Kreu i PD, Lulzim Basha, gjatë mbledhjes në grupin parlamentar deklaroi se vjedhja e të dhënave është realizuar nga një grup i mirëorganizuar i dyshes Rama-Meta dhe që nxjerr në pah shtetin mafioz.

Sipas Bashës, “çështja e marrjes së të dhënave në serverin e Tatimeve, e ka tronditur tërë opinionin publik dhe e kanë rikthyer në vëmendjen e qytetarit këtë temë”.

“Serveri në fjalë përmban të dhënat konfidenciale të çdo tatim paguesi shqiptar. Është sekreti i të gjithë sipërmarrësve shqiptarë. Aksesi në këtë bankë të dhënash bëhet në mënyrë strikte dhe askush nuk mund të fusë duart pa lënë gjurmë”, tha Basha, në mbledhjen e grupit parlamentar.

Në vazhdën e akuzave, Basha deklaroi se, “Vjedhja natën e të dhënave të serverit nga një grup i mirëorganizuar i dyshes Rama-Meta, nxjerr në pah shtetin mafjoz”.

Partia Demokratike ka denoncuar sot rritjen e kriminalitetit në vend. Deputeti demokrat, Arben Ristani, ndërsa analizoi situatën e sigurisë publike, denoncoi aktet kriminale dhe pasigurinë me të cilën ka nisur java.

“Sot në orët e para të mëngjesit, siguria publike në Shqipëri është tronditur nga shfaqja e maskave në afërsi të Tepelenës, kur një autobus me udhëtarë që shkonin në Greqi, është sulmuar me armë dhe për pasojë dy vetë kanë mbetur të plagosur, njëri prej të cilëve në gjendje të rëndë shëndetësore.

Sot në mëngjes në Tiranë, në shkollën e mesme “Partizani”, brenda në klasë, një gjimnazist i vitit të parë është goditur me thikë, dhe sipas burimeve tona dhe medias, fatmirësisht ndodhet jashtë rrezikut për jetën. Kështu nis java në Shqipëri dhe kjo është situata e kriminalitetit në vend.

Kështu nis java me rendin dhe sigurinë “normale” të Edi Ramës dhe Saimir Tahirit. Partia Demokratike është e shqetësuar për pasigurinë e madhe publike. Ne i kërkojmë Policisë së Shtetit që të distancohet nga Ministri i Brendshëm dhe kryeministri dhe lojërat e tyre politike, dhe të kthehet në detyrë e të ushtrojë përgjegjësitë, pasi maskat, eksplozivi dhe armët  po plagosin e po vrasin çdo ditë. Ne i kërkojmë Ministrit të Brendshëm të ndalë shfaqjet  televizive dhe të respektojë pavarësinë e Policisë së Shtetit, sepse rezulton se ai me arrogancën dhe paaftësinë e tij, dukshëm i shërben vetëm përkeqësimit të rendit dhe sigurisë publike”.

Kreu i shtetit Bujar Nishani ka marrë pjesë në analizën e Gjykatës së Apelit dhe ka rikonfirmuar edhe njëherë angazhimin e tij për të dhënë kontributin për reformën në drejtësi. Kreu i KLD-së e ka cilësuar reformën në gjyqësor si një proces të pandalshëm duke kërkuar angazhimin e të gjithë aktorëve për realizimin e saj.

Ndërsa “Nuk ka asnjë dyshim që reforma në sistemin e drejtësisë, konkretisht në sistemin gjyqësor është  një proces i pandalshëm, një proces që riafirmohet dhe përballet me sfidat e reja që janë produkt i jetës shoqërore. Sfidat do të jenë të reja prandaj dhe qasja do të jetë gjithmonë e re. Sfidat janë të shumta por qartësisht të identifikura por kërkojnë angazhimin e të gjithë aktorëve për ta realizuar. Ajo që dua ti adresohem aktorëve publik është që ta gjenerojnë iniciativën e tyre nga mendimi i vëtë gjyqësorit. Duke vendosur në plan të parë interesin ligjor të gjyqtarit dhe jam i bindur që reflektimi dhe adresimi do të jetë pozitiv” u shpreh Nishani.

Ai gjithashtu kërkoi nga gjyqtarët zbardhjen sa më shpejtë të vendimeve gjyqësore pasi sipas tij një drejtësi e vonuar është një drejtësi e munguar.

“Janë plotësisht  dakort me atë që ministri përmendi ku mes shumë elementëve të tjerë është edhe sjellja profesionale e gjyqtarit veçanërisht në zbardhjen e vendimit të gjyqësorit. Asnjë gjyqtar i republikës nuk ka të drejtë të abuzojë me kohën e shqyrtimit dhe të zbardhjen e vendimit. Dështiroj të adresohem aktorëve të rëndësishëm të legjislativit, ekzekutivit por edhe të shoqërisë civile për të ndërmarrë hapa konkrete. Besoj që ka ardhur koha që gjytarët me një periudhë kohore prej 15-20 vitesh në gjyqësor të gëzojë statusin e gjyqtarit të apelit pavarësisht se nuk mund të ketë mundësi të jetë gjyqtar i kësaj gjykate. Ka ardhur koha që një gjyqtar me 20-25 vjet kontribut në sistemin gjyqësor të gëzojë statusin e gjytarit të Gjykatës së Lartë.  Ka ardhur koha të mendojmë për trupin asistues të gjykasës së apelit për të fituar kohën për zbardhjen e vendnmeve, për ndjekjen e produktivitetit të gjyqtarit dhe formalizimin e dinjitetit të tij. Është koha që KLD-ja në aktet e saj të respektojë propozimet që vijnë nga gjyqtarët dhe sidomos nga trupa e apelit” u shpreh më tej Nishani.

Kryetari i Grupit të Social-Demokratëve në Parlamentin Europian, Hannes Swoboda ka nisur sot axhendën e takimeve zyrtare. Ai është takuar sot me kryeministrin Edi Rama, me kreun e opozitës Lulzim Basha dhe me kreun e Parlamentit Ilir Meta.

Në konferencën e përbashkët për shtyp, kryeparlamentari Ilir Meta u shpreh se mazhoranca është e gatshme të bashkëpunojë me opozitën për reformat e rëndësishme për vendin.

Ndërkohë, eurodeputeti Swoboda  ndërsa theksoi domosdoshmërinë e realizimit të reformave të nisura shtoi se mosdhënia e statusit nuk ishte për fajë të Shqipërisë por të  problemeve brenda Bashkimit Europian.

“Jemi të zhgënjyer që nuk iu dha statusi i kandidatit Shqipërisë.  Mosdhënia e statusit nuk ka të bëjë me punën që ka bërë qeveria këto muajt e fundit por ka të bëjë me problemet që janë brenda vendeve europiane. Mesazhi më i mirë është që duhet bëhen reforma për vendin dhe nuk duhet ti mbajmë sytë në qershor për statusin.  Mesazhi që duhet të jepet për promovimin e Shqipërisë është bashkëpunimi mes mazhorancës dhe opozitës  për reformat” tha ai.

I pyetur për reformën administrative-territoriale, Swoboda theksoi se Shqipëria është e vonuar për realizimin e saj ndërsa theksoi se nuk sheh pengesë për arritjen e kompromisit mes mazhorancës dhe opozitës.

“Jeni vonë për realizimin e kësaj reforme. Sipas bisedimeve që kam pasur me kryeministrin, kryeparlamentarin por edhe me kreun e opozitës nuk shoh që të ketë ndonjë pengesë për arritjen e kompromisit për këtë refromë. Çështjet kryesore në shërbim të publikut nuk mund të arrihen siç duhet nëse kemi këto mini-autoritet lokale. Eksperienca europiane tregon se kjo funksionon dhe është e nevojshme për demokracinë” tha Swoboda.

Gjithashtu i pyetur për forcat ekstremiste në BE të cilat nuk lejuan marrjen e statusit të kandidatit për Shqipërinë, Swoboda u përgjigj: “Mendoj se këto forca ekstreme kishin fuqinë për vendimin për Shqipërinë, sidomos në Hollandë.  Por edhe zgjedhjet patën ndikim në disa parti politike europiane.  Dhe këto parti dhe këto forca ekstreme u forcuan kur u hap fjala që në Shqipëri nuk po funskionte qeveria dhe demokracia.  Ndaj dhe thirrja jonë është për opozitën që kur hapin fjalë të tilla duhet ta dinë që kjo ndikon tek vend i tyre”.