Kryeministri i vendit Edi Rama ka pritur sot në një takim zyrtar Zv. Kryeministrin dhe Ministrin e Punëve të Jashtme të Greqisë, Evangelos Venizelos
Kryeministri Rama, vlerësoi bashkëpunimin midis dy vendeve dhe vuri theksin në vullnetin e qeverisë shqiptare, për t’i dhënë një dimension të ri këtij bashkëpunimi, për një frymë të mirë miqësie dhe interesi të të dy vendeve.
Gjatë këtij takimi, u vlerësua ecuria e deritanishme e marrëdhënieve dypalëshe, si dhe u trajtuan problematikat që ekzistojnë tani, apo ato të trashëguara nga e kaluara.
“Qeveria shqiptare mbetet e vendosur për të forcuar bashkëpunimin rajonal. Marrëveshja Kosovë-Serbi ka hapur një kapitull të ri në marrëdhëniet e bashkëpunimin midis vendeve të rajonit”,- ka deklaruar Kryeministri i vendit.
Rama e ka falënderuar ministrin Venizelos edhe për mbështetjen që Greqia ka dhënë dhe vazhdon t’i japë Shqipërisë, në procesin e integrimit edhe në kuadër të presidencës së ardhshme greke të Bashkimit Evropian.
Ministri Venizelos, e uroi kryeministrin Rama për detyrën e re, dhe i shprehu gatishmërinë e qeverisë së tij për t’i vendosur marrëdhëniet mes dy vendeve në një stad të ri bashkëpunimi.
