kujdes se nuk është aq demokrat dhe komploton edhe kundër demokracisë’”, citon Fox News presidentin Meta.

Artikulli vë në dukje se presidenti i është kthyer me akuza edhe komunitetit ndërkombëtar, përfshi BE-në dhe SHBA-në, duke u bërë thirrje diplomatëve të mos bëhen qesharakë e të mos luajnë me kushtetutën e Shqipërisë.

Sipas Fox News, Meta ishte përpjekur të anulonte zgjedhjet e së dielës, duke thënë se nuk do të ishin demokratike pa pjesëmarrjen e opozitës, e cila i ka bojkotuar.

Megjithatë, shton media amerikane, kryeministri Edi Rama urdhëroi të mbahen zgjedhjet, në të cilat partia e tij pritet të dalë fituese me diferencë shumë të madhe. Opozita, nga ana tjetër, e ka quajtur pjesëmarrjen e ulët (21.6%) si antikushtetuese dhe të paligjshme. Ndërkohë, vëzhguesit ndërkombëtarë kanë vënë në dukje se mungesa e opozitës ka bërë që zgjedhjet të mos kenë interes për votuesit.

“Fox” shpjegon se si Meta ka shpallur një tjetër datë për zgjedhjet, por që është refuzuar nga qeveria, e cila ka ngritur një komision hetimor për të shkarkuar presidentin. Opozita ka vazhduar protestat duke e akuzuar qeverinë për manipulim të votave në zgjedhjet e mëparshme, të cilat qeveria i ka mohuar.

“Soros është shënjestër e rregullt e qarqeve të djathta, për shkak të financimeve që u bën grupimeve të majta nëpër Europë dhe SHBA. Qeveria nacionaliste e Hungarisë miratoi një ligj vitin e shkuar për të ndërprerë veprimtaritë e tij me Fondacionin Shoqëria e Hapur, duke e deklaruar të paligjshme veprimtarinë e OJQ-ve për të organizuar emigrim në vend”.

Komisioni Europian në një reagim për 30 qershorin deklaron zgjedhjet lokale të zhvilluara në Shqipëri të dielën u zhvilluan në një kontekst të ndarjes politike, por në një mënyrë përgjithësisht të qetë dhe të rregullt.

Zëdhënësja e KE-së, Maja Koçijançiç, shprehet se “ne morëm parasysh të gjitha vërejtjet paraprake të bëra nga Shefi i Misionit të Vëzhgimit të Zgjedhjeve të OSBE / ODIHR. Organet lokale të sapozgjedhura tani duhet të jenë në gjendje të punojnë sipas kompetencave të tyre kushtetuese, në dobi të qytetarëve të vendit”.

Komisioni Europian ka apelur sërish përmes Koçijançiç që qeveria dhe opozita të tregojnë pjekuri politike dhe të angazhohen urgjentisht në dialog konstruktiv për të kapërcyer situatën aktuale politike.

“Të gjitha institucionet shqiptare dhe udhëheqësit politikë tani duhet të përqëndrojnë përpjekjet e tyre në vijueshmërinë e zbatimit të procesit të reformës, duke përfshirë rinisjen e reformës së iniciuar më parë të legjislacionit zgjedhor për të adresuar rekomandimet e ODIHR-it”, deklaron Koçijançiç.

Është mbyllur procesi i numërimit edhe në Bashkinë e Kolonjonës ku u numëruan 34 kuti votimi. Kandidati i Partisë Socialiste, Erion Isai fitoi me 4278 vota kundër Fatjon Feka i cili mori 304 vota.

Kujtojmë që Erion Isai nuk vjen nga bota e politikës, por nga arti.

Katër ditë para 30 qershorit, një tjetër lëvizje politike vjen nga Presidenti Ilir Meta, i cili ka ftuar nesër (27 qershor) në takim kryeministrin Edi Rama.

Lajmin e ka bërë të ditur vetëm kryeministri, i cili ka publikuar shkresën në tëitter. Por kësaj ftese, Rama i është përgjigjur me ironi: “Kemi zgjedhje,jam i zënë!”

“Për shkak të fushatës elektorale që po zhvillohet sipas dekretit presidencial,ku 30 qershori është përcaktuar datë zgjedhjesh,kabineti im ka komunikuar telefonikisht pamundësinë për këtë takim.Po meqë Ilir Meta vazhdon të luajë letrash, ja dhe me shkrim:Kemi zgjedhje,jam i zënë. E meqë ra llafi tek loja e letrave të Ilir Metës, ju kam thënë pas antidekretit se pas asaj çrmendurie pres edhe nje tjetër. Se ç’kam një ndjesi që do ta bëjë, po për këtë do flasim nga e hëna e më tej se tani kemi vetëm një punë: Zgjedhjet në 30 qershor”

Ndërsa shkresa e firmosur nga drejtori i kabinetit të Presidentit, Arben Cici mban datën e sotme, 26 qershor dhe i drejtohet drejtores së kabinetit të kryeministrit Vali Bizhga.

“Dëshiroj t’ju bëj me dije se Presidenti i Republikës, Ilir Meta mirëpret nesër në takim kryeministrin Edi Rama për të biseduar për situatën politike në vend, në çdo orë që ai mundet, duke filluar nga mëngjesi herët në orën 5:00 deri në orën 13:00 në zyrën e tij në Presidencë”.

Ky refuzim i Kryeministrit tregon qartë angazhimin e mazhorancës pavarësisht dekretit të Presidentit dhe mungesës së opozitës në zgjedhje. Por në këtë përgjigje vihet re që përveçse do të ketë zgjedhje me 30 Qershor, fati i dialogu politik është ende i pashkruar në letër.

Nga Vlora, ministri i Brendshëm, Sandër Lleshaj ka deklaruar se ka ende shumë punë për të bërë për sigurinë në plazhe.

“Masat e marra për të garantuar sigurinë në plazhe nuk janë ende ato që kërkohen nga ligji. Ne shumë plazhe nuk janë plotësuar masat që kanë të bëjnë me sigurinë në plazhe”, ka deklaruar Lleshaj.

Sa i përket hyrje daljeve, ministri tha se ato kanë pësuar rritje, “ashtu siç ka pasur rritje edhe efektiviteti i policisë së shtetit për emigracionin e paligjshëm” u shpreh Llesha.

“Kanë pësuar rritje me shifrën 8.7 % , një rritje kjo e konsiderueshme duke marrë parasysh dhe protestat që ndikojnë në besimin dhe sigurinë e turistëve”, ka deklaruar ministri Sandër Lleshaj.

Lleshaj ishte i shoqëruar nga drejtori i Policisë së Shtetit, Ardi Veliu dhe prefekti i qarkut, Flamur Mamaj.

Kryetari i grupit parlamentar, Taulant Balla ka dorëzuar në Kuvend 55 firmat për shkarkimin e presidentit Ilir Meta.

Balla tha: Së pari Presidenti i republikës, në ushtrim të kompetencave të dhëna nga kushtetuta ka nxjerrë dekretin për caktimin e datës së zgjedhjeve të qeverisjes vendore.