Kreu i qeverisë Edi Rama gjatë fjalës së tij në Konferencën kundër Korrupsionit tha se, duhet ofruar një shërbim shtetëror cilësor, në mënyrë që t’i mbyllet rruga korrupsionit. Rama kërkoi bashkëpunim nga një front i vetëm të udhëhequr nga modernizimi.
“Themeli në luftën kundër korrupsionit është modernizimi i çdo mekanizmi që shteti ka në strukturën e vet, i çdo institucioni, i çdo shërbimi që shteti ka në detyrimet e veta. Korrupsioni është një shërbim alternativ i paligjshëm, që u ofrohet qytetarëve në mungesë të një shërbimi cilësor të ligjshëm, ai arrin më shpejt aty ku shërbimi shtetëror jo cilësor dhe arkaik nuk arrin dot. Sfida jone është që shërbimin publik, ndaj qytetarëve, që Kushtetuta e ligji njohin si të drejtë të tij ta bëjmë të atillë që shërbimi i korrupsionit të bëhet gjithnjë e më pak i preferuar. Nevojitet një bashkëpunim në një front, te vendosur e të udhëhequr nga një fjale kyçe, modernizim”,- tha Rama.
