SHBA kanë paralajmëruar të gjithë amerikanët që të mos udhëtojnë në Egjipt, por njëkohësisht kanë njoftuar edhe stafin diplomatik jo-emergjent që të largohet, pasi vazhdojnë përplasjet në këtë vend. Gjithashtu, departamenti i shtetit ka paralajmëruar shtetasit amerikanë në Egjipt që të jenë vigjilent.
Një paralajmërim i tillë erdhi pasi 3 persona duke përfshirë këtu edhe një shtetas amerikan kanë humbur jetën gjatë përleshjeve midis mbështetësve dhe kundërshtarëve të presidentit Muhamed Morsi. Tensionet në Egjipt janë rritur në prag të protestave masive të planifikuara nga opozita për ditën e dielë, ku do i kërkojnë presidentit Morsi të japë dorëheqjen. Ndërkohë mbështetësit e tij po theksojnë se çfarë shikojnë si të drejtë tek Morsi duke mos pranuar kështu kërkesën e opozitës. Të dielën është edhe përvjetori i parë i inaugurimit të presidentit Morsi. Gjithashtu sekretari i përgjithshëm Ban Ki Moon iu ka kërkuar egjiptianëve të respektojnë principet universale të një dialogu paqësor, një thirrje që është bërë edhe nga departamenti i shtetit amerikan, i cili shtoi se liderët politikë kanë përgjegjësi të marrin hapa për të siguruar që grupet mos të ushtrojnë dhunë.
