Mënyra e ushqyerjes është gjithmonë objekt studimi kur bie fjala për jetëgjatësinë. Të gjithë duan të dinë se cila është lista e ushqimeve që përbëjnë “eliksirin” për një jetë të gjatë dhe të shëndetshme. Sipas studiuesve, disa ushqime kanë aftësinë të ruajnë shëndetin, ndërsa të tjera mund të bëhen burim i patologjive të rënda si tumoret, por edhe dëmtimet në nivelin kardiovaskular, të cilat shtojnë rrezikun e vdekjes.
Studiuesit amerikanë të Shkollës së Harvardit për Shëndetin Publik në Boston kanë mbajtur nën vëzhgim për 28 vjet me radhë shumë persona, duke dalë në disa konkluzione të rëndësishme. Plot 37 698 meshkuj dhe 83 644 femra janë vëzhguar për mënyrën e ushqyerjes dhe patologjitë që kanë shfaqur gjatë 28 viteve. Gjatë kësaj periudhe janë regjistruar 23 926 raste vdekjesh që lidheshin me patologji të ndryshme. Mes tyre, 5 910 persona janë ndarë nga jeta për shkak të sëmundjeve kardiovaskulare, ndërsa 9 464 të tjerë për shkak të shfaqjes së tumoreve të ndryshme. Në të gjitha këto raste është vënë re se ndikim deciziv kishte mënyra e ushqyerjes. Sipas shifrave, ky faktor nuk përbënte ndonjë ndryshim të madh nga meshkujt te femrat.
Nutricionistët u këshillojnë gjithmonë njerëzve një dietë ushqimore që përfshin pak nga të gjitha, kjo duke nisur që në moshat e vogla. Por mbi të gjitha, ajo që nuk duhet të mungojë kurrsesi në dietën ushqimore janë produktet që përmbajnë substanca ushqyese dhe të dobishme për organizmin tonë. Mishrat e bardhë si pula, gjeli i detit, lepuri, peshku; frutat e thata, drithërat integrale dhe perimet janë ushqimet që ulin rrezikun e shfaqjes së patologjive që mund të çojnë edhe në vdekje. Në mënyrë të veçantë, studiuesit thonë se mishi i shpendëve dhe frutat e thata e reduktojnë rrezikun e këtyre sëmundjeve me 14-19 për qind. Në krye të listës së ushqimeve që “akuzohen” për rreziqet që i sjell është mishi i kuq.
