Ministri i Brendshëm italian, Matteo Salvini i sheh zgjedhjet europiane të muajit maj si një mundësi për forcat e ekstremit të djathtë që të kthehen në grupin kryesor parlamentar.
Këto zgjedhje, deklaroi Salvini një ditë më parë gjatë një forumi politiko-ekonomik në qytetin verior Cernobbio, janë shansi për një ndryshim historik dhe mundësia e fundit për të shpëtuar Europën.
Këto koment, kreu i Lega Nord i bëri një ditë pas takimit me Steve Bannon që ka çelur në Bruksel një fondacion të quajtur “Lëvizja”. Qëllimi i këtij fondacioni është të lidhë elementët e ekstremit të djathtë në mbarë Europën.
Për Bannonin, në këtë mënyrë do t’i bëhet rezistencë politikave të integrimit europian, të mbështetura nga kancelarja gjermane Angela Merkel dhe presidenti i Francës, Emmanuel Macron.
Drejtori ekzekutiv i “Lëvizjes”, Mischawl Modrikamen, e përshendeti pjesëmarrjen e Salvinit duke thënë se fakti që ministri e mbështet këtë iniciativë, tregon qartë që ajo përbën vendin e duhur për bashkimin e lëvizjes populiste në kontinentin e vjetër.
Giorgia Meloni, liderja e Fratelli d`Italia, një tjetër parti konservatore nacionaliste në Itali, deklaroi të premten se do t’i bashkohet lëvizjes së Bannonit. Në takimin e Cernobbios ishte dhe udhëheqësi i partisë popullore holandeze, Geert Wilders.
Në fund të gushtit, Salvini u takua edhe me kryeministrin hungarez Viktor Orban dhe të dy ranë dakord të ecin në të njëjtën rrugë pasi diskutuan krijimin e një froni kundër emigrantëve, i cili t`i kundërvihet politikave të kreut të shtetit francez.
