Ditën e sotme në Kukës u kujtua 15-vjetori i eksodit të kosovarëve drejt Shqipërisë. Të pranishëm në këtë aktivitet ishin krerët e shtetit të dy qeverive shqiptare, asaj të Shqipërisë dhe asaj të Kosovës.

Gjatë fjalës së tij kreu i qeverisë shqiptare, shprehu një mirënjohje të thellë për presidentët e SHBA-ve, për BE-në, dhe NATO-n. Gjithashtu, Rama vlerësoi roli dhe kontributin e ish-kryeministrit Pandeli Majko dhe ish-kryeministrit Sali Berisha, në pavarësinë  e Kosovës.

“Kur e sheh me sytë e sotëm të shkuarën e 15 viteve më parë duket sikur ka kaluar një jetë e tërë. Në një anë të kufirit, një vend shumë i brishtë i dalë nga një rrënim ekonomik si ai i vitit ’97, me një qeveri në krye të së cilës ishte një djalë 30 vjeç dhe nga ana tjetër e kufirit në errësirën e një diktature gjithnjë e më barbare, një përpjekje e zgjatur e zgjatur në kohë e sakrifica që shtrihej nga ekzistenca e Ibrahim Rugovës, që shtrihej në Ushtrinë Çlirimtare të Kosovës.

Nga ana tjetër ushtria vrasëse e Millosheviç, dhe nga ana tjetër aleanca e madhe që iu bashkua krah për krah shqiptarëve, por gjithnjë në kushtet kur fundi nuk dihej. Dhe ajo që bën shqiptarët e zakonshëm, ajo që bëri qeveria shqiptare, në një vend të ri tërësisht të brishtë, garantoi që aleanca e madhe të shkonte përpara pa frikën e lëkundjeve të opinionit publik në Europë. Kryeministrit Thaçi foli për prapavijën e Shqipërisë. Ai e kujton atë prapavijë dhe sinergji të pazakontë, sepse pa ato do të ishte e pamundur të shkoje përpara, ku e gjithë aleanca të shkoje para falë asaj prapavije që shkoi Shqipëria, falë lidershipit të z.Majko”.

“Shpreh mirënjohje dhe për Sali Berishën e PD-në, kur ishte në qeverisje, si pjesë e përbashkët shqiptare për pavarësinë e Kosovës dhe për të arritur në këto ditë. Nëse e kthejmë në çështje politike ne ngatërrohemi edhe sa është ora , apo është mars a prill, por fatmirësisht nuk ndahemi tek çështja e madhe që deri dje mbante emrin çështja e Kosovës, por sot natyrshëm ka emrin çështja e shqiptarëve”, tha kryeministri.

Më tej Rama ndau me të pranishmit momentet e takimit në Berlin me kancelarin Angela Merkel. Kreu i qeverisë shqiptare tregoi sesi u bisedua për Ballkanin e paqes.

“Dua të ndaj me ju një moment, një fjalë që pata me kancelarin Merkel që lidhet pikërisht me çka po flasim. Që lidhet pikërisht me atë që askënd nuk ishte e imagjinueshme që të ndodhte që në 100 vjetorin e Luftës së Parë Botërore vetëm pak vite nga kjo luftë që ndodhi, e tmerrshme që përjetuan, Ballkani të gjendej në paqe. Dhe ne të gjithë dhe përfshirë kryeministrin e Kosovës, përfshirë dhe atë të Serbisë të gjendeshim në Londër, jo si do të ndahen territoret as si do merret një armëpushim, as për të diskutuar për të bërë këtë apo atë aspekt të luftës, por për të diskutuar se çfarë do bëjmë me paqen.

Një paqe që është shumë e madhe për shpatullat e brishta për secilin nga vendet e rajonit tonë. Është një paqe që kërkon më shumë Europën në rajon, që kërkon më shumë bashkëveprim mes nesh për të kapërcyer ato pengesa që mes nesh nuk bëhen për t’i kapërcyer, ato ambicie legjitime që secila qeveri më vete dhe aq më pak pastaj apo dy qeveritë tona e kanë të pamundur ti arrijnë pa këtë sinergji pa këtë veprim. Kjo është një kohë e re që na bën të reflektojmë për të ardhmen dhe për kohën që nuk pret për integrimin.

Jam i bindur që kjo qasje e jona që e merr të gjithë forcën e vet nga vizioni dhe kurajoja e kryeministrit të Kosovës për t’u ulur në një tryezë me armiqtë e deridjeshëm, për të hapur rrugën me ata që deri dje ishin sundimtarë në tokën e shqiptarëve, sepse pa atë hap të jashtëzakonshëm përpara sot ne nuk do kishim forcën për tu bërë të gjithë së bashku avokat të një Ballkani të ri, rajoni të ri të një bashkëjetese të re. Që ndjehemi mirë, që qeveria e Kosovës e mëshiroi si një ecje, në një rrugë të përbashkët për të kthyer këtë kohë të re në një bashkëpunim shqiptar dhe rajonal në një hapësirë tej kufijve që e përjetojmë sot në këtë 15-vjetor, që ishte dita që e bashkoi në fillim Shqipërinë me Kosovën që e pati me siguri shtysën e vet”.

Zonat e qarkut të Dibrës, Pukës dhe Korçës janë mbuluar nga dëbora ditën e sotme. Në të gjithë vendin temperaturat kanë pësuar rënie të ndjeshme, edhe pse jemi në stinën e pranverës.

Raportohet se në qytetin e Peshkopisë trashësia e dëborës arrin30 cm, ndërsa në zonat e thella të Dibrës shkon edhe deri në 40 cm.

Reshje të dendura dëbore janë regjistruar edhe në Korçë, në zonat rurale dhe ato urbane.

Si pasojë e reshjeve ka pasur probleme edhe me qarkullimin rrugor në disa zona të Dibrës. Drejtoria e Rrugëve dhe Policia Rrugore kanë marrë masa për zhbllokimin e akseve rrugore.

Reshje të dendura bore vijojnë të bien edhe në Qafë Mali të Pukës, ndërsa në akset Fushë Arrëz- Kukës, Mali- Fierzë ka vështirësi në qarkulli. I pamundur qarkullimi është në aksin rrugor Bardhet-Iballë.

Reshjet e dendura të rëna gjatë natës kanë shkaktuar probleme në disa zona, ku është ndërprerë energjia elektrike.

“Shqipëria 5 vjet anëtare e NATO: impakti kombëtar, rajonal si dhe sfidat e së ardhmes”, titullohet konferenca ndërkombëtare e organizuar sot në Tiranë nga Instituti i Studimeve Ndërkombëtare në kuadër të përvjetorit të pestë të anëtarësimit të vendit tonë në NATO.

Në këtë konferencë marrin pjesë Ministrja e Mbrojtjes, Mimi Kodheli, Kryetari i Partisë Demokratike, Lulzim Basha, Ambasadori i Shteteve të Bashkuara të Amerikës në Tiranë, Aleksandër Arvizu, Shefi i Shtabit të Përgjithshëm të Forcave të Armatosura, Jeronim Bazo, etj.
Në fjalën e saj, ministrja e Mbrojtjes Kodheli theksoi se “klasa politike shqiptare e gjen veten të bashkuar pavarësisht përkatësive partiake. Këtë gjë e dëshmon edhe prania jonë sot në këtë sallë. Secili nga ne do të dëshironte shumë që kjo gjë të ndodhte në shumë gjëra të tjera që janë vërtet të rëndësishme për vendin dhe për të ardhmen e qytetarëve shqiptarëve”.

“Anëtarësimi në NATO është një arritje historike për Shqipërinë, me këtë rast shqiptarët konfirmuan me shumë krenari rikthimin e tyre në perëndim. Anëtarësimi në NATO përmes një konsensusi dhe mbështetjeje publike të pashembullt përbën një gur domethënës në demokratizimin e vendit duke hapur perspektivën për një të ardhme më të mirë për Shqipërinë dhe shqiptarët duke bërë në këtë mënyrë vendin pjesë të familjes së kombeve të civilizuara dhe demokracive perëndimore”, tha Kodheli.

Kryetari i PD-së, Basha e cilësoi vendimin për anëtarësimin në NATO si të duhurin. “Shqipëria plotësoi kushtet për anëtarësim. Anëtarësimi në NATO ishte jo vetëm fitore e rëndësishme, por përpjekje e rëndësishme e institucioneve”