Presideti Ilir Meta paralajmëroi se për interesa tërësisht egoiste dhe okulte Shqipëria po shkon drejt konfrontimit nëse përgjegjësit nuk i thërrasin mendjes.

“Pas 22 vitesh, që kur Shqipëria u nda me vitin 1997, që ishte një vit mjfat fatkeq, të gjithë ti thërrasin mendjes dhe të marrin përgjegjësitë e tyre. Për interesa tërësisht egoiste dhe okulte Shqipëria nuk ka pse të shkojë në konfrontim. As dhe shqiptarët. Ata kanë vendosur të bashkëjetojnë në mënyrë demokratike dhe janë ndarë me sisteme përjashtuese që në vitin ’90” u shpreh kreu i shtetit paraditen e sotme në një prononcim për median menjëherë pas pjesëmarrjes në konferencën e tretë kombëtare të Industrisë së Bimëve Mjekësore dhe Aromatike, në Tiranë

Po kush i ka këto interesa okulte?

Meta: “Nuk i kanë ata të cilët mezi po presin turizmin dhe shtimin e rezevimeve dhe jo anulimin e rezevimeve.”

Kreu i shtetit ka dhe një përgjigje për deklaratën e kryeministrit i cili në një konferencë për median të pak ditëve më parë u shpreh se nuk ishte thirrur nga kreu i shtetit për zgjidhjen e krizës politike.

“Askush nuk mund ti transferojë përgjegjësitë tek të tjerët aq më tepër tek presidenti i Republikës. Ata e dinë shumë mirë se çfarë duhet të bëjnë dhe duhet të jenë të ndërgjegjshëm për pasojat që do të kenë në rast se e çojnë vendin drejt konfrontimit.”

Kreu i grupit parlamentar i Partisë Socialiste, Taulant Balla, deklaroi edhe njëherë vendosmërinë e mazhorancës për të mbajtur zgjedhjet vendore me 30 qershor.

Balla tha se çdo tentativë e opozitës për të penguar rrugën europiane të Shqipërisë do të dështojë, teksa shtoi se në 29 maj shqiptarët do të marrin lajmin e mirë nga Komisioni Europian për rekomandimin hapjes së negociatave me BE.

Balla: Zgjedhjet do të mbahen me 30 qershor dhe nuk e luan as topi. Ky është një fakt i padiskutueshëm dhe i panegociueshëm me askënd. Kushtetuta e Shqipërisë është dokument që nuk është llastik që mund ta tërheqësh ose jo. Kushtetuta është aty për tu respektuar dhe PS është në këtë sallë për ta respektuar. Nuk është PS si ato partitë që ju sollën ju këtu dhe tradhëtuan mandatin e  shqiptarëve. Aq e sigurt është detyrimi që kemi ne për të zhvilluar zgjedhje në 30 qershor sikurse dielli lind në lindje dhe perëndon në perëndim. Ne nuk do ti japim kurrë mundësinë Lulzim Bashës dhe bandës së tij të huliganëve të marrin peng vendin dhe të përdhosin Kushtetutën e Shqipërisë. Beteja jonë është për demokracinë dhe të ardhmen europiane të Shqipërisë.

Me 29 maj, sot një javë, në orën 12:30 të gjithë shqiptarët do të marrin lajmin e mirë nga KE për të rekomanduar përfundimisht fillimin e bisedimeve pa anëtarësim. Jo pa qëllim përpjekja e fundit për të penguar këtë lajm të mirë do të bëhet në paradën e fundit të huliganëve me 25 maj. Zgjedhjet e 30 qershorit  do të jenë një agim i ri për gjithë Shqipërinë, për fat të mirë të shpëtojë edhe PD nga pengmarrja e Lulzim Bashës. Sa për pengmarrjen e LSI, nuk quhet pengmarrje se është trashëgimi brenda familjes. Arsyeja pse opozita ka zgjedhur këtë rrugë lidhet me frikën për reformën në drejtësi.

Duke komentuar protestat e opozitës, ai akuzoi si urdhërues të akteve të dhunës gjatë të shtunës së 11 majit ish-kryeministrin  Berisha dhe kreun e PD-së Lulzim Basha.

Balla: Dhuna e të shtunës së kaluar urdhërohet politikisht dhe kriminalisht nga Sali Berisha dhe Lulzim Basha. Përdorimi i bombave molotov kundër institucioneve dhe punonjësve të policisë është akt terrorist. Fakti se numri i protestuesve vjen në ulje nga protesta në protestë është ogur i mirë që pas 30 qershorit edhe PD të ketë mundësi të nisë një histori të re. Historia e vjetër e PD mbaron me 30 qershor. Nuk bën PS marrëveshje në kurriz të Kushtetutës. Zgjedhjet do të zhvillohen në 30 qershor, kodi penal edhe me ndryshimet e fundit i garanton.

Prokuroria e Tiranës kërkon masën e sigurisë “arrest me burg” për 7 protestuesit e arrestuar për marshimin-protestë të 13 majit nga opozita.

Seanca po zhvillohet në Gjykatën e Tiranës nga gjyqtari Arben Micko.

Të arrestuarit akuzohen për veprat penale shkatërrim të pronës me zjarr, kundërshtim të punonjësit të policisë dhe prishje të rendit dhe qetësisë publike.

Për protestën e 13 majit janë proceduar në gjendje të lirë edhe 15 protestues të tjerë.

“Gjatë zhvillimit të tubimit si para Kryeministrisë dhe më pas pranë DPPSH, Parlamentit, Ministrisë së Brendshme si dhe tek Drejtoria Vendore e Policisë, pjesëmarrësit në tubim kanë kundërshtuar, goditur me mjete të forta, fishekzjarre, tymuese dhe sidomos tek DPPSH dhe DVP me kapsolla, punonjësit e Policisë, të cilët kanë qenë të planizuar me shërbim” bën me dije policia në komunikatën për mediat.

Nga goditjet, kundërshtimet dhe përdorimi i lëndëve piroteknike, sendeve të forta mësohet se kanë mbetur të plagosur 3 punonjës të Policisë, të cilët morën ndihmën e parë pranë spitalit të Traumës dhe SQU.

Policia thotë se në të gjitha ambientet e përmendura protestuesit si pasojë e përdorimit të fishekzjarreve, kapsollave e sendeve të tjera kanë shkaktuar dëme të konsiderueshme materiale.